މެންޗެސްޓަރ ސިޓީ އަށް ކުޅެމުން އައި އިންގްލެންޑުގެ ޑިފެންޑަރު ކައިލް ވޯކާ، ލޯނު އެއްބަސްވުމެއްގެ ދަށުން އިޓާލިއަން ލީގުގެ އޭސީ މިލާނަށް ބަދަލުވެއްޖެ އެވެ.

ޓޮޓެންހަމް ދޫކޮށްލުމަށްފަހު 2017 ވަނަ އަހަރު ސިޓީ އަށް ބަދަލުވި ވޯކާ، އެ ކުލަބާ އެކު ސޮއި ކޮށްފައިވާ އެއްްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. ލޯނު އެއްބަސްވުމެއްގެ ދަށުން ވޯކާ އޭސީ މިލާނަށް ބަދަލުވީ ހަ މަސް ދުވަހުގެ މުއްދަތަކަށެވެ. އެއީ މިހާރު ކުރިއަށްދާ ސީޒަންގެ ނިޔަލަށެވެ. އެ މުއްދަތު ހަމަވުމުން، މިލާނުން ބޭނުންވާ ނަމަ ވޯކާގެ އެއްބަސްވުން ދާއިމީ ކުރުމުގެ ފުރުސަތު ވެސް އޮންނާނެ އެވެ.

ވޯކާ އޭސީ މިލާނަށް ބަދަލުވީއިރު، އޭނާ އަށް އޮތީ އެހެން ކުލަބުތަކުން ވެސް ހުށަހެޅުން ލިބިފަ އެވެ. ޚާއްސަކޮށް ސައުދީ އަރަބިޔާގެ ސައުދީ ޕްރޯ ލީގުގެ ކުލަބުތަކުން ވަނީ ވޯކާ ހޯދުމުގެ ޝައުޤުވެރިކަން ފާޅުކޮށް، އޭނާ އަށް ބޮޑެތި އަދަދުތަކުން މުސާރާ ވެސް ހުށަހަޅާފައި ކަމަށް މީޑިއާ ތަކުގައި ވަނީ ރިޕޯޓުކޮށްފަ އެވެ.

ވޯކާ ވަނީ މިހާތަނަށް ސިޓީގައި އޭނާ ހޭދަކޮށްފައިވާ ހަތް ސީޒަންގެ ތެރޭގައި އެ ކުލަބަށް ކުޅެދިން 319 މެޗުގައި ހަ ލަނޑު ޖަހައިފަ އެވެ. އަދި ސިޓީ އާއެކު އޭނާ ވަނީ 17 ތައްޓެއް ކާމިޔާބު ކޮށްފަ އެވެ. އޭގެ ތެރޭގައި އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކުރުން ހިމެނެ އެެވެ.

ސިޓީގައި އެ ޓީމުގެ ކޯޗު ޕެޕް ގާޑިއޯލާ އިސްކަން ދެމުން އަންނަ ކުޅުންތެރިންގެ ތެރޭގައި ވެސް ވޯކާ ހިމެނެ އެވެ. ވޯކާ އަކީ ސިޓީގެ ވައިސް ކެޕްޓަންގެ ގޮތުގައި ވެސް ހިމެނޭ ކުޅުންތެރިޔެކެވެ.