ރެއާލް މެޑްރިޑުގެ ފަރާތުން ފެންނަނީ ދަށް ކުޅުމެއް ކަމަށް ބުނާ އަޑު އިވޭ ކަމަށާއި، ނަމަވެސް ލީގު ތާވަލްގެ އެއް ވަަނައިގައި އޮތީ އެ ޓީމު ކަމަށް، ރެއާލްގެ ކޯޗު ކާލޯ އަންޗެލޮޓީ ބުނެފި އެވެ.

އޭނާ މިހެން ބުނީ ސްޕެނިޝް ލީގުގައި ރެއާލް އިން ލަސް ޕަލްމާސްއާ ދެކޮޅަށް ކުޅުނު މެޗަށްފަހު ނޫސްވެރިންނާ ވާހަކަ ދައްކަމުންނެވެ. ފަހަތުން އަރައި އެ މެޗުން ރެއާލް މޮޅުވީއިރު، މިހާރު ލީގު ތާވަލްގެ އެއް ވަނައިގައި އޮތީ ވެސް ރެއާލް އެވެ.

އަންޗެލޮޓީ ބުނީ، ފުޓުބޯޅައިގައި އެއްވެސް އިރެއްގައި ޙާލަތު އެއް ގޮތަކަށް ނޯންނާނެ ކަމަށެވެ. އޭނާ ބުނީ އަބަދު ވެސް ފުޓުބޯޅައިގައި ޙާލަތު ބަދަލުވަމުން ދާނެ ކަމަށާއި، އެ މަންޒަރު ހުރިހާ ދިމާލަކުން ވެސް ފެންނާނެ ކަަމަށެވެ. ނަމަވެސް، ރެއާލްގެ ފަރާތުން ފެންނަނީ ވަރަށް ދަށް ކުޅުމެއް ކަމަށާއި، އެ ޓީމުގެ ފެންވަރު ދަށްވެފައިވާ ކަމަށް ބުނާ ވާހަކަ ފާއިތުވި ދުވަސްތަކުގައި އިވެމުން އަންނަ ކަމަށް އަންޗެލޮޓީ ބުންޏެވެ. އޭނާ ބުނީ މިވަގުތު ވެސް ލީގު ތާވަލްގެ ކުރީގައި އޮތީ ރެއާލް ކަމަށާއި، ގޯސްތަކެއް ހެދެނީ ކޮން ބަޔަކަށްކަން އަބަދު ވެސް އޭނާ ބަލާ ކަމަށެވެ.

މީގެ އިތުރުން އަންޗެލޮޓީ ބުނީ ކުޅުމުގެ ވައްޓަފާޅި އާއި ދެން ވެސް ހުރި ކަންކަމުގައި ރެއާލަކީ އެންމެ މޮޅު ޓީމުކަމަށް އޭނާ ނުބުނާނެ ކަމަށެވެ. ބައެއް ޙާލަތްތަކުގައި ރެއާލް އިން ވަރަށް ރަނގަޅަށް އަދި މޮޅެއް ކުޅޭ ކަމަށާއި، ނަމަވެސް އަނެއްބައި ޙާލަތްތަކުގައި ރެއާލަށް މޮޅު ކުޅުން ނުދެއްކި، ކުޅުމުގެ ފެންވަރު ދައްވާ ކަމަށް އަންޗެލޮޓީ ބުންޏެވެ. އެއްވެސް ޓީމަކީ އެންމެ ފުރިހަމަ ޓީމު ނޫން ކަމަށާއި، އެ ފެންވަރުގެ ޓީމެއް ނޯންނާނެ ކަމަށް އަންޗެލޮޓީ ވަނީ ބުނެފަ އެވެ. އިތުރަށް އަންޗެލޮޓީ ބުނީ، ރެއާލް ކުޅެމުން އަންނަނީ އެ ޓީމުގައި ތިބި ކުޅުންތެރިންގެ ހުނަރާއި، އެ ކުޅުންތެރިންގެ ފެންވަރުން ކަމަށެވެ.

ރެއާލް ކުރިއަށް ދާ ގޮތާ ގުޅޭ ގޮތުން ވާހަކަ ދައްކަމުން އަންޗެލޮޓީ ބުނީ، އޭނާ ޤަބޫލު ކުރާ ގޮތުގައި ރެއާލް ކުރިއަށް ދަނީ ރަނގަޅު މިސްރާބުގައި ކަމަށެވެ. އަބަދު ވެސް ދަސް ކުރަން ޖެހޭ އައު ކަންތައްތަކާއި، ރަނގަޅު ކުރަން ޖެހޭ ގޯސްތައް ވެސް ހުންނާނެ ކަމަށް އަންޗެލޮޓީ ވަނީ ބުނެފަ އެވެ. އަދި އަބަދު ވެސް ރެއާލް މަސައްކަތް ކުރަނީ ގޯސްތައް ރަނގަޅުކޮށް، ރެއާލްގެ ފެންވަރުގައި ކުރިއަށް ދާން ކަމަށް ވެސް އޭނާ ބުންޏެވެ.

ލީގު ތާވަލްގެ އެއް ވަަނައިގައި މިވަގުތު ރެއާލް އޮތީ ދެ ޕޮއިންޓުގެ ލީޑަކުންނެވެ. މިހާތަނަށް ލީގުގައި ކުޅެފައިވާ 20 މެޗުން ރެއާލަށް ލިބެނީ 46 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އެތުލެޓިކޯ މެޑްރިޑަށް ލިބެނީ 44 ޕޮއިންޓެވެ. ތިން ވަނައިގައި އޮތް ވާދަވެރި ބާސެލޯނާ އަށް ލިބެނީ 38 ޕޮއިންޓެވެ.