މިހާރުގެ ރައީސް ޑރ. މުހައްމަދު މުއިއްޒަކީ ވައްކަންކުރުމާއި ދޮގުހެދުމުގައި ދެން އެވަރެއް ރާއްޖޭގައި ނުހުންނާނެ ފަދަ ރައީސެއް ކަމަށް ވައިކަރަދޫ ދާއިރާގެ މަޖިލިސް މެމްބަރު ހުސައިން ޒިޔާދު ވިދާޅުވެއްޖެއެވެ.
މެމްބަރު ޒިޔާދު މިފަދައިން ވިދާޅުވީ ރާއްޖެ ޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުންނެވެ.
ގިނަ ބައެއްގެ ޒާތީ މައުލޫމާތު ވަގަށްނަގައި ވެރިކަން ކުރާ މައި ޕާޓީ ޕީއެންސީން އަށް ވެއްދި ކަމަށް ބުނާ މައްސަލައާއި ގުޅިގެން ވާހަކަދައްކަވަމުން ފިއްޓޭ ވިދާޅުވީ މިއީ ސީދާ ހޯމްލެންޑް ސެކިއުރިޓީ މިނިސްޓަރ އަލީ އިހުސާން އަޑީގައި ހުންނަވައިގެން ކުރައްވާފައިވާ ބޮޑު ވައްކަމެއް ކަމަށެވެ. ފިއްޓޭ ވިދާޅުވީ ވަގު ފޯމުތަކަށް މީހުންގެ ޒާތީ މައުލޫމާތުތައް ނަގާފައި ހުރީ ޑީއެންއާރުން ކަމަށާއި އެހެން ކަމުން މިވަގުތު ހޯމްލޭންޑް ސެކިއުރީޓި މިނިސްޓަރ ވަގުތުތުން އެ މަޤާމުން ބޭރުކުރަން ޖެހޭކަމަށެވެ.
ފިއްޓޭ ވިދާޅުވީ ވަގަށް ނަގާފައިވާ މައުލޫމާތު ފޯމް ތަކަށް ބަލާލީމަވެސް އަދި ނަގާފައި ހުރި ފޮޓޯތަކަށް ބަލާލިނަމަވެސް އެއީ ސީދާ މިނިސްޓަރ އިހުސާން އަޑީގައި ހުންނަވައިގެން ކުރައްވާފައި ހުރި ކަމެއްކަން އެނގޭކަމަށެވެ. ނަމަވެސް މި މައްސަލަ އަނެއްކާވެސް ބަލަން މި ހުންނެވީ އިތުބާރު ގެއްލިފައި ހުންނެވި މިނިސްޓަރ އިހުސާން ކަމަށާއި އެހެންކަމުން އެކަން އިންސާފުން ދާނޭ ކަމަށް ގަބޫލު ނުކުރައްވާ ކަމަށް ފިއްޓޭ ވިދާޅުވިއެވެ.
ފިއްޓޭ ވިދާޅުވީ މިއަދު މި ދައްކަނީ ވަރަށް ބޮޑު ރައްޔިތުންގެ މަސްލަހަތު އޮތް ބޮޑު ވައްކަމެއްގެ ވާހަކަކަމަށާއި އެއީ އެހާފަސޭހައިން ދޫކޮށްލެވޭނެ ކަންތައްތަކެއް ނޫންކަމަށެވެ. އަދި ޕީއެންސީއަށް މިހާރު މި ވައްދާ ވަރަށް ވަގު ފޯމްތައް ފުރައިގެން މީހުން ވައްދަނީ މިނިސްޓަރ އިހުސާން ކަހަލަ އިތުބާރެއް ނެތް ބޭފުލަކު ހުރީކަމަށް ވެސް ފިއްޓޭ ވިދާޅުވިއެވެ.
ފިއްޓޭ ވިދާޅުވީ މަޖިލީހުގެ ރައީސަކީ ބޮޑު ޅެންވެރިއެއް ކަމަށާއި އެބޭފުޅާ އަބަދަުވެސް އޭރުގެ ހާލަތު ސިފަކޮށްދެއްވަމުން ގެންދަވަނީ ޅެންބަހުން ވާހަކަދައްވައިގެން ކަމަށެވެ. އެގޮތުން ޕީއެންސީއަށް އެހާ ގިނަ އަދަދަކަށް މެމްބަރުން ވައްދަމުން އެގެންދަނީ މިހާރުގެ ރައީސް ޑރ. މުހައްމަދު މުއިއްޒުގެ ހިމުމަތްތެރި ކަމުންކަމަށް ވިދާޅުވިކަމަށެވެ. އަދި މަޖިލީހުގެ ރައީސް އެވިދާޅުވާ ހިކުމަތްތެރިކަމަކީ ކޮބައިކަން ވަރަށް ސާފުކަމަށާއި އެ ވިދާޅުވާ ހިކުމަތްތެރިކަމަކީ ރައީސް މުއިއްޒަކީ ދޮގުހެއްދެވުމާއި ވައްކަން ކުރުމުގައި ދެން އެވަރެއް ނެތް ބޭފުޅެއް ކަން ކަމަށް ފިއްޓޭ ވިދާޅުވިއެވެ.
ފިއްޓޭ ވިދާޅުވީ ވެރިކަން ކުރާ މައި ޕާޓީ ޕީއެންސީއަށް ގިނަ މީހުން ވަންނަނީ ރައީސް ޑރ. މުހައްމަދު މުއިއްޒުގެ ޙިކުމަތްތެރިކަމުންކަމަށް މަޖިލީހުގެ ރައީސް އަބްދުއްރަޙީމް އަބްދުﷲ ވިދާޅުވި ކަމަށާއި ނަމަވެސް މަޖިލީހުގެ ރައީސް އެ ވިދާޅުވާ ހިކުމަތްތެރިކަމަކީ ރައީސް ޑރ. މުޙައްމަދު މުއިއްޒަކީ ދޮގުހެއްދެވުމާއި ވައްކަން ކުރުމުގައި އެވަރެއް ނެތް ބޭފުޅެއްކަން ކަމަށް ފިއްޓޭ ވިދާޅުވިއެވެ.
ޕީއެންސީއަށް މިހާރު މި އޮތްވަރަށް މީހުން މި ވެއްދެނީ އިހުސާން ކަހަލަ ބޭފުލަކު ހުރީމަ. ދެން އަޅުގަނޑުމެންގެ މަޖިލިސް ރައީސަކީ ބޮޑު ޅެންވެރިއެއް. މަޖިލީހުގެ ރައީސް ވިދާޅުވީ ރައީސްގެ ހިކުމަތްތެރިކަމުންނޭ މިހާ ގިނަ މީހުން ޕީއެންސީއަށް މި ވަންނަނީ. އެހެންވީމަ މަޖިލިސް ރައީސަކީ ޅެންވެރިއެއް. ޅެންބަހުން އެ ވިދާޅުވީ ރައީސްގެ ހިކުމަތްތެރިކަމަކީ ކޮބައިކަން ވަރަށް ސާފުކޮށް. ރައީސަކީ އިތުރުފުޅެއްދެވުމާއި ދޮގުހެއްދެވުމުގަ އެވަރެއް ދެން ރާއްޖޭގައި ނުހުންނާނެ ރައީސެއް." ފިއްޓޭ ވިދާޅުވިއެވެ.ވައިކަރަދޫ ދާއިރާގެ މަޖިލިސް މެމްބަރު ހުސައިން ޒިޔާދު
ފިއްޓޭ އިތުރަށް ވިދާޅުވީ ޕީއެންސީގައިވެސް މި ވަގު ފޯމްތައް ހުށަހެޅުމާއި ދެކޮޅު ބޭފުޅުން އެބަތިއްބެވި ކަމަށާއި ޕީއެންސީގެ ހުރިހާ ބޭފުޅުންނަކީ މިފަދަ ކަންކަމަށް ތާއީދުކުރައްވާ ބޭފުޅުންނޫންކަމަށެވެ. ނަމަވެސް ޕީއެންސީ މިހާބޮޑަށް ވައްކަމާއި ދޯޅަވެގެން މި އުޅެނީ އެ ޕާޓީގެ ލީޑަރޝިޕްގެ ބޭފުޅުން ބަދަލުވި ހިސާބުން ކަމަށާއި އެ ހުރިހާ ވައްކަމެއް ކުރަން ފެށީ ރައީސް މުއިއްޒު އެ ޕާޓީގެ ރައީސް ކަމަށް އައި ހިސާބުން ކަމަށް ފިއްޓޭ ވިދާޅުވީއެވެ.
ފިއްޓޭ ވިދާޅުވީ މީގެ ކުރިންވެސް އެ ބުނާ ޕީއެންސީއެއް އޮތް ކަމަށާއި ނަމަވެސް ކުރީގެ ލީޑަރޝިޕްގެ ދަށުން އެ ޕާޓީން މިފަދަ ކަންކަން ކުރާކަމަށް ވާހަކަ ދެކެވިފައި ނުވާކަމަށެވެ.
