ރައީސް ޑރ. މުހައްމަދު މުއިއްޒުގެ މި ސަރުކާރުން ނެގައިކަމަށް އެ ވިދާޅުވާ ވައިޑް-ބޮޑީީ މަތިންދާ ބޯޓަކީ 14 އަހަރު ވެފައިވާ ބައު ބޯޓެއް ކަމަށް ކުރީގެ ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
އަމީރު މިހެން ވިދާޅުވީ ރާއްޖެ ޓީވީގެ "ޓީވީ ޓޯކް" ޝޯގައި ވާހަކަދައްކަވަމުންނެވެ.
ރާއްޖޭގެ ގައުމީ އެއާލައިން، މޯލްޑިވިއަން ބޮޑު އަދަދަކުން ދަރަނިވެރިވެ، ހާލަތު ގޯސްވި މައިގަނޑު ސަބަބަކީ އެ ކުންފުނީގެ ހިންގުން ސިޔާސީ މީހުންނާ ހަވާލުކުރުމުން ކަމަށް ޓްރާންސްޕޯޓް މިނިސްޓަރު މުހައްމަދު އަމީން ކުރިން ވަނީ ވިދާޅުވެފައެވެ.
މިނިސްޓަރު ވިދާޅުވީ އައިލެންޑް އޭވިއޭޝަނުން ހިންގާ މޯލްޑިވިއަންއަށް ދިމާވެފައި އޮތް ހާލަތަކީ ސިޔާސީވެގެން ގޮސް ދިމާވި ކަންކަން ކަމަށެވެ. އަދި މިނިސްޓަރު ވިދާޅުވީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2018 ވަނަ އަހަރާ ހަމައަށް ސަރުކާރުގެ ސޮވެރިން ގެރެންޓީއަކާ ނުލައި ހިންގަމުން ދިޔަ މޯލްޑިވިިއަން، 2023 ވަނަ އަހަރު ނިމުނުއިރު ދެ ބިލިއަނުން ދަރުވާލާފައިވާ ކަމަށެވެ.
އަމީންގެ މި ވާހަކަ އަށް ރައްދު ދެއްވައި ރާއްޖެ ޓީވީގެ "ޓީވީ ޓޯކް" ޝޯގައި ވާހަކަދައްކަވަމުން އަމީރު ވިދާޅުވީ، ދުނިޔެއަށް ކުރިމަތިވި އެންމެ ބޮޑު ކޮވިޑުގެ ބަވާއާ ގުޅިގެން ކުރިމަތިލާން ޖެހުނު ދަތިތަކަކާއި އެކުވެސް ނިމިދިއަ ސަރުކާރުން ރާއްޖޭގެ ގައުމީ އެއާލައިން ބަނގުރޫޓު ވިޔަ ނުދީ ހިފެހެއްޓިކަމަށެވެ. އަދި މުޅި ދުނިޔޭގެ ވައިގެ ދަތުރުތައް ހުއްޓުމަކަށް އައިއިރުވެސް ރާއްޖޭގެ ގައުމީ އެއާލައިނަށް ހުއްޓުމެއް ނާންނަ ކަމަށް ވެސް އަމީރު ވިދާޅުވިއެވެ.
އަމީރު ވިދާޅުވީ މި ސަރުކާރުން ގެނައި ވައިޑް-ބޮޑީ މަތިންދާ ބޯޓަކީ އައު ބޯޓެއް ނޫން ކަމަށާއި އެއީ 14 އަހަރު ވެފައިވާ ބައު ބޯޓެއް ކަމަށެވެ. ނަމަވެސް މި ސަރުކާރުން ރާއްޖޭގެ ރައްޔިތުނަން ވިސްނާދީފައި ވަނީ އެއީ މުޅިން އަލަށް ގެނައި މުޅިން އައު ބޯޓެއްގެ ގޮތުގައި ކަމަށެވެ.
..މިހާރު މި ގެނެސްފަ މި އޮތް ވައިޑް-ބޮޑީގެ މި ބޯޓު. މިހާރު އާ ބޯޓެއް ކަމަށް މި ސރަުކާރުން ފުރަތަމަ ބުނީވެސް، އެހެން ނަމަވެސް މިއީ އާ ބޯޓެއް ނޫން، މިއީ 14 އަހަރުވެފައި ބޯޓޭއްކަން މިހާރު މި އެނގެނީ. އެހެންވީމަ ބަޔަކާއި އެއްކޮށް އެގްރީމެންޓެއް ހެދިގެން އެއަށް ފަތުރުވެރިން ހޯދައިގެން އެ ބޭފުޅުންނަށް އަޅުގަނޑުމެން ފައިސާ ދީގެން ހިންގާ އޮޕަރޭޝަނެއްގެ ގޮތުގައި ފާހަގަމިވަނީ.އަމީރު ވިދާޅުވި
މި ސަރުކާރުން ދައްކާ ކުރީ ސަރުކާރުގެ ދަރަނީގެ ވާހަކަ އާ ގުޅޭ ގޮތުން އަމީރު ވިދާޅުވީ ރާއްޖޭގައި ކޮންމެ ސަރުކާރެއް ވެސް ބަދަލުވާއިރު ނުދެއްކި ހުރި ބިލްތައް ހުންނަކަމަށާއި އެގޮތުން ރައީސް ޔާމީންގެ ސަރުކާރު ނިމި އެމްޑީޕީ ސަރުކާރާއި ހަވާލުވިއިރު ވެސް އެތައް ބިލިއަން ރުފިޔާއެއްގެ ބިލުތައް ނުދައްކާ ހުރިކަމަށެވެ. ނަމަވެސް އެމްޑީޕީ ސަރުކާރުން ފުރަތަމަ ވެސް އިސްކަމެއް ދީގެން އެ ބިލްތަކަށް ފައިސާ ދެއްކި ކަމަށް އަމީރު ވިދާޅުވިއެވެ. އަމީރު ވިދާޅުވީ ސަރުކާރަށް އެންމެ ބޮޑު ތާށިކަމެއް އައީ ކޮވިޑް އާއި ގުޅިގެން ކަމަށާއި ނަމަވެސް އެ ދަތިހާލުގައިވެސް ނުދައްކާ ހުރި ބިލްތަކަށް ފައިސާދައްކަމުން ދިޔަކަމަށެވެ.
އަމީރު ވިދާޅުވީ އެމްޑީޕީ ސަރުކާރާއި ޚިލާފަށް މިހާރު މިއޮތް ސަރުކާރަށް އެއް އަހަރު ފުރުނުއިރު، 57 ބިލިއަނެއްހާ ރުފިޔާގެ ބަޖެޓު ހުސްވެގެން ދިޔައިރު، ހެދިނުހެދިއެއް ނޭނގޭ ކަމަށާއި ކުރި އެއްވެސް ކަމެއް މިހާތަނަށް ފެންނަން ނެތްކަމަށެވެ. އަމީރު ވިދާޅުވީ 57 ބިލިއަން ރުފިޔާގެ މި ބަޖެޓު ހުސްވިގޮތަކާއި މެދު ސުވާލު ކުރަން ޖެހޭކަމަށެވެ.
އަމީރު ވިދާޅުވީ މި ސަރުކާރުން 57 ބިލިއަން ރުފިޔާގެ ބަޖެޓު ހުސްކޮށްލި އިރު، ރާއްޖޭގެ ކޮންސްޓްރަކްޝަން ދާއިރާ އެއްކޮށްކަހަލަ ގޮތަކަށް އޮތީ ހުއްޓިފައި ކަމަށެވެ. އެގޮތުން މި ސަރުކާރުން ގިނަ އަދަކަށް ފައިސާ ދައްކަން ޖެހޭ، އަދި ނުދައްކާ ވަރަށް ގިނަ ކޮންޓްރެކްޓަރުން އެބަތިބި ކަމަށާއި އެފަރާތްތަކުން ދަނީ ހާލުގައި ޖެހިގެން، ފޯނުބިލު ނުދެއްކި، ކަރަންޓުބިލު ނުދެއްކިގެން ފައިސާކޮޅު ދިނުމަށް އާދޭސްކުރަމުން ކަމަށް އަމީރު ފާހަގަ ކުރެއްވިއެވެ.
ރާއްޖޭގެ ކޮންސްޓްރަކްޝަން ދާއިރާ ބަނގުރޫޓް ވަމުން އަންނަކަން ފާހަގަކުރައްވަމުން އަމީރު ވިދާޅުވީ ނިމިގެން ދިޔަ އަހަރުގައި މި ސަރުކާރުން އެ އަހަރުގެ ނޮވެމްބަރު މަސް ނިމުގެ ކުރިން ކޮންޓްރެކްޓަރުންނަށް ނުދެއްކި ހުރި ބިލްތަކަށް 500 މިލިއަން ދައްކާނެ ކަމަށް ރައީސް ވިދާޅުވި ކަމަށެވެ. ނަމަވެސް މިއަދާއި ހަމައަށްވެސް އެ 500 މިލިއަން ދައްކާފައި ނުވާކަމަށެވެ. އަދި އެކަމާ ގުޅިގެން ކޮންޓްރެކްޓަރުން ދަނީ ބަނގުރޫޓުވުމާއި ދިމާއަށް ކަމަށް ވެސް އަމީރު ވިދާޅުވިއެވެ.
އަމީރު ވިދާޅުވީ މި ސަރުކާރުން އަބަދަުވެސް ދައްކަނީ 500 މިލިއަނެއްގެ ވާހަކަ ކަމަށާއި އެގޮތުން ރައީސް ހުވަދު އަތޮޅަށް ކުރެއްވި ދަތުރުފުޅުގައި ވެ ވަޑައިގެން ވައުދުތަކުގެ ތެރޭގައި ވެސް އެ ވިދާޅުވާ 500 މިލިއަނެއްގެ ވާހަކަ ވަރަށް ގިނައި ދެއްކެވިކަމަށެވެ.
