ކަރަބޯ ކަަޕްގެ ސެމީ ފައިނަލްގެ ފުރަތަމަ ލެގުގައި ނިއުކާސަލް ޔުނައިޓެޑު އަތުން ބަލިވީއިރު، މިހާރު ތިބީ ހާފް ޓައިމްގައި ކަމަށާއި، އާސެނަލަށް މުބާރާތުގެ ފައިނަލަށް ދެވޭނެ ކަމުގެ ފުރިހަމަ ޔަގީންކަން އޮތް ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

އޭނާ މިހެން ބުނީ، އާސެނަލްގެ އަމިއްލަ ދަނޑުގައި ކުޅުނު ސެމީ ފައިނަލް މެޗަށްފަހު ނޫސްވެރިންނާ ވާހަކަ ދައްކަމުންނެވެ. އާސެނަލްގެ ދަނޑުގައި ކުޅުނު އެ މެޗު 2-0 އިން ކާމިޔާބުކޮށް، ނިއުކާސަލް އިން ވަނީ މުބާރާތުގެ ފައިނަލްގެ އުންމީދު ބޮޑު ކޮށްފަ އެވެ.

އާޓެޓާ ބުނީ، ދެ ލަނޑުން އާސެނަލް ބަލިވުން އެއީ މެޗުން ނިކުތް ނަތީޖާ ކަމަށެވެ. މެޗުގެ އެހެނިހެން ކަންކަމާއި، މެޗުގެ ޑޮމިނޭޝަނަށް ބަލާއިރު، އެ ނަތީޖާ އަކީ މެޗުން ނިކުންނާނެ ނަތީޖާ ނޫން ކަމަށް އާޓެޓާ ބުންޏެވެ. އެހެން ނަމަވެސް، ނިއުކާސަލް ފެނުނީ އެ ޓީމަށް ލިބެމުން އައި ފުރުސަތު ބޭނުން ހިފަމުން ދިޔަ މަންޒަރު ކަމަށާއި، އާސެނަލަށް ލިބުނު ފުރުސަތުގެ ބޭނުން އެ ޓީމަށް ހިފޭ ގޮތް ނުވި ކަމަށް އާޓެޓާ ބުންޏެވެ. އެ ކަހަލަ މެޗުތަކުގައި އޮންނާނީ މޮޅުވުން ކަމަށާއި، އެ ނޫން ގޮތެއް ނޯންނާނެ ކަމަށް ވެސް އާޓެޓާ ބުނެފައިވެ އެވެ.

އާސެނަލަށް މުބާރާތުގެ ފައިނަލަށް ދެވޭނެތޯ ސުވާލު ކުރުމުން އާޓެޓާ ބުނީ، މިވަގުތު އަދި ތިބީ މެޗުގެ ހާފް ޓައިމްގައި ކަމަށެވެ. އާސެނަލްގެ ކުޅުންތެރިން ދައްކަމުން އަންނަ ކުޅުމަށް ބަލާއިރު، އަދި ވަރުގަދަ ޓީމުތަކާ ދެކޮޅަށް މިހާތަނަށް ދައްކާފައިވާ ހިތްވަރަށް ބަލާއިރު، އާސެނަލަށް ދެ ވަނަ ލެގުން މޮޅުވެ މުބާރާތުގެ ފައިނަލަށް ދެވޭނެ ކަމުގެ ފުރިހަމަ ޔަގީންކަން އޮތް ކަމަށް ވެސް އާޓެޓާ ބުންޏެވެ.

މިވަގުތު އާސެނަލް އޮތް ހާލަތާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، މެޗުން ބަލިވިޔަސް، އަދި އެއްވަރު ވިޔަސް، ޓީމު އޮންނާނީ ދަށް ޙާލަތެއްގައި ކަމަށެވެ. މެޗުން މޮޅުވެއްޖެ ނަމަ، އެ ވާހަކަތައް އެ ގޮތުގައި ނުދެކެވޭނެ ކަމަށާއި، މުޅި ޙާލަތު ބަދަލުވާނެ ކަމަށް ވެސް އާޓެޓާ ވަނީ ބުނެފަަ އެވެ. އޭނާ ބުނީ މައްސަލަތަކުގެ ވާހަކަ ދެއްކުމުގެ ބަދަލުގައި ފޯކަސް އޮތީ ކުރިއަށް ހުރި މެޗުތަކަށް ކަމަށާއި، އާސެނަލަށް ކުރިއަށް ވެސް ހުރީ ބޮޑެތި އަދި މުހިންމު މެޗުތަކެއް ކަމަށެވެ.

ނިއުކާސަލްގެ އަމިއްލަ ދަނޑުގައި ކުޅޭ ސެމީ ފައިނަލްގެ ދެ ވަނަ ލެގު އޮންނާނީ އަންނަ ފެބްރުވަރީ މަހުގެ ފަސް ވަނަ ދުވަހުގެ ރޭ އެވެ. މުބާރާތުގެ ފައިނަލްގެ ޖާގަ ހޯދެން އާސެނަލަށް އޮތީ ތިން ލަނޑުގެ ތަފާތުން ނިއުކާސަލްގެ މައްޗަށް ކުރި ހޯދައިގެންނެވެ.