ޖޮހަނެސްބާގްގެ އަގުބޮޑު ހޮޓަލެއްގައި ޒުވާން މޮޑެލްއަކަށް ހަމަލާދެއްވިކަމުގެ ތުހުމަތުގައި ޕްރޮސިކިއުޓްކުރަން ގޮވާލަމުންދަނިކޮށް ޒިމްބާބުވޭގެ ރައީސް ރޮބާޓް މުގާބޭގެ އަނބިކަނބަލުން އެނބުރި ގައުމަށް ވަޑައިގެންފިއެވެ.

 މީގެ ކުރިންވެސް ގްރޭސް މުގާބޭ އެނބުރި ގައުމަށް ވަޑައިގެން ކަމަށް ޚަބަރުތައް ފެތުރިގެންދިޔައެވެ.

ޒިމްބާބުވޭގެ ދައުލަތުގެ މީޑިއާ ޒެޑްބީސީ ގެނެސްދިން ރިޕޯޓަކުން ފެންނަ ގޮތުގައި ހަރާރޭ އެއާޕޯޓްގައި އަސްކަރިއްޔާގެ އޮފިޝަލުންނާއި ސަރުކާރުގެ އޮފިޝަލުން ރައީސް މުގާބޭގެ ދެ ކަނބަލުންނަށް މަރުހަބާ ވިދާޅުވެއެވެ.

ދެކުނު އެފްރިކާގެ ޕްރިޓޯރިއާގައި ބޭއްވި ދެކުނު އެފްރިކާގެ ގައުމުތަކުގެ ލީޑަރުންގެ ބައްދަލުވުމަށް މުގާބޭ އާއެކު ވަޑައިގަތުމަށްފަހު ދެ ކަނބަލުން އެކުގައި ވަޑައިގެންފައިވަނީ އެއާ ޒިމްބާބުވޭގެ ފްލައިޓަކުންނެވެ.

ދެކުނު އެފްރިކާގެ ފުލުހުން ވަނީ އެކަމަނާ އެގައުމު ދޫކުރައްވާ ފުރާވަޑައިގަތުން މަނާކުރުމަށް ސަރަހައްދީ ރޮނގުގައި "ރެޑް އެލާޓް" ނެރެފައެވެ. ނަމަވެސް އިންޓަރނޭޝަނަލް ރިލޭޝަން މިނިސްޓަރވަނީ އެކަމަނާއަށް ޑިޕްލޮމެޓިކް އިމްތިޔާޒް ދެއްވާފައެވެ.

ޑރ ގްރޭސް މުގާބޭއަށް ޑިޕްލޮމެޓިކް އިމްތިޔާޒްތައް ދެއްވާފައިވާކަމަށް ދެކުނު އެފްރިކާގެ ސަރުކާރުގެ ގެޒެޓްގައި އާދީއްތަ ދުވަހު ވަނީ ހާމަކޮށްފައެވެ.ނަމަވެސް އިމްތިޔާޒްތައް ދެއްވިކަމަށް ސޮއިކުރައްވާފައިވަނީ ހޮނިހިރުދުވަހުއެވެ.

ދެކުނު އެފްރިކާގެ ސަރުކާރުން ހޮނިހިރު ދުވަހު ބުނެފައިވަނީ ޒިމްބާބުވޭގެ ސަރުކާރުން އެދިފައިވާތީ ގްރޭސް މުގާބޭއަށް ޑިޕްލޮމެޓިކް އިމްތިޔާޒްތައް ދިނުމާމެދު ގޮތެއް ނިންމާނެ ކަމަށެވެ.

އޯގަސްޓްމަހުގެ 13 ވަނަ ދުވަހު ހަވީރު ހޮޓެލްގައި ހިނގި ހިތްހަމަ ނުޖެހުމެއްގައި ދެކުނު އެފްރިކާގެ އުމުރުން 20 އަހަރުގެ އަންހެނަކު ވަނީ ގެރޭސް މުގާބޭ އޭނާގެ މޫނުގައި އެކްސްޓެންޝަން ކޯޑަކުން ޖެހި ކަމަށް ތުހުމަތުކޮށްފައެވެ.

މޮޑެލްއެއް ކަމަށްވާ ގެބްރިއެއްލާ އެންޖެލްސް ވަނީ އުމުރުފުޅުން 52 އަހަރުގެ ގްރޭސް މުގާބޭގެ ފިރިހެން ދަރިފުޅާއެކު ހޮޓަލުގެ ކޮޓަރިއެއްގައި ހުއްޓައި ފެނުމުން އޭނާގެ ގައިގައި ޖެހިކަމަށް ތުހުމަތުކޮށްފައެވެ.

ގެބްރިއެއްލާ އެންޖެލްސްގެ ދިފާއުގައި މަސައްކަތްކުރާ ގްރޫޕަކުންވަނީ ދެކުނު އެފްރިކާގެ ސަރުކާރާ ދެކޮޅަށް ކޯޓަށް ދާނެކަމަށް ބުނެފައެވެ.