މޮނާކޯ ބަލިކޮށް، ޕެރިސް ސެއިންޓް ޖާމަން (ޕީއެސްޖީ) އިން ޓްރޮފީ ޑީ ޗެމްޕިއަންސް ކާމިޔާބު ކޮށްފި އެވެ.
ޤަތަރުގެ ވެރި ރަށް ދޯހާގައި ހުންނަ ސްޓޭޑިއަމް 974 ގައި އާދީއްތަ ދުވަހުގެ ރޭ ކުޅުނު ފައިނަލް މެޗު ޕީއެސްޖީން ކާމިޔާބު ކުރީ 1-0 އިންނެވެ. މެޗުގައި ޕީއެސްޖީން ލަނޑު ޖެހީ ވެސް އެންމެ ފަހު ވަގުތުގަ އެވެ.
މެޗުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ. މެޗުގެ ފުރަތަމަ ހާފުގައި ޕީއެސްޖީ އަށް ވަނީ ލަނޑު ޖަހާނެ ފުރުސަތު ލިބިފަ އެވެ. އެ ޓީމުގެ ޑިސައާ ޑޯ ފޮނުވާލި ބޯޅައެއް އަމާޒުވީ މޮނާކޯ ގޯލުގެ ހުރަސް ދަނޑިއާ އެވެ. އޭގެ ފަހުން ޕީއެސްޖީގެ ވިޓީނިއާ ފޮނުވާލި ބޯޅަ ދިޔައީ ގޯލުގެ އަރިމަތީ ދަނޑި ކައިރިން ބޭރަށެވެ. މެޗު ގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޕީއެސްޖީ އަށް ލަނޑު ޖަހައިދިނީ ފްރާންސްގެ އޮސްމާން ޑެމްބެލޭ އެވެ. އޭނާ އެ ލަނޑު ޖެހީ ފަބިއަން ރުއީޒް ތަނަވަސްކޮށްދިން ފުރުސަތެއްގަ އެވެ.
މިއީ ޕީއެސްޖީން ޓްރޮފީ ޑީ ޗެމްޕިއަންސް ކާމިޔާބު ކުރި 13 ވަނަ ފަހަރެވެ. އަދި ޕީއެސްޖީ އަކީ މި މުބާރާތުގެ ތަށި އެންމެ ގިނަ ފަހަރު ކާމިޔާބު ވެސް ކޮށްފައިވާ ޓީމެވެ.
