މާލޭގައި އިންތިހާ އަށް ފެންބޮޑުވެފައި ވާތީ ފެން ހިނދެންދެން މަގުތަކުގައި ބަރު އުޅަނދާއި ހަތަރު ފުރޮޅުދީ އުޅަނދު ނުދުއްވުމަށް ފުލުހުން އިލްތިމާސްކޮށްފިއެވެ.
އެކަމާއި ގުޅޭގޮތުން ފުލުހުން ބުނީ މާލެ އަށް ބޯކޮށް ވާރޭވެހުމުގެ ސަބަބުން މާލޭގެ މަގުމަތީގައި ވަރަށް ބޮޑަށް ފެންބޮޑުވެފައިވާ ކަމަށެވެ. އަދި އެކަމުގެ ސަބަބުން ގޭގެއާއި ފިހާރަތަކަށް ފެން ވަންނަމުންދާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ މަގުތަކުން ފެން ހިނދި މަގުތައް އާންމު ހާލަތަށް އެނބުރި ދަންދެން ބަރު އުޅަނދު ނުދުއްވުމަށް އިލްތިމާސްކުރާ ކަމަށެވެ.
މީގެ އިތުރުން ޒަރޫރީ ހާލަތްތަކުގައި މެނުވީ ހަތަރުފުރޮޅުލީ އުޅަނދުތައްވެސް ނުދުއްވުމަށް ފުލުހުން ވަނީ އިލްތިމާސްކޮށްފައެވެ.
ފުލުހުން މިފަދައިން ބުނެފައިވައިރު މާލޭގެ ބޮޑު ސަރަހައްދަކަށް ވިއްސާރައިގެ އަސަރުކޮށް، ފެންބޮޑުވުމުގެ ސަބަބުން ގެއްލުންތައް ލިބެމުންދާތީ މާލޭ ސިޓީ ކައުންސިލްއާއި މޯލްޑިވްސް ޕޮލިސް ސާރވިސް ގުޅިގެން ވެލި ބަސްތާ ޖެހުމުގެ މަސައްކަތް ދަނީ ކުރަމުންނެވެ.
މީގެ އިތުރުން މާލޭއިން ފެން ހިންދުމުގެ މަސައްކަތުގައި 3 ސަރަހައްދެއްގައި ހަރަކާތްތެރިވާ ކަމަށާއި އެ މަސައްކަތަށް 11 ޕަންޕް ބޭނުންކޮށްގެން ކުރަމުންގެންދާ ކަމަށް އެމްއެންޑީއެފުން ވަނީ ބުނެފައެވެ.
