މިހާރު މި އޮތް ވެރިކަމަކީ މިހާރުގެ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ (އަދުރޭ) އަށް ލިބިވަޑައިގަތް ވެރިކަމެއް ކަމަށް ކެންދޫ ދާއިރާގެ ކުރީގެ މަޖިލިސް މެންބަރު، އަލީ ހުސެއިން ވިދާޅުވެއްޖެއެވެ.
ރާއްޖެ ޓީވީގެ "ޓީވީ ޓޯކް" ޝޯގައި ވާހަދައްކަވަމުން އަލީ ހުސެއިން ވިދާޅުވީ މިހާރު މި ސަރުކާރަށް ދިމާވެގެން އުޅޭ މައްސަލަ ވަރަށް ގާތުން ބަލައި، ވިސްނާލުމުން އެނގޭނެ ކަމަށާއި އެގޮތުން މިހާރު މި އޮތް ވެރިކަމަކީ މަޖިލީހުގައި މިހާރުގެ ރައީސް އަބްދުއްރަޙީމް އަބްދުﷲ އަށް ލިބިވަޑައިގެންނެވި ވެރިކަމެއް ކަމަށެވެ. އަދި ރިޔާސީ ޓިކެޓު މިހާރުގެ ރައީސް ޑރ. މުހައްމަދު މުއިއްޒަށް ދެއްވީ ކޮންމެވެސް ސަބަބެއް މެދުވެރިވެގެން ކަމަށް ވެސް އަލީ ހުސެއިން ވިދާޅުވިއެވެ.
ރައީސް މުއިއްޒަށް ވެރިކަން ލިބިވަޑައިގަތް ގޮތާއި މެދު ވާހަކަދައްކަވަމުން އަލީ ހުސެއިން ވިދާޅުވީ، މި ސަރުކާރު އައުމުގެ ކުރިން އިންތިގާލީ މަރުހަލާގައި ޑިރެކްޓަރަކަށް އައްޔަން ކުރައްވާފައި ވަނީ ވެސް އަބްދުއްރަހީމް ކަމަށާއި އެގޮތުން މި ވެރިކަން ގެނައުމުގައި އެންމެ އިސް "މާވަޑި" އަކީ ވެސް އަބްދުއްރަހީމް ކަމަށެވެ. އެގޮތުން ވެރިކަމުގައި މި ކިއްސަރު އެޅިފައިވާ ގޮތާއި، ފެނަށް ދުވާނެ ގޮތާއި ހުރިހާ ގޮތެއްވެސް އެންމެ ރަނގަޅަށް އެނގިލައްވާނޭ ބޭފުޅަކީ ހަމަ އަބްދުއްރަހީމް ކަމަށް އޭނާ ވިދާޅުވިއެވެ.
އަލީ ހުސެއިން ވިދާޅުވީ މި ސަރުކާރުގެ ކިއްސަރު ގެނައީ އަބްދުއްރަޙީމުގެ މާވަޑިކަމުގައި ހުންނަވައިގެން ކަމަށާއި އެހެންކަމުން މި އޮޑި ފެނަށް ދުވާނެ ގޮތާއި، ދުވާނެ ވަރާއި ހުރިހާއެއްޗެއް ވެސް އެންމެ ރަނގަޅަށް އެނގިލައްވާނީ އަބްދުއްރަޙީމަށް ކަމަށެވެ. އަދި ކިއްސަރު އެޅުއްވި ގޮތަކަށް އަޅުއްވާފަ އޮޑި ހަވާލުކުރީ ރައީސް މުއިއްޒުއާއި ކަމަށާއި އަދި އެއަށް ފަހު އަބްދުއްރަޙީމް ވަޑައިގަތީ ކަމަށް ވެސް އަލީ ހުސެއިން ވިދާޅުވިއެވެ.
އަލީ ހުސެއިން އިތުރަށް ވިދާޅުވީ އަބްދުއްރަހީމްގެ މާވަޑިކަމުގައި ބަތް އޮޑި ކިއްސަރު ހެޔޮކުރުމަށް ފަހު މުއިއްޒުއާ ހަވާލުކުރި ނަމަވެސް، އެ އޮޑި ވަޔަށް ނުދުވާނެ ކަން އަބްދުއްރަހީމަށް ވަރަށް ރަނގަޅަށް އެނގިވަޑައިގަންނަވާނޭ ކަމަށެވެ. އަދި އެ އޮޑި ވަޔަށް ދުވާނެ މިންވަރާއި ނުދުވާނެ މިންވަރު ވެސް އެންމެ ރަނގަޅަށް އެނގިވަޑައިގްނަނާވާނީ ޚުދު އަބްދުއްރަހީމަށް ކަމަށް އޭނާ ވިދާޅުވިއެވެ.
އަޅުގަނޑަށް ހީވަނީ ދިމާވެގެން މިއުޅޭ މައްސަލަ އަޅުގަނޑުމެން ކުޑަކޮށް، ތަންކޮޅެއް ގާތުން ބަލާލައިފިއްޔާ އެނގެނޭހެން، މި ވެގެން އުޅޭގޮތް. އަޅުގަނޑު ދައްކާ ވާހަކައެއް އެއީ ހަމަ ހަގީގަތުގައިވެސް މި ވެރިކަމަކީ އަބްދުއްރަޙީމަށް ލިބިވަޑައިގަތް ވެރިކަމެކޭ އިނގޭތޯ؟.. ދެން ކޮންމެވެސް ސަބަބަކާއި ހެދި އެ ޓިކެޓު މުއިއްޒަށް ދެއްވީ އެ. އެކަން އެނގޭގޮތަކީ ވެރިކަން ލިބުމާ ގުޅިގެންވެސް، އިންތިގާލީ މަރުހަލާގައިވެސް ޑިރެކްޓަރަކަށް އައްޔަން ކުރީ އަބްދުއްރަހީމް. އެހެންވީމާ މީ އަބްދުއްރަހީމް ގެ ކިއްސަރަށް، އަބްދުއްރަހީމްގެ މާވަޑާން ކަމުގަ، އިސް ވަޑިއަކަށް ހުރެގެން މި ސަރުކާރުގެ ކިއްސަރު ގެނައީ. އެހެންވީމަ މި ކިއްސަރު އެޅިފައިވާ ގޮތާ، މި ފެނަށް ދުވާނެ ގޮތާ، މި ހުރިހާ އެއްޗެއްވެސް އެނގޭނީ ހަމަ އަބްދުއްރަހީމަށް. އަބްދުއްރަހީމް މި ކުރެއްވި ކަމަކީ އެ ކިއްސަރު އެޅިގޮތަކަށް އަޅުއްވާފަ، އޮޑި މުއިއްޒުއާ ހަވާލުކުރައްވާފަ، އަބްދުއްރަހީމް މި ވަޑައިގަތީ. އަބްދުއްރަހީމް މާ އެކްސްޕީރިއަންސް ވާނެ ނޫންތޯ. އެ ބޭފުޅާއަށް އެނގިލައްވާނެ، މި ޖެހޭނީ ކިހާ ހިސާބެއްގައި ކަން. ކިތަންމެ ވަރަކަށް އުޅުނަސް މި ވަޔަށް ނުދުވާނެ ކަން. މި ވަޔަށް ދުވާނެ މިންވަރާއި ނުދުވާނެ މިންވަރުވެސް އަބްދުއްރަހީމަށް އެނގިލައްވާނެ ވަރަށް ރަނގަޅަށް. ދެން އަބްދުއްރަހީމް މި ކުރެއްވި ކަމަކީ މަޖިލީހަށް މި ވަޑައިގެންނެވީ.އަލީ ހުސެއިން
މީގެ އިތުރުން އަލީ ހުސެއިން ވިދާޅުވީ އަބްދުއްރަހީމް މަޖިލީހުގެ ރައީސް ކަމަށް ވަޑައިގަތީ މި ހުރިހާކަމެއް އެނގިވަޑައިގެން ހުންނަވާ ކަމަށެވެ. އަދި މުއިއްޒަކީ އެއްގޮތަކަށް ވެސް ސިޔާސީ ވިސްނުމުގައި އަބްދުއްރަހީމް އާއި އަރާހަމަކުރެވޭނެ ވަރުގެ ބޭފުޅެއް ނޫންމަށް ވެސް އޭނާ ވިދާޅުވިއެވެ.
އަލީ ހުސެއިން ވިދާޅުވީ އަބްދުއްރަހީމް މާވަޑިއަކަށް ހުންނަވައިގެން އޮޑި ބަނދެފައި ހުރި ގޮތް ކުޑަކޮށްވެސް ރައީސް މުއިއްޒަށް އެނގިވަޑައި ނުގަންނަވާނޭ ކަމަށާއި އެގޮތުން އިންތިގާލީ މަރުހަލާގައި މި އޮޑި އަބްދުއްރަހީމް ބަނދެފައި ހުރީ އެއަށް ވުރެ މާ ފުރިހަމައަށް އަދި މާ ވަރުގަދަކޮށް ކަމަށެވެ.
