އޭސީ މިލާންގެ ކޯޗަކަށް، ޕޯޗުގަލްގެ ސާޖިއޯ ކޮންސެއިސާއޯ ހަމަޖައްސައިފި އެވެ.

އޭސީ މިލާންގެ ކޯޗަކަށް، އުމުރުން 50 އަހަރުގެ ކޮންސެއިސާއީ ހަމަޖެއްސީ އޭނާގެ ކުރިން އެ މަގާމުގައި ހުރި ޕައުލޯ ފޮންސެކާ މަގާމުން ވަކި ކުރުމަށްފަހު އެވެ. މިލާންގެ ކޯޗުކަމާ ހަވާލުވުމުގެ ކުރިން ކޮންސެއިސާއޯ ހުރީ ޕޯޓޯގެ ކޯޗުކަމުގެ މަގާމުގަ އެވެ. އެ ޓީމުގެ ކޯޗުކަމާ އޭނާ ހަވާލުވީ 2017 ވަނަ އަހަރު އެވެ. އެ ޓީމުގެ ކޯޗުކަން އޭނާ ދޫކޮށްލީ މިއަހަރުގެ ޖޫން މަހުގެ ތެރޭގަ އެވެ.

މިލާންގެ ކޯޗުކަމާ ކޮންސެއިސާއޯ ހަވާލުވީ 18 މަސް ދުވަހުގެ އެއްބަސްވުމެއްގެ ދަށުންނެވެ. އެހެންކަމުން އެ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިޔަލަށެވެ. އޭސީ މިލާން އަކީ ކޮންސެއިސާއޯގެ ކޯޗިން ކެރިއަރުގައި އޭނާ އިރުޝާދު ދޭނެ އަށް ވަނަ ޓީމެވެ. އެންމެ ފުރަތަމަ ބެލްޖިއަމްގެ ކުލަބެއްގައި އޭނާ މަސައްކަތް ކުރީ އެސިސްޓެންޓު ކޯޗެއްގެ ގޮތުގަ އެވެ.

އޭސީ މިލާންގެ ކޯޗަކަށް ކޮންސެއިސާއޯ ހަމަޖައްސާފައިވާއިރު، އޭނާ ވަނީ އެންމެ ފަހުން އިރުޝާދު ދިން ޕޯޓޯ އާއެކު ވެސް ކާމިޔާބީތަކެއް ހޯދައިފަ އެވެ. އޭނާގެ އިރުޝާދުގެ ދަށުން ޕޯޓޯ ކުޅެފައި ވަނީ 379 މެޗެވެ. އޭގެ ތެރެއިން އެ ޓީމު ވަނީ 274 މެޗުން މޮޅުވެފަ އެވެ. 52 މެޗުން ބަލިވެފައިވާއިރު، 53 މެޗުން ވަނީ އެއްވަރުވެފަ އެވެ. އޭނާގެ އިރުޝާދުގެ ދަށުން ޕޯޓޯ އިން ވަނީ 11 ތައްޓެއް ކާމިޔާބު ކޮށްފަ އެވެ.

އޭސީ މިލާންގެ ކޯޗުކަމުން ފޮންސެކާ ވަކިކޮށްފައި ވަނީ އޭނާގެ އިރުޝާދުގެ ދަށުން އެ ކުލަބުގެ ނަތީޖާތައް ދަށްވުމާ ގުޅިގެންނެވެ.