މިވަގުތު ނަތީޖާތައް ވަރަށް ބޮޑަށް ދަށްވެފައިވާ މެންޗެސްޓަރ ޔުނައިޓެޑު، އިނގިރޭސި ޕްރިމިއާ ލީގުން ރެލިގޭޓް ވެދާނެ ކަމަށް އެ ޓީމުގެ ކޯޗު ރުބެން އަމޯރިމް ބުނެފި އެވެ.

އޭނާ މިހެން ބުނީ ލީގުގައި ޔުނައިޓެޑުގެ އަމިއްލަ ދަނޑުގައި ނިއުކާސަލް ޔުނައިޓެޑާ ދެކޮޅަށް ކުޅެ، ބަލިވި މެޗަށްފަހު ވާހަކަ ދައްކަމުންނެވެ. އެ މެޗުން ޔުނައިޓެޑު ބަލިވެފައިވާއިރު، އެއީ ފާއިތުވި 45 އަހަރުގެ ތެރޭގައި ޔުނައިޓެޑުގެ އަމިއްލަ ދަނޑުގައި ޖެހިޖެހިގެން ތިން މެޗުން އެ ޓީމު ބަލިވި ފުރަތަމަ ފަހަރެވެ.

އެ މެޗަށްފަހު ވާހަކަ ދައްކަމުން އަމޯރިމް ބުނީ، ޔުނައިޓެޑުގެ އެންމެހާ ސަޕޯޓަރުންނަށް ކަންކަން ސާފުކޮށް އަދި ތެދަށް ބުނެދޭން ޖެހޭ ކަމަށެވެ. އަދި ޔުނައިޓެޑު ރެލިގޭޓް ވެސް ވެދާނެ ކަމަށް އޭނާ ވަނީ ބުނެފަ އެވެ. އެހެންކަމުން ޔުނައިޓެޑުން ވަރަށް ގިނަ ކަންކަން ބަދަލު ކުރަން ޖެހޭ ކަމަށާއި، ނަމަވެސް މި ސީޒަންގައި އެންމެނަށް ވެސް ވަރަށް ގިނަ އުނދަގޫތަކެއް ކުރިމަތިވާނެ ކަމަށް އަމޯރިމް ބުންޏެވެ. އެކަމުގެ ސަބަބުން ޔުނައިޓެޑަށް އިތުރު ހިތްވަރެއް ލިބިދާނެކަން ފާހަގަ ކުރަމުން އަމޯރިމް ބުނީ، އެ ޓީމަށް ޖެހޭނީ ހިތްވަރާ އެކު ކުރިއަށް ދިޔުމަށް މަސައްކަތް ކުރަން ކަމަަށެވެ.

މިވަގުތަށް ބަލާއިރު، އެކަމުގައި އޭނާގެ މައްސަލަ އޮތް ކަމަށް އަމޯރިމް ވަނީ އެއްބަސްވެފަ އެވެ. އަމޯރިމް ބުނީ ޓީމަށް ކުރިއެރުމެއް ނުލިބޭ ކަމަށާއި، މިވަގުތުގައި އެއީ ޔުނައިޓެޑަށް އޮތް ވަރަށް ބޮޑު ގެއްލުމެއް ކަމަށެވެ. އޭނާގެ އިރުޝާދުގެ ދަށުން ޔުނައިޓެޑު ކުޅެމުން އަންނައިރު، ގިނަ މެޗުތަކުން ބަލިވުމަކީ އިންތިހާ އަށް އުނދަގޫ ކުރުވާ ކަމެއް ކަމަށް ވެސް އަމޯރިމް ވަނީ ބުނެފަ އެވެ. ނަމަވެސް ކޮންމެ މީހެއްގެ ޙަޔާތުގައި ވެސް އުނދަގޫ ވަގުތުތަކެއް އަންނާނެކަން ފާހަގަ ކުރަމުން އަމޯރިމް ބުނީ، އެ ވަގުތުތަކާ ކުރިމަތިލާން ޖެހޭނީ ކެރިގެން ކަމަށާއި، ކުރިއަށް ދިޔުމުގައި ހިތްވަރު ހުންނަން ވާނެ ކަމަށެވެ.

ޔުނައިޓެޑުގެ ކޯޗުކަމަށް އަމޯރިމް ހަމަޖެއްސި ފަހުން ވެސް އެ ކުލަބުގެ ނަތީޖާތައް ރަނގަޅު ނުވާތީ، އޭނާ އަށް ވެސް އަންނަނީ ޕްރެޝަރު ބޮޑުވަމުންނެވެ. މި ސީޒަންގެ ޕްރިމިއާ ލީގުގައި މިހާތަނަށް ޔުނައިޓެޑު 19 މެޗު ކުޅެފައިވާއިރު، މޮޅުވެފައި ވަނީ އެންމެ ހަ މެޗުންނެވެ. ނުވަ މެޗުން ބަލިވެފައިވާއިރު، ހަތަރު މެޗުން ވަނީ އެއްވަރުވެފަ އެވެ. ލީގު ތާވަލްގެ 14 ވަނައިގައި ޔުނައިޓެޑު އޮތީ 22 ޕޮއިންޓާ އެކު އެވެ.