އިނގިރޭސި ޕްރިމިއާ ލީގުގައި އިޕްސްވިޗް ޓައުންއާ ދެކޮޅަށް ކުޅުނު މެޗުން ބަލިވީ، ލިބުނު ފުރުސަތުތައް ނިންމާ ނުލެވުމުން ކަމަށް ޗެލްސީގެ ކޯޗު އެންޒޯ މަރެސްކާ ބުނެފި އެވެ.

އިޕްސްވިޗް ޓައުންގެ އަމިއްލަ ދަނޑުގައި އެ ޓީމާ ދެކޮޅަށް ކުޅުނު މެޗުން ޗެލްސީ ބަލިވީ 2-0 އިންނެވެ. މިއީ 22 އަހަރުގެ ތެރޭގައި އިޕްސްވިޗް ޓައުންގެ އަމިއްލަ ދަނޑުގައި އެ ޓީމު މޮޅުވި ފުރަތަމަ ފަހަރެވެ.

އެ މެޗާ ގުޅޭ ގޮތުން ވާހަކަ ދައްކަމުން މަރެސްކާ ބުނީ، އެ މެޗަކީ އުންމީދު ވެސް ނުކުރާ ގޮތަކަށް ނަތީޖާ ނިކުތް މެޗެއް ކަމަށެވެ. އޭނާ ބުނީ އެ މެޗުގައި ޗެލްސީގެ ކުޅުންތެރިން ލަނޑު ޖަހާނެ ވަރަށް ގިނަ ފުރުސަތުތަކެއް ތަނަވަސްކުރި ކަމަށާއި، އެހެން ނަމަވެސް އެއިން އެއްވެސް ފުރުސަތެއްގެ ބޭނުމެއް ނުކުރެވުން ކަމަށެވެ. އޭގެ ބަދަލުގައި އިޕްސްވިޗް ޓައުން އިން އެ ޓީމަށް ލިބުނު ފުރުސަތުގެ ބޭނުން ހިފައި، ލަނޑު ޖަަހައިގެން ކުރި ހޯދި ކަމަށް ވެސް މަރެސްކާ ވަނީ ބުނެފަ އެވެ.

ވަކިން ޚާއްސަކޮށް މެޗުގައި އެ ޓީމުގެ ގޯލު ކީޕަރު ވަނީ ޗެލްސީގެ ގިނަ ހަމަލާތަކެއް ހުއްޓުވާފައިކަން މަރެސްކާ ފާހަގަ ކުރި އެވެ. އެ މެޗުގައި ޗެލްސީ އަށް ކަންތައްތަކެއް ރަނގަޅު ކުރެވުނީސް ކަން ފާހަގަ ކުރަމުން މަރެސްކާ ބުނީ، ބައެއް ވަގުތުތަކުގައި ޑިފެންސްގަައި ކަންކަން ރަނގަޅު ކޮށްލެވެން ޖެހޭ ކަމަށެވެ. ހަމައެހެންމެ ޗެލްސީގެ ޔާއޯ ފެލިކްސް އަދި ނޯނީ މަޑުއޭކޭ އަށް ލަނޑު ޖަހަން ލިބުނު ފުރުސަތުގެ ވާހަކަ ވެސް މަރެސްކާ ފާހަގަ ކުރި އެވެ.

މީގެ އިތުރުން މަރެސްކާ ބުނީ ސީޒަނެއްގައި ބައްޔަކީ ވެސް ކުރިމަތިލާން ޖެހޭނެ ކަމެއް ކަމަށާއި، މިފަދަ ވަގުތުތައް އަންނާނެކަން ކުރިން ވެސް އިނގޭ ކަމަށެވެ. ޚާއްސަކޮށް އެ ފަދަ ނަތީޖާއެއް ނެތި ސީޒަނެއް ނިންމާލުމަކީ ވެސް ވަރަށް އުނދަގޫ ކަމެއް ކަމަށް އޭނާ ބުންޏެވެ. ޗެލްސީގެ ކުޅުންތެރިން އަދި ކޯޗިން އޮފިޝަލުން ވެސް، މިހާރު އެ ޓީމު އޮތް ހިސާބާ މެދު ކުރިން އުންމީދު ވެސް ނުކުރާ ކަމަށާއި، ޗެލްސީން އަންނަނީ ރަނގަޅު ވާދައެއް ކުރަމުން ކަމަށް ވެސް މަރެސްކާ ވަނީ ބުނެފަ އެވެ. މިވަގުތު ޗެލްސީ އޮތް ހިސާބާ މެދު ވެސް ހިތްހަމަ ޖެހެން ޖެހޭ ކަމަށާއި، ނަމަވެސް އަދިވެސް ރަނގަޅު ކުރަން ޖެހޭ ވަރަށް ގިނަ ކަންކަން ހުރި ކަމަށް މަރެސްކާ ބުންޏެވެ.

މަރެސްކާ ހަވާލުވީ ފަހުން މި ސީޒަންގައި ޗެލްސީން ރަނގަޅު ނަތީޖާތަކެއް ނެރެމުން އައިއިރު، ލީގު ތާވަލްގެ ދެ ވަނައިގައި ވެސް އެ ޓީމު އޮތެވެ. ނަމަވެސް މި ފަހުން ނަތީޖާ ނުނެރެވި މިހާރު ޗެލްސީ އޮތީ ލީގު ތާވަލްގެ ހަތަރު ވަނަ މަގާމުގަ އެވެ. ހަތަރު ވަނައިގައި ޗެލްސީ އޮތީ 19 މެޗުން 35 ޕޮއިންޓާ އެކު އެވެ.