މެންޗެސްޓަރ ސިޓީ އޮތީ އިނގިރޭސި ޕްރިމިއާ ލީގު ކާމިޔާބު ކުރެވޭ ވަރަށް ވުރެ ދުރުގައި ކަމަށް، އެ ޓީމުގެ ކޯޗު ޕެޕް ގާޑިއޯލާ ބުނެފި އެވެ.

އޭނާ މިހެން ބުނީ ލީގުގައި ލެސްޓަރ ސިޓީއާ ދެކޮޅަށް ސިޓީން ކުޅުނު މެޗަށްފަހު ވާހަަކަ ދައްކަމުންނެވެ. އެ މެޗާ ކުރިމަތިލީއިރު، ސިޓީ އޮތީ ނަތީޖާ ދަށްވުމުގެ ސަބަބުން ވަރަށް ބޮޑު ޕްރެޝަރެއްގަ އެވެ. ނަމަވެސް އެ މެޗުން މޮޅުވެ ސިޓީ އަށް ވަނީ ކޮންމެ ވެސް ވަރެއްގެ ހިތްހަމަ ޖެހުމެއް ލިބިފަ އެވެ.

ގާޑިއޯލާ ބުނީ މިވަގުތު ސިޓީ އޮތީ ޕްރިމިއާ ލީގު ކާމިޔާބު ކުރުމާ ވަރަށް ދުރުގައި ކަމަށެވެ. މިވަގުތަށް ބަލާއިރު ސިޓީ އަށް ލީގު ކާމިޔާބު ކުރެވޭނެ އެއްވެސް ފުރުސަތެއް ނެތް ކަމަށް ޤަބޫލު ކުރާ ކަމުގައި ވެސް ގާޑިއޯލާ ބުނެފައިވެ އެވެ. އަދި އޭނާ ބުނީ، އެކަން ނުކުރެވުނު ނަމަވެސް ސިޓީން ޙާސިލު ކުރަން ޖެހޭ އެހެން ކަންކަން ހުރި ކަމަށެވެ. ގާޑިއޯލާ އެ އިޝާރާތް ކުރަނީ ލީގުގެ ގަދަ ހަތަރެއްގެ ތެރޭގައި އޮވެ، އަންނަ ސީޒަންގެ ޔުއެފާ ޗެމްޕިއަންސް ލީގުގެ ޖާގައެއް ކަށަވަރު ކުރުމުގެ ވާހަކައަށެވެ.

މީގެ އިތުރުން ގާޑިއޯލާ ބުނީ މިވަގުތަށް ސިޓީ އަށް ކޮންމެ ވެސް ވަރެއްގެ ހިތްހަމަ ޖެހުމެއް ލިބިފައިވާ ކަމަށެވެ. މިހާތަނަށް އައިއިރު ސިޓީން ވަރަށް ތަފާތު އަދި ބޮޑެތި ކަންކަން ޙާސިލު ކޮށްފައިވާކަން ފާހަގަ ކުރަމުން ގާޑިއޯލާ ބުނީ، މިހާރު ސިޓީ އޮތީ މެޗަކުން މޮޅުވުމުގައި ވެސް އެތައް ކަމެއް ތަހަންމަލު ކުރަން ޖެހޭ ޙާލަތުގައި ކަމަށެވެ. ސިޓީން އޮތީ މޮޅަކަށް އިންތިހާ އަށް ބޭނުންވެފައި ކަމަށާއި، ލެސްޓަރ މެޗުގައި ފެނުނީ އެންމެ ބޭނުންވާ ކުޅުން ނޫން ކަމަށް ވެސް ގާޑިއޯލާ ބުންޏެވެ. އެހެން ނަމަވެސް ކުރިއަށް ހުރި މެޗުތަކުން މޮޅުވެގެން ސިޓީ ރަނގަޅު ޙާލަތަށް ދާނެ ކަމަށް ގާޑިއޯލާ ޤަބޫލު ކުރެ އެވެ.

ގާޑިއޯލާ ބުނީ ނަތީޖާ ހޯދުމަށްޓަކައި ސިޓީން ކަންތައްތަކެއް ކުރަން ޖެހޭ ކަމަށެވެ. މެޗުތަކުގައި ރަނގަޅަށް ނުކުޅެވޭ ނަމަ، ނަތީޖާ ނުފެންނާނެ ކަމަށް ވެސް ގާޑިއޯލާ ބުނެފައިވެ އެވެ. މިވަގުތު ސިޓީ އޮތް ހިސާބަށް ބަލާއިރު، އެންމެ މުހިންމީ ރަނގަޅު ކުޅުމެއް ދެއްކުން ކަމަށާއި، ޕޮއިންޓުތަކެއް ހޯދައިގެން ހަމަޖެހުމެއް ލިބެން އޮތް ކަމަށް ވެސް އޭނާ ވަނީ ބުނެފަ އެވެ. ލީގުގައި ސިޓީ އަށް ދެން އޮތީ ވެސް އަމިއްލަ ދަނޑުގައި ކުޅޭ މެޗެއްކަން ފާހަގަ ކުރަމުން ގާޑިއޯލާ ބުނީ، އުންމީދެއްގައި ހުރީ ލެސްޓަރ މެޗުގެ ނަތީޖާގެ ސަބަބުން ކަމަށެވެ.

ލީގު ތާވަލްގައި ސިޓީ އޮތީ ފަސް ވަނައިގަ އެވެ. އެއީ މިހާތަނަށް ކުޅެފައިވާ 19 މެޗުން 31 ޕޮއިންޓާ އެކު އެވެ. ސިޓީގެ ނަތީޖާތައް މިފަހަކަށް އައިސް ދަށްވެފައިވާއިރު، ހުރިހާ މުބާރާތެއްގައި އެންމެ ފަހުން ސިޓީ ކުޅުނު 14 މެޗުގެ ތެރެއިން މޮޅުވީ އެންމެ ދެ މެޗުންނެވެ. ނުވަ މެޗަކުން ސިޓީ ވަނީ ބަލިވެފަ އެވެ.