މި ސަރުކާރަކީ ވައްކަމާ ދެކޮޅު ވާހަކަތައް ވިއްކައިގެން ވެރިކަމަށް އައި ސަރުކާރެކެވެ. ވައްކަމާއި ކޮރަޕްޝަނަށް ސަރުކާރުގެ ތެރޭގައި ކުޑަ ވެސް ޖާގައެއް ނޯންނާނެ ކަމަށް ހަރު އަަޑުން ވިދާޅުވި އެވެ. ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނައިބުގެ އިތުރުން، ވަޒީރުންގެ މަޖިލީހަކީ ނަޒާހަތްތެރި، ތެދުވެރި ބަޔަކަށް ވާނެ ކަމުގެ ފުރިހަމަ ޔަގީންކަން ރައްޔިތުންނަށް ދެމުންނެވެ. ވައްކަމާއި، ކޮރަޕްޝަނަށް މަގު ފަހިވާނެ ގޮތަށް ކަންތައް ކުރާ ހަމަ އެކަކު ވެސް މަގާމުގައި ނުބަހައްޓާނެ ކަމަށް ވިދާޅުވީ ވެސް ރައީސް ޑޮކްޓަރު މުޙައްމަދު މުޢިއްޒު އެވެ.
އެހެން ނަމަވެސް. ސަރުކާރަށް އެއް އަހަރަށްވުރެ ގިނަ ދުވަސްވެފައިވާއިރު ފެންނަމުން ދަނީ އެ މަންޒަރެއް ނޫނެވެ. ދެކެވެމުން އަންނަނީ އެ ވާހަކަތަކެއް ނޫނެވެ. ސަރުކާރަށް އެއް އަހަރުވީއިރު، އެންމެ ގަދަޔަކަށް ދެކެވެމުން އަންނަ އެއް ވާހަކަ އަކީ، ރައްޔިތަކަށް ކަމެއްކޮށް ނުދެވޭ ވާހަކަ އެވެ. ރަށް ރަށުގައި ތަރައްޤީގެ މަޝްރޫއެއް ނުފެށޭއިރު، ކުރިން ފަށާފައިވާ އެންމެހާ މަޝްރޫއެއް ވެސް ހުއްޓިއްޖެ އެވެ. މަޑު ޖެހިއްޖެ އެވެ. އެކަމުގެ ސަބަބުން ރަށްތަކުގެ ރައްޔިތުންގެ މޫނު މަތިން ފެންނަނީ މާޔޫސްކަމާއި މޮޅުވެރިކަމެވެ.
އެ ވާހަކަ މަޑު ޖައްސާލާފައި، ދެން އެންމެ މުހިންމު ވާހަކަ އަށް ޖެހިލާނަމެވެ. ތަރައްޤީގެ މަޝްރޫއުތައް ކުރިއަށް ނުދާއިރު، ސަރުކާރުގައި ވައްކަމާއި ކޮރަޕްޝަން އިންތިހާ އަށް އަށަގެންފައިވާ ވާހަކަ ރައްޔިތުން އަންނަނީ ދައްކަމުންނެވެ. ސަރުކާރަށް ގިނަ ދުވަސްވާ ވަރަކަށް، ރައްޔިތުންނަށް ދަނީ އެ މަންޒަރު ފެންނަމުންނެވެ. ކޮންމެ ވެސް ވުޒާރާ އަކުން ނުވަތަ ސަރުކާރުގެ ކުންފުންޏަކުން ކޮންމެ ވެސް ވައްކަމެއް ނުވަތަ ކޮރަޕްޝަންގެ ކަންތައް ގަނޑެއް ހިންގާލައިގެން އުޅޭ ވާހަކަ އެވެ، ވަޒީރު ބޭފުޅަކު، ނުވަތަ އެމްޑީ އަކު ނުވަތަ ޑީއެމްޑީއަކު ކޮންމެ ވެސް ބަޔަކަށް ނުހައްގުން ފައިސާތަކެއް ނުވަތަ ރައްޔިތުންގެ މުދާތަކެއް ބަހާލައިގެން އުޅޭ ވާހަކަ އެވެ.
އެފްއެސްއެމް އިން ތެލުގެ ވައްކަން ކުރި ވާހަކަ އެވެ. ހަމަ އެ ކުންފުނިން މަސްދަޅު ކޭސްތަކެއްގެ ވައްކަންތަކެއް ހިނގައިގެން އުޅުނު ވާހަކަ އެވެ. އެޗްޑީސީން ގޯތިތަކެއްގެ ވައްކަމާއި ކޮރަޕްޝަން ހިންގާލައިގެން އުޅޭ ވާހަކަ އެވެ. ކުންފުނީގެ އެމްޑީ، އޭނާގެ ބޭބެ އަށް "ވަގު" ގޯތިތަކެއް ދިން ވާހަކަ އާއި، ދެން ވެސް އޭނާއާ ގުޅުން ހުރި އެތައް އެތައް ވާހަކަ އެކެވެ. އަދި ކީއްތޯ އެވެ! ރައްޔިތުންގެ ބޭސްފަރުވާގެ ކަންކަމަށް އެހީތެރިކަން ދިނުމަށް ޚާއްސަކޮށްފައި އިން އެންސްޕާ އިން ހިންގާލި ވައްކަމުގެ ޖަރީމާގެ ވާހަކަ އެވެ. ބަޔަކާ އެކު ޓީވީ ސްޓޭޝަނެއް ހިންގުމަށް އެ ބުރުވާލީ ރައްޔިތުންގެ ބޭސްފަރުވާ އަށް ހުރި ފައިސާ ކޮޅެވެެ.
ދެން ކިޔާނީ ކީކޭތޯ އެވެ؟ ދައްކާނީ ކޮން ވާހަކައެއްތޯ އެވެ؟ ރައްޔިތުންގެ ކުރިމައްޗަށް ނިކުމެ ވަޑައިގަންނަވަން ލަދު ނުގަންނަނީބާ އެވެ؟ ރައްޔިތުންނަށް ރައީސް މަނިކުފާނު ދައްކަވާނީ ކޮން މޫނެއްތޯ އެވެ؟ ވައްކަން ކުރަމުން، ރައްޔިތުންގެ ފައިސާތަކަށް ހިތު ހުރި ގޮތްތަކެއް ހަދަމުން ގެންދާއިރު ވެސް، ރައީސް އެ ހުންނެވީ ހެވި ދިލިފައި އާރަށުގައި ފުޓުބޯޅަ ކުޅުއްވާށެވެ. ވަރަށް ފިޒިކަލް ކޮށެވެ. ރައީސަށް ކަމެއް އިނގޭ ކަމަކަށް ވެސް ނުވެ އެވެ. އެއްވެސް މައުލޫމާތެއް ލިބޭ ކަމަކަށް ވެސް ނުވެ. ވައްކަން ކުރާ މީހުން ކުރަނީ އެވެ. ކޮރަޕްޝަން ހިންގާ މީހުން އެކަމުގައި އަަވަދި ނެތި އުޅެނީ އެވެ. ރައީސް ފުޓުބޯޅަ ކުޅުއްވަނީ އެވެ!
