ޑޮމެއިންގެ ހިދުމަތަށް އަލަށް ތައާރަފުކުރެވުނު ޑޮމެއިން ރަޖިސްޓަރީ ސެޓްފިކެޓް ހަވާލުކުރަން ފަށައިފިއެވެ.

އެންމެ ފުރަތަމަ ޑޮމެއިން ލިބުނު މީހާއަސް ޑޮމެއިން ރެޖިސްޓްރީ ސެޓްފިކެތް ހަވާލުކޮށްދެއްވީ ޓްރާންސްޕޯޓް މިނިސްޓަރު މުހައްމަދު އަމީންއެވެ.

އެ ސެޓްފިކެޓަކީ ޑޮމެއިން ރަޖިސްޓްރޭޝަންގެ ސައްހަކަން ކަށަވަރުކުރެވޭގޮތަށް ސެކިއުރިޓީ ފީޗާތަކެއް އެކުލެވިގެންވާ ލިޔުމެއް ކަން މިނިސްޓްރީން ފާހަގަކުރެއެވެ.

ޑޮމެއިން ހިދުމަތުގެ ސެކިއުރިޓީ ހަރުދަނާކުރުމުގެ ގޮތުން އައު ސެކިއުރިޓީ ފީޗާ ތަކަކާއެކު ޑޮމެއިން ރަޖިސްޓްރީ ސެޓިފިކެޓާއި ޑޮމެއިން ބޭނުންކުރުމުގެ ހުއްދަ ތައާރަފްކުރުމަށް ޓްރާސްޕޯޓް މިނިސްޓްރީން އެކަން ނިންމީ ދާދިފަހުންނެވެ.

ނިމުނު ނޮވެމްބަރު މަހުގެ  17 އިން ފެށިގެން  60 ދުވަސްތެރޭގައި ކުރިން ދޫކޮށްފައިވާ ޑޮމެއިން ބޭނުން ކުރުމުގެ ހުއްދަ ނުވަތަ ފައިސާ ދެއްކި ކަމުގެ ރަސީދު މިނިސްޓްރީއަށް ހުށަހަޅަންޖެހޭކަމަށް ޓްރާސްޕޯޓް މިނިސްޓްރީން ފާހަގަކުރެއެވެ. އަދި ހުށަހެޅުމަށްފަހު އަލަށް ތާއާރަފްކުރާ ޑޮމެއިން ރަޖިސްޓްރީ ސެޓުފިކެޓާއި ޑޮމެއިން ބޭނުންކުރުމުގެ ހުއްދައަށް ބަދަލުކުރަން އެ މިނިސްޓްރީން އިލްތިމާސްކުރިއެވެ.

ޑޮމެއިންގެ ހިދުމަތައް އެދި ލިޔެކިޔުންތައް ހުށަހެޅުމަށް ދެ ގޮތެއް ވަނީ ހަމަޖެހިފަ އެވެ. އެއީ ޑޮމެއިންގެ ހިދުމަތައް ހާއްސަކޮށްފައިވާ އީމެއިލްއަށް މެއިލްކުރުން ނުވަތަ ޑޮމެއިންގެ މަސައްކަތަށް މިނިސްޓްރީން ހާއްސަކޮށްފައިވާ ކައުންޓަރަށް ހުށަހެޅުމެވެ. ކައުންޓަރު ހުޅުވިފައި ހުންނާނީ ރަސްމީ ދުވަސްތަކުގައި ހެނދުނު 9:00 އިން 13:00 އަށް މިނިސްޓްރީގެ ގްރައުންޑް ފްލޯގަ އެވެ.

އަދި 60 ދުވަހުގެ މުއްދަތު ހަމަވުމަށްފަހު މިނިސްޓްރީއިން ޑޮމެއިންގެ ގޮތުގައި ބަލައިގަންނާނީ އެއްގަމު އުޅަނދުގައި ޑޮމެއިން ބޭނުންކުރުމުގެ ގަވާއިދުގެ ޖަދުވަލް 1 ގައި ބަޔާންކޮށްފައިވާ ޑޮމެއިން ރަޖިސްޓްރީ ސެޓްފިކެޓާއި ޑޮމެއިން ބޭނުންކުރުމުގެ ހުއްދަ އެކަންޏެވެ.

މިނިސްޓްރީން ބުނީ އަމާޒަކީ އެ ހިދުމަތް އަލުން ފެށިގެންދާއިރު ރެކޯޑުތައް ބަލަހައްޓާ އަދި މޮނިޓާ ކުރާނެ ހަރުދަނާ ނިޒާމާއި ހަރުދަނާ ގަވާއިދެއް އެކުލަވާ, ގަވާއިދާ އެއްގޮތަށް ހިދުމަތް ފޯރުކޮށްދިނުން ކަމަށެވެ.