އަލް ނަޞްރަށް ކުޅެމުން އަންނަ ބްރެޒިލްގެ ޓަލިސްކާ ހޯދުމާ ގާތަށް، ތުރުކީގެ ފެނަބާޗޭ އިން ޖެހިލާފައިވާ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 30 އަހަރުގެ ޓަލިސްކާ އަލް ނަޞްރަށް ބަދަލުވީ 2021 ވަނަ އަހަރު އެވެ. އެ ކުލަބާ އެކު އޭނާ އެންމެ ފަހުން ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރު އެވެ. ނަމަވެސް އެއްބަސްވުމުގައި ބާކީ ދެ އަހަރު އޮއްވާ، ފެނަބާޗޭ އިން ޓަލިސްކާ ހޯދުމުގެ މަސައްކަތް ކުރާއިރު، އޭނާ އެ ކުލަބަށް ބަދަލުވުން ގާތް ކަމަށް ރިޕޯޓުތަކުގައި ވަނީ ބުނެފަ އެވެ.

މީޑިއާ ތަކުގައި ބުނެފައިވާ ގޮތުން ޖަނަވަރީ ޓްރާންސްފާގައި ޓަލިސްކާ ދޫކޮށްލުމަށް އަލް ނަޞްރުން އޮތީ ތައްޔާރަށެވެ. އެކަމާ ގުޅުން ހުރި މަޝްވަރާތައް ދެ ކުލަބުގެ ދެ މެދުގައި ކުރިއަށްދާއިރު، ޓަލިސްކާ ވެސް ހުރީ ދެ ވަނަ ފަހަރަށް ތުރުކީގެ ކުލަބަކަށް ބަދަލުވާން އެއްބަސްވެގެން ކަމަށް ރިޕޯޓުތައް ބުނެ އެވެ. މީގެ ކުރިން ޓަލިސްކާ ވަނީ ތުރުކީގެ ބެސިކްޓާސް އަށް ކުޅެފަ އެވެ.

މީގެ އިތުރުން މިހާާރު މަޝްވަރާ ކުރެވެމުންދާ ގޮތަށް ކަންކަން ގޮސްފި ނަމަ، ޓަލިސްކާ ވަރަށް އަވަހަށް ފެނަބާޗޭ އަށް ބަދަލުވާނެ ކަމަށް ވެސް ރިޕޯޓުތައް ބުނެ އެވެ. އަދި އެ ކުލަބުން އޭނާ އަށް ހުށަހަޅަނީ ތިން އަހަރު ދުވަހުގެ އެއްބަސްވުމެއް ކަމަށް ވެސް މީޑިއާ ތަކުގައި ވަނީ ފާހަގަ ކޮށްފަ އެވެ.

އަލް ނަޞްރުގައި ވެސް ޓަލިސްކާ މޮޅު ކުޅުމެއް ދައްކާފައިވާއިރު، އޭނާ ވަނީ އެ ކުލަބަށް ކުޅެދިން 110 މެޗުގައި 77 ލަނޑު ޖަހައިފަ އެވެ.