ފްރާންސްގެ ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އިޓަލީގެ ގޯލު ކީޕަރު ޖިއަންލުއިޖީ ޑޮންނަރުންމާގެ މުސްތަޤުބަލާ މެދު ނިންމާނެ ގޮތަކާ މެދު ވިސްނަމުންދާ ކަމަށް، އޭނާގެ އެޖެންޓު އެންޒޯ ރައިއޯލާ ބުނެފި އެވެ.

އުމުރުން 25 އަހަރުގެ ކުޅުންތެރިޔާ ޕީއެސްޖީ އަށް ބަދަލުވީ 2021 ވަނަ އަހަރު އެވެ. އޭސީ މިލާންގައި ހުރުމަށްފަހު އޭނާ ޕީއެސްޖީ އަށް ބަދަލުވީ، ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2026 ވަަނަ އަހަރުގެ ޖޫން މަހުގެ ނިޔަލަށެވެ. އެ އެއްބަސްވުމުގެ މުއްދަތު ހަމަވާން ބާކީ ދެ އަހަރު އޮތް ނަމަވެސް، ޑޮންނަރުންމާގެ މުސްތަޤުބަލާ ގުޅޭ ގޮތުން އެކި ވާހަކަތައް އަންނަނީ ދެކެވެމުންނެވެ.

އެކަމާ ގުޅޭ ގޮތުން ވާހަކަ ދައްކަމުން ޑޮންނަރުންމާގެ އެޖެންޓު ރައިއޯލާ ބުނީ، ޕީއެސްޖީގައި ޑޯންނަރުންމާގެ މުސްތަޤުބަލު އޮތް ގޮތެއް މި ވަގުތު ބުނަން ދަތި ކަމަށެވެ. އޭނާ ބުނީ، މިވަގުތު ތިބީ ވިސްނަމުން އަންނަ މަރުހަލާއެއްގައި ކަމަށާއި، ކަންކަން ކުރިއަށް ގެންދިޔުމަށް ވަގުތު ނަގާނެ ކަމަށެވެ. އަދި މުސްތަޤުބަލުގައި ކޮންމެ ގޮތެއް ވެސް ވެދާނެކަން ފާހަގަކޮށް ރައިއޯލާ ބުނީ، އައު އެއްބަސްވުމެއްގެ ވާހަކަތަކަށް ވެސް ޑޮންނަރުންމާ ހުރީ ތައްޔާރަށް ކަމަށެވެ.

ޕީއެސްޖީ ދޫކޮށްލުމަށްފަހު، ޑޮންނަރުންމާ އަލުން އެނބުރި އިޓަލީ ލީގުގެ ކުލަބަކަށް ބަދަލުވެދާނެތޯ ސުވާލު ކުރުމުން ރައިއޯލާ ބުނީ، ފުޓުބޯޅައިގައި އެއްވެސް ކަމަކީ ނުވާނެ ކަމެއްގެ ގޮތުގައި ބުނެގެން ނުވާނެ ކަމަށެވެ. ކުރިއަށް އޮތް ތަނުގައި އެކަން ވެސް ފެނިގެން ދާނެ ކަމަށާއި، ނަމަވެސް މިވަގުތު ޑޮންނަރުންމާގެ ފޯކަސް އޮތީ ޕީއެސްޖީ އަށް ކަމަށް ވެސް އޭނާ ވަނީ ބުނެފަ އެވެ.

ޕީއެސްޖީ އަށް ބަދަލުވީ ފަހުން ޑޮންނަރުންމާ ވަނީ 130 މެޗުގައި އެ ޓީމުގެ ގޯލު ބަލަހައްޓައިފަ އެވެ. އެ ކުލަބާ އެކު އޭނާ ވަނީ ފްރާންސް ލީގު ތިން ފަހަރު، ފްރާންސް ކަޕް އެއް ފަހަރު އަދި ޓްރޮފީ ޑީ ޗެމްޕިއަންސް ދެ ފަހަރު ކާމިޔާބު ކޮށްފަ އެވެ. ޑޮންނަރުންމާ އަންނަނީ 2016 ވަނަ އަހަރުން ފެށިގެން އިޓަލީ ޤައުމީ ޓީމަށް ވެސް ކުޅެމުންނެވެ. މިހާތަނަށް އޭނާ ވަނީ 70 މެޗުގައި އިޓަލީ ޤައުމީ ޓީމުގެ ގޯލު ބަލަހައްޓައިފަ އެވެ. އިޓަލީ އާއެކު އޭނާ ވަނީ 2020 ވަނަ އަހަރުގެ ޔޫރޯ ފުޓުބޯޅަ މުބާރާތް ކާމިޔާބު ކޮށްފަ އެވެ. އެ މުބާރާތުގައި ޑޮންނަރުންމާ ވަނީ މޮޅު ކުޅުމެއް ދައްކައިފަ އެވެ.