ސީލައިފް އެޕާޓްމެންޓަށް ފައިސާދެއްކި ފަރާތްތަކުގެ ލިސްޓަކީ ޕަބްލިކް ޑޮމައިންއިން ލިބޭ މައުލޫމާތެއް ނޫން ކަމަށާއި، ވިނަރެސްގެ ފްލެޓުތައް ދޫކުރީ ސީލައިފްގެ މީހަކަށޭ ބުނުމުން އެކަން ކަށަވަރުނުކުރެވޭނެ ކަމަށް އެމްޑީޕީން ބުނެފިއެވެ.
ވަގު ލިޔުންތަކެއް ބޭނުންކޮށްގެން ހައުސިން ޑިވެލޮޕްމަންޓް ކޯޕްރޭޝަންގެ (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ އެއްބަޑު އެއްބަފާ ބޭބެއަށް ހުޅުމާލެ-ފޭސް2 އަކުން ގޯއްޗެއް ދޭން މަސައްކަތް ކުރި މައްސަލަ ފެންމަތިވެފައިވަނިކޮށް ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި އެމްޑީޕީގެ ހައުސިން ކޮމެޓީގެ މެންބަރު މުހައްމަދު އާރިފް ވިދާޅުވީ ސީލައިފް ގްލޯބަލް އިންކް ޕްރައިވެޓް ލިމިޓެޑަށް އެޕާޓްމަންޓް ގަތުމަށް ފައިސާދައްކާފައިވާ ފަރާތްތަކަށް "ވިނަރެސް" ހައުސިންގ މަޝްރޫއުގެ ދަށުން އެޕާޓްމަންޓް ބޭނުންވި ހުރިހާ ފަރާތްތަކަށް ކުރީ ސަރުކާރުގައި ފްލެޓު ދޫކޮށްފައިވާ ކަމަށެވެ.
އާރިފް ވިދާޅުވީ ސީލައިފްގެ ލިސްޓުގައި ހިމެނޭ މީހުންގެ މައުލޫމާތު ޕަބްލިކް ޑޮމައިންއިން ނުލިބޭނެ ކަމަށެވެ. އަދި މިސަރުކާރުން ފްލެޓު ދޫކުރީ ސީލައިފްގެ މީހަކަށޭ ބުނުމުން އެކަން ކަށަވަރުކުރާނެ ގޮތެއް ވެސް ނެތް ކަމަށް އޭނާ ވިދާޅުވިއެވެ.
ވިނަރެސްގައި ގާތްގަނޑަކަށް ހަމަ 400 އާއި ގާތްކުރާ އަދަދަކަށް އަޅުގަނޑުމެން އައިރުގައި ހުސްކޮށް ފްލެޓު ހުންނާނެ. ތިން ބާވަތެއްގެ މީހުންނަށް ފްލެޓު އޭރު ވިނަރެސްއިން އެލޮކޭޓް ކުރީ. އެއީ ވިނަރެސްއަށް އެޕްލައި ކުރި މީހުންގެ ތެރެއިން ޝަރުތުހަމާވާ މީހުންނާއި، ހިޔާ ލިބުނު މީހުންގެ ތެރެއިން ވިނަރެސް އެފޯޑް ކުރެވޭ މީހުންނަށް ހުޅުވާލި އާއްމު ފުރުސަތުގައި އެޕްލައި ކުރި މީހުންގެ ތެރެއިން މީހުންނަށާއި، ދެން ގުޅީފަޅުން ބަދަލުވާން ބޭނުންވާ މީހުންނަށާއި، ދެން އެޗްޑީސީން އިނީޝިއޭޓް ނަގައިގެން ސީލައިފްގެ މީހުންގެ ތެރެއިން ވިނަރެސް ފްލެޓް ބޭނުންވާ ފަރާތްތައް. ސީލައިފްގެ މީހުންގެ ތެރޭގައި އެބޭފުޅުންނަށް އަޅުގަނޑަށް ހީވަނީ ތިން ބާވަތެއްގެ މީހުން ގެންގުޅުނު ހެން. އޭގެ ތެރޭގައި އެއްބަޔަކީ ފައިސާގެ ދީފައި މުއާމަލާތް ނިންމާލި ބައެއް. އަނެއް ބައި މީހުން ކޯޓު މަރުހަލާގައި އުޅުނު ބައެއް. އަނެއް ބައި މީހުންނަކީ ވިނަރެސް ނެގި ބައެއް. އޭރުގައި ވިނަރެސް ބޭނުންވެގެން އެދުނު ހުރިހާ ފަރާތްކަށް ވިނަރެސް ދީފައި ހުރީ. ދެން ބާކީ މިހުރި އަދަދު މިއީ ކިހިނެތް ކޮންބަޔަކަށް ދިން އެއްޗެއްތޯ. ދެން ރޭގައި އެޗްޑީސީގެ އެމްޑީ ވަރަށް ބޮޑު އަދަދެއް ދެންނެވި ސީލައިފްގައި އުޅޭ ކަމަށް. ސީލައިފްގައި އުޅެނީ ކޮންބައެއްކަން ހަމަ ގައިމުގެ ވެސް އަޅުގަނޑުމެންނަށް ނޭނގޭ. އެއީ ޕަބްލިކް ޑޮމައިންގައި ހުރި މައުލޫމާތެއް ނޫން. މާނައަކީ ކޮންމެ ފަރާތަކަށް ވެސް ދީފައި އެއީ ސީލައިފްގެ މީހެކޭ ސީލައިފް ލިސްޓްްގައި އިން މީހެކޭ ބުނީމަ އެ އަޅުގަނޑުމެންނަށް ނޭނގޭނެ.އެމްޑީޕީގެ ހައުސިން ކޮމެޓީގެ މެންބަރު މުހައްމަދު އާރިފް
ހުޅުމާލޭގައި އެޅުމަށް ހަމަޖެހުނު 3000 ހައުސިންގ ޔުނިޓްގެ މަޝްރޫއުގައި އެޗްޑީސީއާއި ސީލައިފް ގްލޯބަލްއާ ދެމެދު އެއްބަސްވުމުގައި ސޮއިކުރެވުނީ 2014 މާރިޗު 13 ވަނަ ދުވަހުއެވެ. ފިޔަވަހިތަކަކަށް ބަހާލައިގެން ކުރިޔަށް ގެންދިއުމަށް އެއްބަސްވެވުނު މި މަޝްރޫއުގެ ފުރަތަމަ ފިޔަވަހީގެ ދަށުން އިމާރާތްކުރުމަށް ކަނޑައެޅުނީ 1000 ހައުސިންގ ޔުނިޓް ގެ މަސައްކަތެވެ. 14 ސެޕްޓެމްބަރު 2015 ވަނަ ދުވަހު ސީލައިފްގެ ފަރާތުން އެއްބަސްވުމާ އެއްގޮތަށް އަމަލުކުރަމުން ނުގެންދިޔުމުގެ ސަބަބުން އެ އަސާސްގެ މައްޗަށް ބިނާކޮށް އެޗްޑީސީގެ ފަރާތުން އެއްބަސްވުން ބާތިލުކުރި އެވެ.
އެޗްޑީސީން އެއްބަސްވުން ބާތިލްކުރުމުން ސީލައިފްގެ ފަރާތުން ހުޅުމާލެ މެޖިސްޓްރޭޓްކޯޓަށް އެ މައްސަލަ ހުށަހެޅުމުން އެ ކޯޓުން ނިންމީ އެކޯޕްރޭޝަންގެ ފަރާތުން އެއްބަސްވުން ބާތިލުކޮށްފައިވަނީ، ފުރިހަމަ ކުރަންޖެހޭ އިޖުރާއަތްތަށް ފުރިހަމަނުކޮށް ކަމަށްވުމުން، އެއްބަސްވުން އަނބުރާ އިއާދަކުރުމަށް ކަމަށެވެ. އެހެންކަމުން އެޗްޑީސީގެ ފަރާތުން އެއްބަސްވުން އަލުން އިއާދަކޮށް އެއްބަސްވުމުގައި ބަޔާންކޮށްފައިވާ މުއްދަތު އަލުން ދިނުމާއެކު މަޝްރޫއު ކުރިޔަށް ގެންގޮސް ނިންމާލުމުގެ ފުރުސަތު ސީލައިފަށް ދެވުނު ކަމަށެވެ. ނަމަވެސް އެފުރުސަތުގައި ވެސް ސީލައިފްގެ ފަރާތުން އެއްބަސްވުމުގައި ބަޔާންކޮށްފައިވާ ކަންކަން ނުކޮށް އެއްބަސްވުމާ ޚިލާފުވުމުގެ ސަބަބުން 2018 އޮކްޓޫބަރު 25 ވަނަ ދުވަހުގައި އެއްބަސްވުން އަނެއްކާވެސް ވަނީ ބާތިލް ކޮށްފައެވެ.
މީގެ އިތުރުން ސީލައިފްއިން ފްލެޓު ގަތުމަށް ފައިސާ ދެއްކި މީހުންނަށް ގެއްލުންވެ، އެމީހުން ބޭނުންވާނަމަ ވިނަރެސްއިން ފްލެޓް ދޫކުރުމަށް ކުރީ ސަރުކާރުގައި ނިންމައި، އެމަސައްކަތް ކޮށްފައިވެއެވެ.
