ވަގު ލިޔުންތަކެއް ބޭނުންކޮށްގެން ގޯއްޗެއް ހޯދުމަށް މަސައްކަތް ކުރި މައްސަލަ ބަލައިދިނުމަށް އެދި ރައްޔިތުންގެ މަޖިލީހަށް ހުށަހަޅާފައިވާ ކަމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެއެވެ.
ވަގު ލިޔުންތަކެއް ބޭނުންކޮށްގެން ހައުސިން ޑިވެލޮޕްމަންޓް ކޯޕްރޭޝަން (އެޗްޑީސީ)ގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ އެއްބަޑު އެއްބަފާ ބޭބެއަށް ހުޅުމާލެ-ފޭސް2 އަކުން ގޯއްޗެއް ދޭން މަސައްކަތް ކުރި މައްސަލަ ފެންމަތިވެފައިވަނިކޮށް ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި މެންބަރު މީކާއިލް ވިދާޅުވީ މިމައްސަލަ ބެލުމަށް ރައްޔިތުން މަޖިލީހަށް މައްސަލަ ހުށަހަޅާފައިވާ ކަމަށާއި، ކަންބޮޑުވުންތައް ވެސް ހިއްސާ ކޮށްފައިވާ ކަމަށެވެ.
މިމައްސަލައާ ގުޅިގެން އެޗްޑީސީން ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމަށް އިޝާރާތް ކުރައްވައި މެންބަރު މީކާއިލް ވިދާޅުވީ އެ ނޫސްވެރިންގެ ބައްދަލުވުމުން ވެސް މިމައްސަލަ އެއް އިދާރާއިން އަނެއް އިދާރާގެ ބޮލުގައި އެޅުވުމަށް މަސައްކަތް ކުރި މަންޒަރު ފެނިގެންދިޔަ ކަމަށެވެ. އެހެންކަމުން މިނިވަން އިންސާފުވެރި ތަހުގީގެއް ކުރިއަށް ގެންދިއުމަށް މިހާރުގެ ހައުސިން މިނިސްޓަރު ޑރ.އަލީ ހައިދަރުގެ އިތުރުން ސޯޝަލް ހައުސިންގެ ފްލެޓުތަކާ ބެހޭ ކޮމެޓީގައި އިންނަވާ ފިޒާނާ ރަޝީދު މިހާރުން ސަސްޕެންޑް ކުރަންޖެހޭ ކަމަށެވެ.
އަޅުގަނޑުމެންގެ ފަރާތުން ގަލޮޅު އުތުރު ދާއިރާގެ މެންބަރު މިހާރު ވާނެ ރައްޔިތުންގެ މަޖިލީހަށް މިމައްސަލަ ބަލައިދިނުމަށް ހުށަހަޅުއްވާފައި އަދި އަޅުގަނޑުމެންގެ ފަރާތުން ކަންބޮޑުވުންފާޅުކޮށްފައިވާނެ ފްލެޓު ކޮމެޓީގައި މިހާރު ތިބޭފުޅުންނަށް ވެސް އެނގިވަޑައިގަންނަވާނެ މިހިނގާގެން މިއުޅެނީ ވަރަށް ބޮޑަށް އާއިލީ މަސްލަހަތު އެކުލެވޭ ހިޔާނާތެއް ވައްކަމެއް. އެހެންވީމަ އާއިލީ މަސްލަހަތު މިހައި ބޮޑަށް ހިމެނޭ ވައްކަމެއްގައި ސޯޝަލް ހައުސިންއާ ގުޅޭ ފްލެޓުތައް ވިލަރެސް ކުރާ ކޮމެޓީގައި ރައީސުލްޖުމްހޫރިއްޔާ އައްޔަން ކުރައްވާ މިއިންނަވަނީ މިހާރު މި ވައްކަމުގެ ތުހުމަތު ކުރެވިގެން އުޅުއްވާ ދެބޭފުޅުން. އެއީ ފަޒުލް ރަޝީދާއި، ފަޒީލް ރަޝީދުގެ އެއްބަޑުއެއްބަފާ ބޭފުޅެއް ކަމަށްވާ ފިޒާނާ ރަޝީދު. ސޯޝަލް ހައުސިން ފްލެޓުތަކާ ގުޅޭ ކޮމެޓީގައި. އަނެއްކާ ވެސް މިފްލެޓުގެ މައްސަލަ ވެސް ވިލަރެސް ކުރައްވަން ވެސް އިންނަވާނީ މިބޭފުޅުންގެ އާއިލީ ބޭފުޅެއް. އެހެންވީމަ އަޅުގަނޑުމެން ދެކެން ވީހާ ވެސް ރައްޔިތުންގެ އިތުބާރާއި، މިތަހުގީގަަށް މިނިވަންކަން ހޯދުމުގެ ގޮތުން މިހުރިހާ ބޭފުޅުން މިވަގުތު ފުރުއްވަމުން ގެންދަވާ މަގާމުތަކުން އެކަހެރި ކުރުމަކީ މިތަހުގީގު މިނިވަން ކުރުމަށް އެޅިގެންދާ ބާރެއް ކަމަށް އަޅުގަނޑުމެން ދެކެން.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މިސަރުކާރާއެކު ހިޔާނާތުގެ ބޮޑެތި މައްސަލަތައް ފެންމަތިވަމުންދާތީ އެކަމަށް ވެސް މެންބަރު މީކާއިލް ވަނީ ފާޑު ވިދާޅުވެފައެވެ. އަދި ވިދާޅުވީ ބޮޑެތި ވައްކަންތައް ގައުމުގައި ހިނގާދާއިރު، ރައީސް މުއިއްޒަށް އެނގިވަޑައިނުގަންނަވާ ކަމަށްވާނަމަ، އިސްތިއުފާ ދެއްވަންޖެހޭ ކަމަށެވެ. އަދި ވިދާޅުވީ މިނިވަން މުއައްސަސާތަކަށް ރައީސް މުއިއްޒު ގެންނަވާ ބަދަލުތަކާއި ގުޅިގެން މިނިވަން ތަހުގީގެއް ކުރިއަށް ގެންދެވޭނެކަމާއި މެދު ގިނަ ރައްޔިތުން ސުވާލު އުފައްދާ ކަމަށެވެ.
އަޅުގަނޑުމެންގެ އެންމެ ބޮޑު ކަންބޮޑުވުމަކީ މިސަރުކާރުގެ ވައްކަމާއި، ހިޔާނާތުގެ ކަންކަން އާއްމުވެފައިވާ މިންވަރު އެނގޭތޯ. އައު ސަރުކާރަށް އަހަރެއްގެ ވެގެންދިޔައިރު އެމްއޭސީއެލްގެ ކުނީގެ ވައްކަން، އެފްއެސްއެމްގެ ތެލުގެ ވައްކަން، އެންސްޕާއާއި މުއިއްޒު ޓީވީގެ ވައްކަން އަދި މިހާރު އެންމެ ފަހަށް އެޗްޑީސީގެ ވައްކަން. މިހުރިހާ ކަމެއް ބަލަން ކަނޑައަޅާފައި ހުންނަ މުއައްސަސާތަކާ ދާދި ފަހުން ރައީސުލްޖުމްހޫރިއްޔާ ރައީސުލްޖުމްހޫރިއްޔާގެ ރައްޔިތުންގެ މަޖިލީހުގެ މެންބަރުން މެދުވެރިކޮށް އެގެންދަވަނީ ކުޅުއްވަމުން. އެތަންތަނަށް މީހުން އައްޔަން ކުރެވޭ ގޮތް ދާދިފަހުން ބަދަލުކުރެވިގެން ހިނގައްޖެ. އެހެންވީމަ އެ މުއައްސަސާތަކުން ވެސް މިކަންކަމަށް އެދެވޭ މިނިވަން ތަހުގީގެއް ކުރެވޭނެ ކަމަކަށް އަޅުގަނޑުމެންނަށް މިވަގުތު ގަބޫލެއް ނުކުރެވޭ.ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް
މެންބަރު މީކާއިލް ވިދާޅުވީ މިމައްސަލަ ދޫނުކުރާނެ ކަމަށާއި، ރައްޔިތުން ގަބޫލުކުރާފަދަ މިނިވަން ތަހުގީގެއް ކުރިއަށް ގެންދިއުމަށް އެމްޑީޕީން ބާރު އަޅާނެ ކަމަށެވެ.
