ސަރުކާރުން ޓެކްސީގެ ހިދުމަތް ދިނުމަށް ތައްޔާރުވަމުންދާތީ އެކަމާ ކަންބޮޑުވުން ފާޅުކޮށް މުޒާހަރާކޮށްގެން ހައްޔަރުކުރި ޓެކްސީ ޑްރައިވަރުންގެ ތެރެއިން މުހައްމަދު ޝާމީން އާއި އަހުމަދު ޝަބީން ދޫކޮށްލައިފިއެވެ.
ހުޅުމާލެއިން މާލެ އަންނަން އޮންނަ ހައިވޭ ސަރަހައްދުގައި މުޒާހަރާ ކުރި މައްސަލައިގައި ހައްޔަރުކުރި ޑްރައިވަރުންގެ ތެރެއިން ޝާމީން އާއި ޝަބީން ދޫކޮށްލީ ޝަރުތުތަކާއެކު އަންގާރަ ދުވަހު އެވެ.
އެގޮތުން ފުލުހުންނަށް އެއްބާރުލުން ދިނުމާ، މިކަހަލަ ހަރަކާތްތައް ނުހިންގުމަށާއި، ޤާނޫނާ ޚިލާފު އެއްވެސް ކަމެއް ނުކުރުމަށް ޝަރުތުކޮށް މި ދެ ޑްރައިވަރުން ދޫކޮށްލާފައިވަނީ 5 ދުވަހު ބަންދުގައި ބޭތިއްބުމަށްފަހު އެވެ. އެމީހުން ދޫކޮށްލާފައި މިވަނީ ބަންދުކޮށްފައިވާ މުއްދަތު ހަމަވުމުން، ބަންދުގެ މުއްދަތު ޖެހުމަށް ކްރިމިނަލް ކޯޓަށް ހާޒިރުކުމުންނެވެ. ފުލުހުން އެދުނީ 15 ދުވަހުގެ މުއްދަތެއް ޖެހުމަށެވެ.
ނަމަވެސް ވާކީލުން ބުނެފައިވަނީ، ބަންދުގައި ތިބި ޑްރައިވަރުންގެ ފަރާތުން މުޖުތަމަޢު އަށް ދެން ކުރިމަތިވަނީ ކޮށްގެއްލުމެއް ކާމާއި، އަދި ފުލުހުންގެ ބަޔާނަށް އެ ޑްރައިވަރުން ބާރުފޯރުވަނީ ކިހިނެއް ކަމެއް ފުލުހުންނަށް ބުނެ ނުދެވުނު ކަމަށެވެ.
މިދިޔަ ބުދަ ދުވަހު ހުޅުމާލޭގައި ކުރިއަށް ގެންދިޔަ އިހްތިޖާޖު އާ ގުޅިގެން ހައްޔަރު ކުރި ޑްރައިވަރުންގެ ތެރެއިން މިސްބާޙް ޝަރީފް ފިޔަވައި އެންމެން މިވަނީ ދޫކޮށްލާފައެވެ. ޑްރައިވަރސް އެސޯސިއޭޝަންގެ އިންތިޒާމް ސެކްރެޓަރީ ކަންވެސް ކުރައްވާ މިސްބާޙް ހައްޔަރުކޮށްފައިވަނީ ހުކުރު ދުވަހުގެ ރޭގެ ވަގުތެއްގައެވެ.
ހައްޔަރުކޮށްފައިވާ ޑްރައިވަރުންނާއި ޓޯކޮށްފައިވާ ޓެކްސީތައް ވަގުތުން ދޫކޮށްލަން ޓެކްސީ ޑްރައިވަރުންގެ ޖަމިއްޔާއިން ވެސް ވަނީ ގޮވާލާފައެވެ.
ޑްރައިވަރުން ހައްޔަރުކުރުމާއި ކާރުތައް ޓޯކުރުމަކީ މާލީ ގޮތުން ޑްރައިވަރުންނަށް ލިބޭ ބޮޑު ގެއްލުމެއް ކަމަށާއި އެއީ އަނިޔާވެރިކަން ކަމަށް އެ ޖަމިއްޔާއިން ވަނީ ބުނެފައެވެ.
މާލޭ ސަރަހައްދުގައި ޓެކްސީ ޑްރައިވަރުން އިހްތިޖާޖަށް ނުކުތީ ސަރުކާރުން ޓެކްސީގެ ޚިދުމަތާ ގުޅޭ ގޮތުން ގެންގުޅޭ ސިޔާސަތުތަކާ މެދު ހިތްހަަމަ ނުޖެހި، އެކަމުގެ ކަންބޮޑުވުންތައް ސަރުކާރުގެ ސަމާލު ކަމަށް ގެނައި ނަމަވެސް އެދެވޭ ހައްލެއް ނުލިބުމުންނެވެ.
