ރާއްޖެޓީވީ ހުއްޓުނަ ނުދިނުމަށްޓަކައި ބެލުންތެރިން މަސައްކަތް ކުރަންޖެހޭ ކަމަށް ކުރީގެ ހައުސިންގ މިނިސްޓަރު މުހައްމަދު އަސްލަމް ވިދާޅުވެއްޖެއެވެ.
ރާއްޖެޓީވީގެ 14 ވަނަ އަހަރީ ދުވަހުގެ ހަފްލާގައި ވާހަކަ ދައްކަވަމުން އަސްލަމް ވިދާޅުވީ ޒުވާން ޑިމޮކްރަސީއެއްގައި މިނިވަން މީޑިއާ އައުޓްލެޓް، ޓީވީ ސްޓޭޝަން އަދި ޕްރިންޓް މީޑިއާ ހުރުން އެއީ ވަރަށް މުހިންމު ކަންކަން ކަމަށެވެ. އާންމު ގޮތެއްގައި ރައްޔިތުންނަށް ދެފުށް ރަނގަޅަށް ސާފުކޮށްދެނީ މިނިވަން މީޑިއާއެއްގެ ތެރެއިން، ކަންކަމާއި ބަހުސްކޮށްގެން ކަމަށާއިި، ކަންކަން ރަނގަޅަށް ސާފުވެގެން ދަނީ މީޑިއާގެ ތެރެއިން ލާފައި ކަމަށް އަސްލަމް ވިދާޅުވިއެވެ.
އަސްލަމް ވިދާޅުވީ ޒުވާން ޑިމޮކްރަސީތަކަށް ދިމާވާ ބޮޑު މައްސަލައަކީ ވެރިކަމަށް އަންނަ ފަރާތްތަކުން މީޑިއާގެ ކޮންޓްރޯލް ނަގަން މަސައްކަތްކުރާތަން ފެނުން ކަމަށެވެ. ސަރުކާރުން މީޑިއާ ކޮންޓްރޯލް ނަގަން އުޅެނީ ރައްޔިތުންނާ ހަމައަށް މަޢުލޫމާތު ފޯރުކޮށްދިނުމުގައި އެބޭފުޅުން ބޭނުންވާ ކަންތައްތައް އެކަނި ވަކި ގޮތަކަށް ގެންދިއުމަށް ޓަކައި ކަމަށް އަސްލަމް ވިދާޅުވިއެވެ.
ދަތި ހާލުގައި ވެސް އެބަ ޖެހޭ މިނިވަން މީޑިއާ އައުޓްލެޓްސް ހުންނަން. ރާއްޖެޓީވީ މިއަދު މި އޮތީ އަޅުގަނޑުމެންގެ ތެރޭގައި ދިވެހިން އެންމެންވެސް އިތުބާރުކުރާ ޓީވީ ސްޓޭޝަނެއްގެ ގޮތުގައި އެސްޓެބްލިޝްވެ ނިމިފަ. އަޅުގަނޑަށް އެނގޭ ތިޔަބޭފުޅުންނަށް މިހާރު އާންމު ގޮތެއްގައި ޓީވީ ސްޓޭޝަންތަކަށް އާމްދަނީ ގޮތުގައި އެއްޗެއް މި ލިބެނީ ދައްކާލާ އިސްތިހާރަކުން ކަހަލަ އެއްޗަކުން. އިސްތިހާރު ވެސް މިހާރު ނުލިބޭނެ. އަޅުގަނޑު އަޑުއަހައިފިން އެކަކަށްވުރެ ގިނަ މީހުންގެ ފަރާތުން އަޑުއަހައިފިން، ބައެއް ބޭފުޅުންނަށް އެބަ ހުރި ގޮތްގޮތުން އިންޒާރު ދީފައި ރާއްޖެ ޓީވީއަށް އިސްތިހާރު ދެނީއޭ ކަންތައްތައް ހުއްޓުވަން ބޭނުންވޭ. ބޭނުންވަނީ ފިއްތުވަން. ބޭނުންވަނީ ހުއްޓުވާލަން. އެހެންވީމާ މިރޭ އަޅުގަނޑު ރާއްޖެ ޓީވީގެ ބެލުންތެރިންނަށް ކުރާނެ އާދޭހަކީ އިލްތިމާސަކީ ރާއްޖެޓީވީ ހުއްޓުނަ ނުދިނުމަށް ޓަކައި ތިޔަބޭފުޅުންނަށް ވެސް ކުރެވޭނެ ކަންކަން ބައިވަރު އެބަ ހުއްޓޭ. ޚާއްޞަ ގޮތެއްގައި ހަމަ މި ދެންނެވިހެން ޓީވީ ސްޓޭޝަނުން ތިޔަބޭފުޅުންނަށް ވެސް މީގެން ފައިދާއަށް ވާނެ ގޮތަކަށް އެކި ފެންވަރުގެ އެކި ވަރުވަރުގެ ވިޔަފާރިތައް އެބަހުރޭ އެކި އިސްތިހާރުތަކުގެ ތެރެއިން ގެނެސްދިނުން އެއީ ވަރަށް މުހިންމު ކަމެއް. އެހެންވީމާ އަޅުގަނޑު ހަމަ އާދައާއެކު ދަންނަވާނަން ރާއްޖެ ޓީވީ ބޭއްވުމަށް ޓަކައި ދިރި އޮތުމަށް ޓަކައި އެބަ ޖެހޭ. ތިޔަބޭފުޅުން ހަމައެކަނި ބައްލަވާނީކީ ނޫނީ ތިޔަބޭފުޅުން ކޮންޓްރިބިއުޝަން ވެސް މީގެ ތެރެއި ގެނައުން ވަރަށް މުހިންމު.ކުރީގެ ހައުސިންގ މިނިސްޓަރު މުހައްމަދު އަސްލަމް
އަސްލަމް ވިދާޅުވީ ރާއްޖެ ޓީވީގެ މުވައްޒަފުން ދަތި ހާލުގައި ކުޑަ މުސާރައިގައި ތިއްބެވީ ތަން ދެކެ ލޯބިވާތީއާއި މަސައްކަތް ދެކެ ލޯބިވާތީ ކަމަށެވެ. އަސްލަމް ވިދާޅުވީ ރައްޔިތުންނަށް ރަނގަޅަށް ކަންކަން މަޢުލޫމާތު ސާފުކޮށްދިނުމަށް ރާއްޖެޓީވީއިން ކުރައްވާ މަސައްކަތް ހެދި ބޮޑުވަމުން އަންނަ ޑިމޮކްރެސީ ދުޅަހެ ގޮތެއްގައި ބޮޑުވެ ތަސައްރަފު ފުރެންދެން އެ ގޮތުގައި ތިއްބެވުން އެއީ އޭނާ ދެއްވާނެ ހިތްވަރު ކަމަށެވެ.
