ބުރާސްފަތި ދުވަހު ހިނގި އަލިފާނުގެ ބޮޑު ހާދިސާގައި ގެއްލުންވި ސަރުކާރުގެ ތިން މިނިސްޓްރީގެ މަސައްކަތް ދަރުބާރުގެ އަށް ބަދަލު ކުރުމުގެ މަސައްކަތް ފަށައިފިއެވެ.
މާލޭގައި މި ފަހުގެ ތާރީޚެއްގައި ހިނގި އެންމެ ބޮޑު އެއް އަލިފާނުގެ ހާދިސާ ގައި އެންމެ ބޮޑަށް ގެއްލުން ލިބުނީ އަލިފާނުގެ ހާދިސާ ފެށުނު "ޓިނު ބިލްޑިން" އަށެވެ. އެ އިމާރާތް ވަނީ އަނދައިގެން ވެއްޓިފައެވެ.
އަލިފާނުގެ ހާދިސާގެ އަސަރު އެންމެ ބޮޑަށް ކުރި އިމާރާތުގައި ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ ވަނީ ހިނގަމުން އައިސްފައެވެ.
އޭގެ އިތުރުން އިމާރާތާއި އިންވެގެން ހުންނަ އެންވަޔަރަންމަންޓް މިނިސްޓްރީ ހިނގަމުން އަންނަ ގްރީން ބިލްޑިން އަށް އަލިފާން ގަނޑު ފެތުރި އެ އިމާރާތައްވެސް ވަނީ ގެއްލުން ލިބިފައެވެ.
އޭގެ އިތުރުން މާލޭ ސިޓީ ކައުންސިލުގެ ގޯތި ގެދޮރާއި ރަށްވެހި ކަމާ ބެހޭ ޚިދުމަތްތައް ދެމުން އަންނަ ސެކްޝަން ވެސް ހިނގަމުން އައިސްފައިވަނީ އަލިފާނުގެ ހާދިސާ ހިނގި ބްލޮކްގައެވެ. އެއިމާރާތައް ވެސް އަލިފާނުގެ އަސަރުކޮށްފައި ވުމާއެކު އިމާރާތުގައި ހުރި ލިޔެކިޔުންތައް ރައްކައުތެރި ތަނަކަށް ބަދަލު ކުރުމުގެ މަސައްކަތް ވަނީ ކޮށްފައެވެ.
މި ހާދިސާގެ ސަބަބުން ތިން ވުޒާރާގެ މަސައްކަތްތުގެ އިތުރުން ސިޓީ ކައުންސިލުގެ ބައެއް ޚިދުމަތްތައްވެސް ވަނީ ހުއްޓިފައެވެ.
ތިން މިނިސްޓްރީގެ މަސައްކަތްތައް ވަގުތީ އިންތިޒާމުގެ ދަށުން އަލުން ފެށޭނެ ތާރީޚެއް ސަރުކާރުން ހާމަކޮށްފައެއް ނުވެއެވެ.
