ޓެކްސީ ޑްރައިވަރުންގެ މައްޗަށް ކުށެއް ސާބިތުވާނެ ހެއްކެއް ނެތްކަން ފުލުހުންވެސް ޤަބޫލުކުރާ ކަމަށް ބުރާސްފަތި ދުވަހުގެރޭ މާލޭގައި ހިނގި ޓެކްސީ ޑްރައިވަރުންގެ މުޒާހަރާ އިން ހައްޔަރުކުރި ޑްރައިވަރުންގެ ވަކީލުންގެ ތެރޭގައި ހިމެނޭ އައިކު އަހުމަދު އީސާ ވިދާޅުވެއްޖެއެެވެ.
ބުރާސްފަތި ދުވަހުގެރޭ މާލޭގައި ހިނގި ޓެކްސީ ޑްރައިވަރުންގެ މުޒާހަރާ އިން ހައްޔަރު ކުރި 3 ޑްރައިވަރުންގެ ތެރެއިން 2 މީހުންގެ މުއްދަތު ކޯޓުން ވަނީ ޖަހާފައެވެ. އައިކު ވިދާޅުވީ ހައްޔަރު ކުރި ޑްރައިވަރުންނަށް ޖުމުލަ 7 ތުހުމަތެއް ކުރާ ކަމަށެވެ. އެ ތިން މީހުން ރަށުގެ އަމަން ނަގާލަން މަސައްކަތް ކުރި ކަމަށް ފުލުހުން ފާހަގަކޮށްފައިވާ ކަމަށް ވެސް އައިކު ވިދާޅުވިއެވެ. އެކަމާއި ގުޅިގެން ގިނަ ދުވަހަށް މުއްދަތު ޖަހަންޖެހޭ ސަބަބެއް ނެތް ކަމަށާއި އެ މީހުންނަކީ މުޖުތަމައު އަށް ނުރައްކަލެއް ކަމަށް ޤަބޫލުކުރަން ދަތި ކަމަށް އައިކު ވިދާޅުވިއެވެ. އެ މީހުންގެ މުއްދަތު ޖަހާދިނުމަށް އެދިފައި ވަނީ އާއްމުކޮށް މައްސަލަތަކުގައި ހެކި ނެތުމުން އެދޭ މާއްދާތަކުގެ ދަށުން ކަމަށް ފާހަގަކުރައްވާ އޭނާ ވަނީ އެއީ ފުލުހުން ވެސް މައްސަލައިގައި އެކަށީގެންވާ ހެކި ނެތްކަން ޤަބޫލުކުރާކަން ހާމަކޮށްދޭ ކަމެއް ކަމަށެވެ.
ސަރުކާރުގެ ސިޔާސަތުތަކުގެ ސަބަބުން ޓެކްސީ ޑްރައިވަރުން ދިރިއުޅެން ކުރާ މަސައްކަތްކައް ބޮޑެތި ގެއްލުންތަކެއް ލިބި ޒަމާނުއްސުރެ އަމިއްލަ ފަރާތްތަކުން ދޭ ޚިދުމަތެއްގެ ގޮތުގައި އޮތް ޓެކްސީ ޚިދުމަތުގެ ތެރެއަށް ސަރުކާރުން ވަންނަން އުޅޭތީ އެކަމާ ހިތްހަމަ ނުޖެހުން ޑްރައިވަރުން ފާހަގަ ކުރަމުންދާތާ އެތައް ދުވަހެއް ވަނީ ވެފައެވެ. ސަރުކާރުގެ ކަމާބެހޭ ފަރާތްތަކާއި ރައްޔިތުންގެ މަޖިލީހުގެ މެމްބަރުންނާ ޑްރައިވަރުންނާ ދިމާވާ މައްސަލަތަކާ މަޝްވަރާ ކޮށްގެން މިހާތަނަށް އެއްވެސް ކުރިއެރުމެއް ނުލިބޭ ކަމަށް ޑްރައިވަރުން ބުނެއެވެ. ބުރާސްފަތި ދުވަހު ޑްރައިވަރުންގެ މުއްދަތު ޖަހަން ގެންދިޔުމުން ކޯޓުގެ ވެއިޓިންގައި އޭރިއާގެ ތިބި ޑްރައިވަރުންގެ ޖަމިއްޔާގެ މަންދޫބުންނާއި ޑްރައިވަރުން ޕޮލިހުން އައިސް ވަނީ ފޮނުވާލާފައެވެ. ބަންދުގައި ބައިތިއްބަން ނިންމި ދެމީހުންނަށް ފަސް ދުވަހަށް މުއްދަތު ޖެހީ ހުޅުމާލޭ މެޖިސްޓްރޭޓް ކޯޓުންނެވެ. ބަންދުގެ މުއްދަތު ޖެހި ދެމީހުންނަކީ އަހްމަދު ޝަބީން އާއި މުހައްމަދު ޝާމިން އެވެ. އެ މައްސަލަ ހައިކޯޓުގައި އިސްތިއުނާފްކުރުމުގެ މަސައްކަތް ކުރަމުންދާ ކަމަށް އައިކު ވިދާޅުވިއެވެ. ފަސް ދުވަސް ހަމަވުމުގެ ކުރިން އެ މުއްދަތު އިސްތިއުނާފްކުރާނެ ކަމަށް އައިކު ވިދާޅުވިއެވެ.
އައިކުއަކީ ޝާމިންގެ ވަކީލެވެ. އެ ނޫސްވެރިންގެ ބައްދަލުވުމުގައި އައިކު ވަނީ ޝާމިންގެ މެސެޖެއް ހިއްސާކުރަށްވާފައެވެ. އެ މެސެޖުގައި ބުނެފައި ވަނީ ބޯކަނޑާލިޔަސް ބޯ ގުދު ނުކުރާނެ ކަމަށެވެ. ސަރުކާރު ޖަވާބުދާރީކުރުވުމަށް ކުރާ މަސައްކަތް ކުރިއަށް ގެންދިއުމަށް އޭނާ އެދިފައިވެއެވެ. އަދި އޭނާ ހުރީ ގަދަކޮށްކަމަށް ވަނީ ބުނެފައެވެ. އެ ނޫސްވެރިންގެ ބައްދަލުވުމުގައި ޓެކްސީޑްރައިވަރުން ވަނީ ނިމިދިޔަ ސަރުކާރު ވެރިކަމުގައި އޮތް އިރު ވެސް ޓެކްސީ ޑްރައިވަރުން އިހުތިޖާޖުކުރި ކަމަށާއި އޭރު ޓެކްސީ ޑްރައިވަރުން ހައްޔަރުކޮށް، ކާރުތައް ޓޯ ނުކުރާ ކަމަށް ބުނެފައެވެ. އެހެންކަމުން މި ސަރުކާރަކީ އަނިޔާވެރި ސަރުކާރެއް ކަމަށާއި ޓެކްސީ ޑްރައިވަރުންގެ ކެތްތެރިކަން ކޮޅުންލާފައިވާ ކަމަށް ޓެކްސީ ޑްރައިވަރުން ވަނީ ބުނެފައެވެ.
ބުދަ ދުވަހު ހަވީރުން ފެށިގެން ކުރިއަށް ގެންދިޔަ އިހްތިޖާޖުގެ ބައިވެރިން ވަނީ ޓްރާންސްޕޯޓް މިނިސްޓަރު އަމީން އަކީ އިތުބާރު ކުރެވޭ ފަރާތެއް ނޫން ކަމަށާއި އޭނާ އިސްތިއުފާ ދެއްވުމަށް ގޮވާލާފައެވެ. އިހްތިޖާޖު ކުރި ޑްރައިވަރުން ސަރުކާރުން ފަށަން އުޅޭ ޓެކްސީ ފްލީޓް ހުއްޓާލުމަށްވެސް ވަނީ ގޮވާލާފައެވެ. ޓެކްސީ ޑްރައިވަރުންގެ އިހްތިޖާޖުގައި ބައިވެރިވި ގިނަ ކާރުތައްވެސް ފުލުހުން ވަނީ ޓޯ ކޮށްފައެވެ.
