ޕީއެސްއެމްގެ ޗެނަލްތަކުން ޤުރުއާނުގެ އާޔަތްތަކަށް ބަދަލު ގެނެސްގެން ދައްކާތީ ރައްޔިތުންގެ މަޖިލީހަށް ކުއްލި މައްސަލައެއްގެ ގޮތުގައި އެ މައްސަލަ ހުށަހަޅައިފިއެވެ.

ރައްޔިތުންގެ މަޖިލީހުގެ ގަވާއިދުގެ 192 ވަނަ މާއްދާގެ ދަށުން، ކެންދޫ ދާއިރާގެ މެންބަރު މަޢުރޫފް ޛާކިރު ހުށަހަޅުއްވާފައިވާ ކުއްލި މައްސަލައިގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 70 ވަނަ މާއްދާގެ (ށ) ގެ 3 ވަނަ ނަންބަރުގައ،ި ވެރިކަން ހިންގުމުގެ ބާރުގެ ފަރާތުން ކުރާ ކަންތައްތައް ހިނގާނުހިނގާ ގޮތް ބެލުމާއި ވެރިކަން ހިންގުމުގެ ބާރު ޖަވާބުދާރީކުރުވުމާއި އަދި މިކަންކަން ކުރުމަށް ޓަކައި ޤާނޫނުއަސާސީ އާއި ޤާނޫނުގައިވާ ގޮތުގެމަތީން ފިޔަވަޅުތައް އެޅުމަށް ރައްޔިތުންގެ މަޖިލީހާ މަތިކޮށްފައިވާ ކަމަށެވެ.

އަދި ޕަބްލިކް ސަރވިސް މީޑިއާގެ ޤާނޫނުގެ 5 ވަނަ މާއްދާގައި، ޕަބްލިކް ސަރވިސް މީޑިއާގެ ސިޔާސަތު ތަކުގެ ގޮތުގައި ކަނޑައަޅައި ބަޔާންކޮށްފައިވާ ކަންކަމަށް ބަލާއިރު، ދީނީ، އިޤްތިޞާދީ، އިޖްތިމާޢީ، ސިޔާސީ އަދި މިނޫނަސް ޤައުމަށް ބޭނުންތެރި ހުރިހާ ދާއިރާއެއްގައި މަޢުލޫމާތު މުއްސަނދ،ި ހޭލުންތެރި ރައްޔިތެއް ބިނާކުރުމަށް މަސައްކަތްކުރުން ހިމެނޭ ކަމަށެވެ. އަދ،ި ދިވެހި ރައްޔިތުންނަށް މުހިންމުވާނެ ބައިނަލްއަޤްވާމީ އެކި ކަންކަމާއި، ޤައުމީ އެކި ކަންކަމުގެ ޚަބަރާއި، މަޢުލޫމާތާއި، ކަން ހިނގަމުންދާގޮތް ރައްޔިތުންނަށް އަންގައިދިނުމަކީ، ޕަބްލިކް ސަރވިސް މީޑިއާގެ މައްޗަށް ލާޒިމުކޮށްފައިވާ ކަންކަން ކަމުގައެވެ.

ކީރިތި ޤުރުއާނުގެ އާޔަތްތަކަށް ބަދަލުގެނެސްގެން، ޕަބްލިކް ސަރވިސް މީޑިއާގެ ޗެނަލްތަކުން ދައްކަމުން ދާކަން ފާހަގަކުރެވިފައި ވާތީ، އެ ކަމަކީ މާތްވެގެންވާ އިސްލާމް ދީނުގެ އެންމެ މަތިވެރި ފޮތް އަދި މާތް ރަސްކަލާންގެ ކަލާންފުޅަށް އިހާނެތިކޮށް ހިތައި، އެއަށް ގަސްތުގައި ބަދަލު ގެނެސް، އާޔަތްތަކުގެ މާނަ އޮޅުވައިލުމަށް ކުރަމުންދާ ނުރައްކާތެރި ކަމެއް ކަމަށް ކުއްލި މައްސަލައިގައި ބުނެފައިވެއެވެ.

އަދި ވަކިވަކި ފަރުދުންނަށާއި އެކި ޖަމާޢަތްތަކަށް ފުރުޞަތު ދިނުމުގައިވެސް ހަމަހަމަކަން ޤާއިމުކުރުމަކީ، މި ޤާނޫނުގެ 5 ވަނަ މާއްދާގެ (ކ) ގެ ދަށުން، ޕަބްލިކް ސަރވިސް މީޑިއާ އިން އަދާކުރަންޖެހޭ ޒިންމާއަކަށްވާއިރު، ދިވެހިރާއްޖޭގެ އިޤްތިޞާދީ، އިޖުތިމާއީ އަދި ސިޔާސީ ޙާލަތާ ގުޅޭގޮތުން ވާހަކަ ދެއްކުމަށާއި ދައުލަތުގެ މުހިންމު ސިޔާސަތުތަކާ ބެހޭގޮތުން ވާހަކަ ދެއްކުމަށް ސިޔާސީ ޕާޓީތަކަށް، ހަމަހަމަ ކަމާއެކު ފުރުޞަތު ދިނުން، ޕަބްލިކް ސަރވިސް މީޑިއާގެ މައްޗަށް ލާޒިމުވާކަމަށެވެ.

އަދި ޕަބްލިކް ސަރވިސް މީޑިއާގެ ޗެނަލްތަކުން ފުރުސަތު ދެމުންގެންދަނީ، ހަމައެކަނި ސަރުކާރުގެ ވެރިންނަށާއި، ސަރުކާރުގެ މުވައްޒަފުންނަށާއި ސަރުކާރަށް ތާއީދުކުރާ ފަރާތްތަކަށް އެކަނި ކަމަށެވެ. އަދި، ގަސްތުގައި ދޮގު ހަބަރު ފަތުރައި، ސިޔާސީ އިދިކޮޅު ފަރާތްތަކާއި ސަރުކާރާ ހިޔާލު ތަފާތުވާ އެންމެންނާ ގުޅޭ ގޮތުން ހަގީގަތާ ހިލާފު ވާހަކަތައް ފަތުރަމުންދާކަން ފާހަގަ ކުރެވިފައިވާ ކަމަށެވެ.

މި ފަދަ އެންމެހައި ކަންކަމަކީ ޕަބްލިކް ސަރވިސް މީޑިއާ އިން ކަނޑައެޅިގެން ޤާނޫނާ ހިލާފަށް ކުރަމުންދާ ކަންކަން ކަމަށާއި، އެ ކަންކަމަކ،ީ ރައްޔިތުންގެ ނުވަތަ ގައުމުގެ މަސްލަހަތައް ސީދާ އަސަރުކުރާ ފަދަ ބޮޑެތި ކަންކަން ކަމަށްވާތީ އެކަން ސަރުކާރުގެ ސަމާލުކަމަށް ގެނައުމުގެ ގޮތުން، ރައްޔިތުންގެ މަޖިލީހުގެ ގަވާއިދުގެ 192 ވަނަ މާއްދާގެ ދަށުން ކުއްލި މައްސަލަ ވަނީ ހުށަހަޅާފައެވެ.

ކުއްލި މައްސަލަ ބަލައިގަތުމަށް ވޯޓަށް އެހުމުން ވޯޓުގއި ބައިވެރިވެވަޑައިގެންނެވި މެންބަރުންގެ އަގުލަބިއްޔަތުން ވަނީ ކުއްލި މައްސަލަ ބަލައިގަތުމަށް ފާސްކޮށްފައެވެ. އެއީ 70 މެންބަރުންނެވެ.