މިސަރުކާރާއެކު ކުރިއަށް އޮތީ ބިރުވެރި، ނާމާން ދުވަސްތަކެއް ކަމަށާއި، މިކަމާއި ދެކޮޅަށް މިހާރުން މިހާރަށް މަސައްކަތް ނުކޮށްފިނަމަ އަނިޔާވެރި ދުވަސްތަކާއި ކުރިމަތިލާން ޖެހޭނެ ކަމަށް ކުރީގެ ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.
އަންގާރަ ދުވަހުގެ ރޭ ކާނިވާ ސަރަހައްދުގައި އެމްޑީޕީން ކުރިއަށް ގެންދާ ''ގާނޫނު އަސާސީގެ ދިފާއުގައި ރައްޔިތުންގެ'' ޖަލްސާގައި ރައީސް ސާލިހު ވިދާޅުވީ ރައީސް ޑރ.މުހައްމަދު މުއިއްޒު ވެރިކަމަށް ވަޑައިގަތުމަށް ވެވަޑައިގެންނެވި ވައުދުތައް ނުފުއްދާކަމުގެ ކަންބޮޑުވުން ރައްޔިތުންގެ އެބައޮތް ކަމަށާއި، މިސަރުކާރުން ހަދަމުންދަނީ ދޮގު ކަމަށެވެ.
ރައީސް ސާލިހު ވިދާޅުވީ ސަރުކާރުގެ ވެރިންނާ ދޭތެރޭގައި ރައްޔިތުންގެ އިތުބާރެއް ނެތް ކަމަށާއި، އަދިވެސް މަސައްކަތް ކުރަމުންދަނީ ކަންކަން ރައްޔިތުންނަށް އޮޅުވާލުމަށް ކަމަށެވެ. އަދި މިހާރު ވޯޓެއް ނަގައިފިނަމަ އެކަން އެނގޭނެ ކަމަށް އެމަނިކުފާނު ވިދާޅުވިއެވެ.
މީގެ އިތުރުން ރައީސް ސާލިހު ވިދާޅުވީ ގައުމުގައި މިހާރު ފެންނަމުންދާ ވިލާގަނޑު ވަރަށް ބަނަ ކަމަށާއި، ކުރިއަށް އޮތީ ބަނަ ދުވަސްތަކެއް ކަމަށެވެ. އަދި މިހާރުން މިހާރަށް ރައްޔިތުން ނުކުމެ މަސައްކަތް ނުކޮށްފިނަމަ އަނިޔާވެރިކަމާއި އަނެއްކާވެސް ކުރިމަތިލާން ޖެހޭނެ ކަމަށް ރައީސް ސާލިހު ވިދާޅުވިއެވެ.
އާދެ އަޅުގަނޑުމެންނަށް ފެންނަމުން މިދާ ވިލާގަނޑު އަޅުގަނޑުމެންނަށް ފެންނަނީ ވަރަށް ބަނަ ދުވަސްތަކެއް. ބިރުވެރި ދުވަސްތަކެއް. ނާމާން ދުވަސްތަކެއް. ދަތި އުދަނގޫ ދުވަސްތަކެއް. އަދި މިކަމާ ދޭތެރޭގައި މިހާރުން މިހާރަށް އަޅުގަނޑުމެން މަސައްކަތްތަކެއް ނުކޮށްފިނަމަ އަނިޔާވެރި ދުވަސްތަކަކާއި، އަޅުގަނޑުމެންނަށް އަނެއްކާ ވެސް ކުރިމަތިލާން ޖެހިދާނެކަން މިއަދު ވެސް ފެންނަމުން މިދަނީ. އަޅުގަނޑުމެން މިއަދު ކުރިން ވެސް ދެންނެވި ފަދައިން މިކަންތައްތަކާއި ދޭތެރޭގައި އިސްވެ ފިޔަވަޅުތަކެއް ނާޅާ ހިނދަކުދާދި އަވަހަށް އަޅުގަނޑުމެންނާ މިދެންނެވި ކަންތައްތައް ކުރިމަތިލާން ފަށާނެ. މިއަދު ވެސް އޭގެ އެތަށް ކަމެއް މިދަނީ ތަހައްމަލު ކުރަމުން.ކުރީގެ ރައީސް އިބްރާހިމް މުހައްމަދު ސާލިހު
ސަރުކާރެއް ރައްޔިތުން އިންތިޚާބު ކުރަނީ ކުރިއަށް ވުރެ ރަނގަޅު ހެޔޮ ބަދަލުތަކެއް ބޭނުންވާތީ ކަމަށާއި، ރައްޔިތުން ވޯޓުލަނީ އެބޭނުމުގައި ކަމަށެވެ. ނަމަވެސް މިސަރުކާރުގައި ދައްޗެއް އުދަނގުލެއް ދިމާނުވާ އެއްވެސް ރައްޔިތެއް ނެތް ކަމަށް އެމަނިކުފާނު ވިދާޅުވިއެވެ.
