ރެއާލް މެޑްރިޑަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ އަންނަނީ ކުރިއެރުންތަކެއް ހޯދަމުން ކަމަށާއި، އޭނާގެ އެންމެ މޮޅު ކުޅުން ފެންނާނެ ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
ޕެރިސް ސެއިންޓް ޖާމަން (ޕީއެސްޖީ) ދޫކޮށްލުމަށްފަހު ރެއާލަށް ބަދަލުވީ ފަހުން އެމްބާޕޭ އަށް އެ ކުލަބުގައި އެންމެ އެކަށީގެންވާ ކުޅުމެއް ނުދެއްކޭތީ، ދޭތެރެ އަކުން އޭނާ އަށް އަންނަނީ ފާޑު ކިޔުންތައް އަމާޒުވަމުންނެވެ. ނަމަވެސް، އެއިން ކޮންމެ ފަހަރަކު ވެސް އެމްބާޕޭގެ ދިފާއުގައި އަންޗެލޮޓީ ވާހަކަ ދައްކަ އެވެ.
ޔުއެފާ ޗެމްޕިއަންސް ލީގުގައި ރެއާލް އިން އެޓަލަންޓާއާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުން އަންޗެލޮޓީ ބުނީ، އެމްބާޕޭ ހުރީ ވަރަށް ރަނގަޅަށް ކަމަށާއި އޭނާ އަންނަނީ ކުރިއެރުންތަކެއް ހޯދަމުން ކަމަށެވެ. އެމްބާޕޭ އަށް ވަގުތު ބޭނުންވާ ކަމަށާއި، އެމްބާޕޭ އަށް އިތުބާރު ހޯދުމަށް ބޭނުންވާ ފުރުސަތު ދެމުން އަންނަ ކަމަށް ވެސް އަންޗެލޮޓީ ބުންޏެވެ. ޚާއްސަކޮށް އެންމެ ފަހުން ރެއާލް އިން ކުޅުނު ދެ މެޗަށް ބަލާއިރު، އެމްބާޕޭގެ ކުޅުން ވަރަށް ރަނގަޅު ކަމަށް އަންޗެލޮޓީ ވަނީ ފާހަގަ ކޮށްފަ އެވެ.
އެކަމާ ގުޅޭ ގޮތުން ވާހަކަ ދައްކަމުން އެމްބާޕޭ ބުނެފައި ވަނީ ރެއާލްގައި އޭނާގެ ފެށުން އެންމެ ރަނގަޅު ނޫން ނަމަވެސް، ރެއާލް އިން ކުރިއަށް ދާން މަސައްކަތް ކުރަމުން އަންނަ ކަމަށެވެ. ޚާއްސަކޮށް ރެއާލް އާއެކު ތަށިތަކެއް ކާމިޔާބު ކުރުމުގެ އުންމީދުގައި ހުރިކަން ފާހަގަކޮށް އަންޗެލޮޓީ ބުނީ، އެންމެ މުހިންމު ވަގުތަކީ ސީޒަންގެ ދެ ވަނަ ބައި ކަމަށެވެ.
ރެއާލަށް ބަދަލުވީ ފަހުން އެމްބާޕޭ ވަނީ މިހާތަނަށް އެ ކުލަބަށް ކުޅެދިން 21 މެޗުގައި 11 ލަނޑު ޖަހައިފަ އެވެ. އޭގެ ތެރެއިން ނުވަ ލަނޑަކީ ސްޕެނިޝް ލީގުގައި އޭނާ ޖަހާފައިވާ ލަނޑުތަކެވެ.
