ރައީސުލްޖުމްހޫރިއްޔާ ޑރ.މުހައްމަދު މުއިއްޒަކީ އެންމެ ގާތް މީހުންނަށް ވެސް އަނިޔާވެރިވެފައިވާ ބޭފުޅެއް ކަމަށާއި، ރައްޔިތުންނަށް އަނިޔާވެރިނުވާނެ ކަމަށް ވިސްނައިގެން ނުވާނެ ކަމަށް މަޝްހޫރު ގާނޫނީ ވަކީލު އާދަމް އާސިފް ވިދާޅުވެއްޖެއެވެ.
ގާނޫނު އަސާސީން ލިބިދޭ ހައްގުތައް ފުނޑާލަމުންދާތީ އެކަމާއި ދެކޮޅަށް އަޑު އުފުލުމަށް 10 ޑިސެމްބަރު ވާ އަންގާރަ ދުވަހު ކާނިވާ ސަރަހައްދުގައި އެއްވުމެއް ބޭއްވުމަށް އެމްޑީޕީން ދަނީ މަސައްކަތްކުރަމުންނެވެ.
ރާއްޖެޓީވީގެ ގާނޫނު އަސާސީގެ ދިފާއުގައި ކަވަރޭޖްގައި ވަކީލު އާސިފް ވިދާޅުވީ ރައީސް މުއިއްޒަކީ އެންމެ ގާތް ބޭފުޅުންނަށް ވެސް އަނިޔާވެރިވެފައިވާ ބޭފުޅެއް ކަމަށާއި، ކުރީގެ ރައީސް އަބްދުﷲ ޔާމީންގެ ފޮޓޯފުޅާއި، ނަންފުޅު އަދި ހުސްގޮނޑިކޮޅު ދައްކައިގެން ވެރިކަމަށް ވަޑައިގަންނަވައި، ޔާމީނަށް ވެސް އަނިޔާވެރިވެފައިވާ ކަމަށެވެ.
ކުރެފައިވާ ތަޖުރިބާއަށް އިޝާރާތް ކުރައްވައި އާސިފް ވިދާޅުވީ ރައީސް މުއިއްޒު ރައްޔިތުންނަށް އަނިޔާވެރިނުވާނެ ކަމަށް އުންމީދުކޮށް، ވިސްނައިގެން ނުވާނެ ކަމަށާއި، އެމަނިކުފާނު އަނިޔާވެރިވާނެ ކަމަށެވެ. އަދި ވިދާޅުވީ ރައީސް މުއިއްޒުގެ ވެރިކަން ފެށުނީ ދޮގަކުން ކަމަށާއި، ދޮގު ނުހަދާނެ ކަމަށް އުންމީދު ކޮށްގެން ނުވާނެ ކަމަށެވެ. ރައީސް މުއިއްޒުގެ ދޮގުތައް މިހާރު ރައްޔިތުންނަށް ހާމަވަމުންދާ ކަމަށާއި، ރައީސް މުއިއްޒު ވައުދުފުޅު ފޮތަކީ ވެސް ދޮގު ފޮތެއް ކަމަށް އޭނާ ވިދާޅުވިއެވެ.
އެންމެ ގާތުން މަސައްކަތް ކުރި މީހުންނަށް އަނިޔާވެރިވާ މީހަކު. އަދި ތި ވިދާޅުވާހެން ރައީސް ޔާމީންގެ ފޮޓޯފުޅާއި، ނަންފުޅާ ހުސްގޮނޑި ބޭނުންކުރައްވައިގެން ވެރިކަން މިހޯދީ. ވެރިކަން ހޯދައިގެން އެންމެ ފުރަތަމަ ގެއަށް ވަޑައިގެންނެވި، އޮކްޓޫބަރު 1ގައި ގެއަށް ވަޑައިގެންނެވި ދެވަނަ ދުވަހު އެދުވަހުން ފެށިގެން ޑރ.މުއިއްޒު ރައީސް ޔާމީނަށް އުރެދިއްޖެ. އުރެދި އަނިޔާވެރިވާން ފަށައިފި ފާޅުގައި. ދެން އޭގެ ކުރިން ސިއްރުގައި އޭނާ ކުރި ކަންކަން މިހާރު އެހުރީ ފެންނަން. އެހެންވީމަ މުއިއްޒު ދިވެހި ރައްޔިތުންނަށް އަނިޔާވެރި ނުވާނެ ކަމަށް އެއްވެސް ބަޔަކު ވިސްނައިގެން ނުވާނެ.މަޝްހޫރު ގާނޫނީ ވަކީލު އާދަމް އާސިފް
އާސިފް ވިދާޅުވީ ކުރިއަށް އޮތްތަނުގައި ރައީސް މުއިއްޒު ރައްޔިތުންގެ ހައްގުތައް ނިގުޅައި ގަންނާނެ ކަމަށާއި، ގާނޫނު އަސާސީން ހައްގުތައް ހަނިކުރާނެ ކަމަށެވެ. އަދި މިހާރު މިސަރުކާރުގެ ހުދުމުހުތާރުކަން ފެންނަމުންދާއިރު، އަމާޒު ހިފާފައިވަނީ ސީދާ ރަސްކަމާ ދިމާލަށް ދިއުމަށް ކަމަށް އޭނާ ވިދާޅުވިއެވެ.
