ޚިދުމަތްކުރުމުގައި ތަފާތު ކުރުމެއް ނުގެންގުޅޭ ކަމަށާއި ސިޔާސީ ވިސްނުމެއްވެސް ނުގެންގުޅުއްވާކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.
އއ.ތޮއްޑޫ އަށް ކުރެއްވި ދަތުރުފުޅުގައި އާޢްމުންނާއި މުޚާތަބުކުރައްވާ ވާހަކަދައްކަވަމުން، އެ މަނިކުފާނު ޤަބޫލުކުރައްވާ ހަމައަކީ ރައްޔިތުންނާއި ގާތުން ޚިދުމަތް ދިނުން ކަމަށް ރައީސް ފާހަގަކުރެއްވިއެވެ. އަދި ރައީސް ވަނީ މަސައްކަތް ކުރައްވަނި ރައްޔިތުން އިންތިޚާބުކޮށްފައިވާ މަންދޫބުންގެ ކައިރިއަށް ގޮސްގެން ރައްޔިތުން ބޭނުންވާ ކަންކަން އޮޅުންފިލުވުމަށް ކަމަށް ވިދާޅުވެފައެވެ. ރައީސް ވިދާޅުވީ ކައުންސިލްތައް އެމަނިކުފާނުގެ އަރިހަށް ގެނައުމުގެ ބަދަލުގައި ކައުންސިލްތަކާއި ބައްދަލުކުރުމަށް އަމިއްލަފުޅަށް ވަޑައިގަންނަވަން އެ މަނިކުފާނު ބޭނުންފުޅުވާ ކަމަށެވެ. މީގެ އިތުރުން ތޮއްޑޫ އާއި މެދު ވާހަކަދައްކަވަމުން ރައީސް ވަނީ އެ ރަށުގެ ރައްޔިތުންނަކީ ވަރަށް މުރާލިބައެއް ކަމަށް ފާހަގަކުރައްވާފައެވެ. އެ ރަށަކީ ރަށު ރައްޔިތުން ރަށުގައި ޤާއިމްވެ ތިބެ ދަނޑުވެރިކަމާއި، ލޯކަލް ޓުއަރިޒަމް ކުރިއަރުވަމުންދާ ތަނެއް ކަމަށް އެ މަނިކުފާނު ވިދާޅުވިއެވެ. އެގޮތުން އެ ރަށުގައި ކައުންސިލްގެ ފަރާތުން ކުންފުންޏެއް އުފައްދާފައިވާ ކަމަށާއި އެއީ އެފަދަ ފުރަތަމަ ލޯކަލް އޮތޯރިޓީ ކުންފުނިކަމަށް އެ މަނިކުފާނު ވަނީ ފާހަގަކުރައްވާފައެވެ. މާލެ ސިޓީ މޭޔަރކަމުގައި ހުންނެވި އިރު އެފަދަ ކުންފުންޏެއް މާލޭސިޓީގައި ވެސް ޤާއިމްކުރުމަށް މަސައްކަތްކުރެއްވި ކަމަށާއި އެކަމަށް ކުރީގެ ސަރުކާރުން ފުރުސަތު ނުދިނީ ކަމަށް ރައީސް މުއިއްޒު ވިދާޅުވިއެވެ.
ސިޔާސީ ވިސްނުމެއްގައި އެކަމަށް އަޅުގަނޑަށް ފުރުސަތު ނުދިނީ އޭރުގެ ސަރުކާރުން. އަޅުގަނޑު އެގޮތަށް ކަންކަން ނުކުރާނަން. އެ ކުންފުންޏަށް ކަންކަން ފޯރުކޮށްދޭނަން. އެެއީ އިންވެސްޓްމެންޓްކަމަށް ވިޔަސް އެއްބާރުލުން ދޭނަން. އަދި ކެޕިޓަލް ބިލްޑްކުރުމަށް ވެސް އެހީތެރިވެދޭނަން.ރައީސް ޑރ.މުހައްމަދު މުއިއްޒު
ރައީސް މުއިއްޒު ވަނީ ތޮއްޑޫގެ ތަރައްޤީގެ މަސައްކަތްތަކަށް އަލިއަޅުވާލައްވާފައެވެ. އެގޮތުން އެ ރަށުގެ ތަރައްޤީ ކުރިއަށްގެންދާނީ ރައްޔިތުން ބޭނުންވާ ކޮންސެޕްޓެއްގައި ކަމަށް އެ މަނިކުފާނު ވިދާޅުވިއެވެ. އެގޮތުން ފެނާއި ނަރުދަމާ އާއި މަގުހެދުމަށް އިސްކަންދެއްވާނެ ކަމަށް ވަނީ ވިދާޅުވެފައެވެ. ހަމައެހެންމެ އަންނަ އަހަރު ތޮއްޑޫގެ މަގު ހެދުމުގެ މަޝްރޫޢު ކުރިއަށް ދާނެ ކަމަށާއި އެކަމުގެ ސަބަބުން ވަަރަށް ގިނަ ފަސޭހަތަކެއް ވެގެންދާނެ ކަމަށް ރައީސް މުއިއްޒު ވަނީ ވިދާޅުވެފައެވެ. މީގެ އިތުރުން ސިއްޙީމަރުކަޒުގެ ޚިދުމަތް ފުޅާކުރުމަށް ވެސް އަންނަ އަހަރުގެ ބަޖެޓްގެ ތެރެއިން މަސައްކަތްކުރާނެކަމުގެ ޔަޤީންކަން އެމަނިކުފާނު ވަނީ ދެއްވާފައެވެ. ހަމައެހެންމެ ސްކޫލަށް ބޭނުންވާ ކްލާސްރޫމާއި ވަސީލަތްތައް ވެސް އަންނަ އަހަރު ޤާއިމްކުރައްވާނެ ކަަމަށް ރައީސް ވިދާޅުވިއެވެ. 2024 ވަނަ އަހަރު ކަންކަން ނުވީ ކުރީ ސަރުކާރުގެ މެޖޯރިޓީ އޮތް 19 ވަނަ މަޖިލީހުން ފާސްކުރި ބަޖެޓްގެ ސަބަބުން ކަމަށް ރައީސް ވަނީ ވިދާޅުވެފައެވެ.
ޕީއެންސީގެ މެމްބަރުން މަޖިލީހަށް ހޮވި ނަމަވެސް ކުރިން އޮތް މަޖިލީހުން މި އަހަރުގެ ބަޖެޓް ފާސްކޮށްދިނީ އަޅުގަނޑުމެން ބޭނުންވި އެއްވެސް ކަމަކަށް ރިއާޔަތް ނުކޮށް. އެ ބަޖެޓުގައި މިއޮތީ މަޝްރޫޢުތައް ނުހިންގޭ ގޮތަށް. އެ ހަގީގަތް ބަދަލެއް ނުވޭ. ސިޔާސީ ވިސްނުމެއްގަ މި ސަރުކާރަށް އުނދަނގޫކުރުމަށް އޭރުގެ މަޖިލީހުން ފާސްކުރި ބަޖެޓް މި ނިމުނީ. ދެން އަންނަ އަހަރު ބަޖެޓުން ރައްޔިތުންނަށް ވެފައި ހުރި ވައުދުތައް ފުއްދޭނެ.ރައީސް ޑރ.މުހައްމަދު މުއިއްޒު
ރައީސް މިހެން ވިދާޅުވި ނަމަވެސް ބަޖެޓް އެކުލަވާލީ އިންތިޚާބީ ސަރުކާރުން ބޭނުންވި ކަންކަން ހިމަނަައިގެންނެވެ. އަދި ބަޖެޓުގައި މައްސަލަތަކެއް ހުރިކަމަށް މި ސަރުކާރުން ބުނަން ފެށީ ކަންކަން ނުވެގެން އާއްމުންގެ ފާޑުކިޔުން އަމާޒުކުރަން ފެށި ހިސާބުންނެވެ.
