ޕަބްލިކް ސާވިސް މީޑިއާ (ޕީއެސްއެމް)ގެ މެނޭޖިންގ ޑިރެކްޓަރުކަމުގެ މަގާމަށް އައްޔަން ކުރިތާ ފަސް މަސް ފުރިހަމަ ނުވަނީސް އެ މަޤާމުން މުހައްމަދު ސައީދު އިސްތިއުފާދެއްވައިފިއެވެ.
ރާއްޖެއެމްވީ އަށް އިތުބާރު ހުރި ގޮތަކަށް އެނގިފައިވާ ގޮތުގައި ސަޢީދު އިސްތިއުފާ ދެއްވީ ސަރުކާރުގެ ޕްރެޝަރ ބޮޑުވެގެންނެވެ.
އިތުރު މައުލޫމާތު ސާފުކުރުމަށް ރާއްޖެއެމްވީ ސައީދަށް ގުޅި ނަމަވެސް ފޯނަށް ޖަވާބު ނުދެއްވާތީ އެކަން ވަނީ ސާފުވާ ގޮތް ނުވެފައެވެ.
ސަޢީދު ޕީއެސްއެމްގެ އެމްޑީގެ މަޤާމަށް އައްޔަނުކޮށްފައި ވަނީ ޕީއެސްއެމްގެ ކުރީގެ އެމްޑީ ޒީނާ ޒާހިރު، ކުއްލި ގޮތަކަށް އިސްތިއުފާދެއްވުމާ ގުޅިގެން 24 އޮގަސްޓް 2024 ގައެވެ.
މުޙައްމަދު ސައީދަކީ އިނގިރޭސިވިލާތުގެ ޔުނިވަރސިޓީ އޮފް ބޯލްޓަންއިން ބިޒްނަސް އެޑްމިނިސްޓްރޭޝަންގެ ދާއިރާއިން މާސްޓަރސް ޑިގްރީ ހާސިލްކުރައްވާފައިވާ ފަރާތެކެވެ. އަދި މީޑިއާގެ ދާއިރާއިންވެސް އޭނާ ތައުލީމު ހާސިލްކޮށްފައިވެއެވެ.
މީގެ ކުރިން މުޙައްމަދު ސައީދު ވަނީ، އެޑިއުކޭޝަން މިނިސްޓްރީގެ ޕަރމަނަންޓް ސެކްޓްރީކަމާއި ޑިރެކްޓަރ ޖެނެރަލްގެ މަޤާމުގެ އިތުރުން ތައުލީމީ ދާއިރާގެ އެކިއެކި މަޤާމުތައް ފުރުއްވާފައެވެ.
