ދުންފަތް ކޮންޓްރޯލް ކުރުމުގެ މަސައްކަތްތައް ކުރުމަށް ކައުންސިލްތަކަށް މާލީ އެހީތެރިކަން ފޯރުކޮށްދޭނެ ކަމަށް ހެލްތް މިނިސްޓަރު އަހުމަދު ނާޒިމް ވިދާޅުވެއްޖެއެވެ.
ދުންފަތް ކޮންޓްރޯލް ކުރުމަށް ކުރަމުންދާ މަސައްކަތްތާކާ ގުޅޭގޮތުން މައުލޫމާތު ދިނުމަށް ހެލްތް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ނާޒިމް ވިދާޅުވީ ކައުންސިލްތަކުން އިސްނަގައިގެން ރަށުފެންވަރުގައި އަދި އަތޮޅު ފެންވަރުގައި ދުންފަތް ކޮންޓްރޯލް ކުރުމަށް ހިންގާ މަސައްކަތުގައި އެހީތެރިވުމަށް ނިންމާފައިވާ ކަމަށާއި، މިކަމާއި ގުޅިގެން ކުރަންޖެހޭ އެންމެހާ މަސައްކަތް ވީހާވެސް ރޭވުންތެރިކަމާއި އެކު ކުރަމުން އަންނަކަމަށެވެ. މިއީ ދުންފަތް ކޮންޓްރޯލް ކޮށް މުޖުމައުގެ ބައިވެރިވުން އިތުރުކުރުމަށް ހިތްވަރު ދިނުމަށް ނިންމަފައިވާ ނިންމުމެއް ކަމަށް މިނިސްޓަރު ނާޒިމް ވިދާޅުވިއެވެ.
މިނިސްޓަރު ނާޒިމް ވިދާޅުވީ މި މަސައްކަތުގެ އެންމެ އެދެވޭ ނަތީޖާ ލިބޭނެ އަދި ދެމެހެއްޓެނިވި ގޮތެއްގައި ކުރިއަށް ގެންދިއުމަށް 5 އަހަރުގެ ޕްލޭން އެއް އެކުލަވާލުމުގެ މަސައްކަތް ކުރަމުންދާ ކަމަށެވެ. އެގޮތުން ދުންފަތް ކޮންޓްރޯލް ކުރުމަށް ރަށުފެންވަރުގައި އެންމެ ރަނަގަޅު މަސައްކަތަތަށް ކުރާ ކައުންސިލްތަކަށް އެދާއިރާގެ ތަރައްގީއަށް ކުރާ މަސައްކަތްތަކަށް މާލީ އެހީތެރިކަން ފޯރުކޮށްދިނުމަށް މި ޕްލޭންގައި ހިމަނާފައިވާ ކަމަށް މިނިސްޓަރު ނާޒިމް ވިދާޅުވިއެވެ.
މީގެ އިތުރުން މިނިސްޓަރު ނާޒިމް ވިދާޅުވީ ދުންފަތް ކޮންޓްރޯލް ކުރުމަށް ކުރަމުންދާ މަސައްކަތްތަކުގައި ގާނޫނު ތަންފީޒު ކުރުމަށް ގޮންޖެހުންތައް ކުރިމަތިވާ ކަމަށެވެ. އާއްމުވެ އުޅޭތަންތަނުގައި ދުންފަތުގެ އިސްތިއުމާލު ކުރާނަމަ 500 ރުފިޔާއިން ޖޫރިމަނާ ކުރާ އުސޫލު ވެސް ތަންފީޒު ނުކުރެވޭކަން ފާހަގަކުރައްވައި މިނިސްޓަރު ނާޒިމް ވިދާޅުވީ މިފަދަ އިޖްތިމާއީ ބޮޑެތި މައްސަލަތަކުގައި ހައްލު ލިބޭނީ ތަންފީޒީ އިދާރާތައް ގުޅިގެން މަސައްކަތްކޮށް، އެމަސައްކަތްތަކަށް އާއްމު ރައްޔިތުންގެ ފުރިހަމަ އެއްބާރުލުން ލިބިގެން ކަމަށެވެ. އަދި ކުރިއަށް އޮތްތަނުގައި އެ އަމާޒުގައި މަސައްކަތް ކުރެވޭނެ ކަމަށް އުންމީދު ކުރާ ކަމަށް މިނިސްޓަރު ނާޒިމް ވިދާޅުވިއެވެ.
މިފަދަ ކޮންމެ ކަމެއްގައި ތަންފީޒު ކުރުމަށް ގޮންޖެހުންތަކެއް ހުރޭ އެނގޭތޯ. އެއީ އަޅުގަނޑުމެން އެންމެ ފުރަތަމަ މިކަންތައް ތަންފީޒު ކުރުމަށް އެދޭ މުއައްސަސާއެއްގެ އިތުރުން ވަރަށް ބޮޑަށް ކަންބޮޑުވާ ވެސް ކަމެއް އެނގޭތޯ. އަޅުގަނޑުމެންގެ މުޖުތަމައުގައި މިހެން ހުރި ސޯޝަލް މައްސަލަތަކުގައި ހެލްތާ ގުޅޭ ނޫން ކަންތަކުގައި އެހެން ކަންތައްތަކުގައި ވެސް ގާނޫނު ތަންފީޒުކުރުމުގައި ހުރި ގޮންޖެހުންތަކުގެ ވާހަކައަކީ އަޅުގަނޑުމެން އެންމެން ދައްކާ ވާހަކައެއް. ނަމަވެސް މިމަސައްކަތާއެކު އަޅުގަނޑު ގަބޫލުކުރަނީ ސީދާ ރައީސް އިސްނެންގެވުމުމާއެކު ތަންފީޒު ކުރެވެމުންދާ މަސައްކަތަކަށްވުމާއެކު މާބާރު ގިޔަރެއްގައި މާބާރު ސްޕީޑެއްގައި އިރާދަކުރެއްވިއްޔާ ތަންފީޒީ މަރުހަލާގައި އެހީތެރިކަން މިކަމުގައި ލިބޭނެ ކަމަށް. މިފަދަ އެންމެ ކަމެއް އެންމެ ސެކްޓަރއެއް ގުޅިގެން އަޅުގަނޑުމެންނަށް ހާސިލްނުވާނެކަން އެއީ އެނގޭނެ ކަމެއް. ކަށަވަރުވާ ކަމެއް. މީގައި ތަންފީޒީ އިދާރާތަކާއި އާއްމު މުޖުތަމައުގެ އެއްބާރުލުމާއި ކޮންމެ ފަރުދަކީމެ އެހީތެރިކަންހުރި ވިސްނުން މުޅި މުޖުތަމައުއަށް ގެންނަން އެބަޖެހޭ. އެހެންވީމަ އަޅުގަނޑު އުންމީދުކުރަނީ ތަންފީޒު ކުރުމުގެ ކަންތައްތައް މާރަނގަޅަށް އަޅުގަނޑުމެން އެންމެން ގުޅިގެން ކުރިއަށް ގެންދެވޭނެ ކަމަށް. މިކަމާ ގުޅިގެން އެހެން މުއައްސަސާތަކާ ގުޅިގެން.ހެލްތް މިނިސްޓަރު އަހުމަދު ނާޒިމް
ދުންފަތް ކޮންޓްރޯލް ކުރުމަށް 5 އަހަރުގެ ޕްލޭނެއް އެކުލަވާލުމުގެ މަސައްކަތް ފަށާފައިވާއިރު، 'ދަފަރާ' ގެ ނަމުގައި ދުންފަތާ ދެކޮޅު ޚާއްސަ ކެމްއިނެއް ވަނީ ފަށާފައެވެ. މި ކެމްޕެއިން މިހާތަނަށް ނ، ތ، ލ، އަދި ސ އަތޮޅުގައި ވަނީ ކުރިއަށް ގެންގޮސްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފައިވެއެވެ.
