މިސަރުކާރުން ރައްޔިތުންނަށް އިހުތިރާމް ނުކުރާ ކަމަށާއި، ނެތް ބާރެއް ބޭނުންކޮށް މުޅި ރިޔާސީ ނިޒާމު ހަލާކުކޮށްލުމަށް މަސައްކަތް ކުރާ ކަަމަށް އެމްޑީޕީގެ ގަލޮޅު އުތުރު ދާއިރާގެ ރައީސް މާރިޔާ އަހުމަދު ދީދީ ވިދާޅުވެއްޖެ އެވެ.

ގާނޫނު އަސާސީގެ ދިފާއުގައި ކުރިއަށް ގެންދާ ޕްރޮގްރާމްގައި މާރިޔާ ވިދާޅުވީ މިސަރުކާރު މިހާރު މިދަނީ ވަރަށް ބޮޑަށް އަނިޔާވެރިކަމާ ދިމާލަށް ކަމަށާއި، ރައްޔިތުންގެ ބާރު ކެނޑޭގޮތަށް ގާނޫނު އަސާސީ ބަދަލުކޮށްފައިވަނީ އެއަނިޔާވެރިކަން ގެނައުމަށް ކަމަށެވެ. ރައްޔިތުން އިންތިޚާބު ކުރާ މަގާމަކުން މީހަކު ވަކި ނުކުރެވޭނެ ކަމަށާއި، އެކަން ކުރެވޭނީ ރައްޔިތުންނަށް ކަމަށް މާރިޔާ ވިދާޅުވިއެވެ.

ޕީޕީއެމް/ޕީއެންސީގެ ފިކުރަށް އިޝާރާތް ކުރައްވައި މާރިޔާ ވިދާޅުވީ އަބަދުވެސް އެބޭފުޅުންނަށް ވެރިކަން ލިބުމުން ގާނޫނު އަސާސީއަށް ބެލުމެއް ނެތި މަސައްކަތް ކުރާ ކަމަށާއި، ބާރެއް ލިބިއްޖެ ކަމަށްވާނަމަ އިންތިހާއަށް އެބާރުގެ ބޭނުން ހިފައި، ނަހަމަ ގޮތުގައި ބާރުގެ ބޭނުންކުރާ ކަމަށެވެ. މާރިޔާ ވިދާޅުވީ މިސަރުކާރަކީ ވެސް ޕީއެންސީގެ ރައްޔިތުން މަޖިލީހުގެ މެންބަރުންނަކީ ވެސް ރައްޔިތުންނަށް އިހުތިރާމް ކުރާ ބައެއް ނޫން ކަމަށެވެ. އަދި ވިދާޅުވީ މިހާރު މަސައްކަތް ކުރަނީ ރިޔާސީ ނިޒާމު އެއްކޮށް ހަލާކު ކޮށްލުމުގެ މަސައްކަތް ކަމަށާއި، އެކަމާ ދެކޮޅަށް ރައްޔިތުން ނުކުންނަންޖެހޭ ކަމަށެވެ.

19 ވަނަ ރައްޔިތުންގެ މަޖިލީހުން އެންޓި ޑިފެކްޝަން ގާނޫނެއް ހެދުމުގެ މަސައްކަތް ކުރިކަން ފާހަގަކުރައްވައި މާރިޔާ ވިދާޅުވީ އެކަމާއި ގުޅުންހުރި ވަރަށް ގިނަ ދިރާސާތައް ހަދާފައިވާ ކަމަށާއި، މި ނިޒާމުގެ ތެރެއިން އެކަން ކުރެވޭނެ ޖާގައެއް ނެތް ކަމަށެވެ. އަދި އިސްތިއުފާ ދޭންޖެހޭ ގޮތަށް ނުވަތަ ރީކޯލްއަކަށް ދާ ގޮތަށް އިހުތިޔާރަށް ދޫކޮށްލައި، ބިލެއް ގެނައީ ނިޒާމު ހަލާކުކޮށްލަން ބޭނުންނުވާތީ ކަމަށް މާރިޔާ ވިދާޅުވިއެވެ.