މައުލޫމާތު ހޯދުމަށް ސްކޫލުތަކުގައި އެދުނު ނަމަވެސް މިނިސްޓްރީގެ އިރުޝާދެއް ނެތި މައުލޫމާތު ނުދިނުމަށް އެޑިއުކޭޝަން މިނިސްޓްރީން ސްކޫލްތަކަށް އަންގައިފިއެވެ.
9 ޖުލައި 2024 ގައި މިނިސްޓްރީ އޮފް އެޑިއުކޭޝަން އިން ސްކޫލް ތަކަށް ފޮނުވި އިންޓާނަލް މެމޯ އެއްގައި ބުނެފައި ވަނީ ގާނޫނު ނަންބަރު 2024/1 (މައުލޫމާތު ހޯދައި ލިބިގަތުމުގެ ހައްގުގެ ގާނޫނު) ގެ ދަށުން، މައުލޫމާތު ހޯދުމަށް އެދި ސްކޫލުތަކަށް ހުށަހަޅާ ފޯމާ ގުޅިގެން، މިނިސްޓްރީގެ އިރުޝާދާ އެކު ނޫނީ ޖަވާބު ނުދިނުމަށް ދަންނަވާ ކަމަށެވެ.
ރައީސް މުއިއްޒު ވެރިކަމަށް ވަޑައިގަތީ ހާމަ ކަން ބޮޑު ސަރުކާރެއް ހިންގަވާނެ ކަމަށް ވެފައިވާ ވައުދާ އެކުގައި ނަމަވެސް، ސަރުކާރުން މައުލޫމާތު ހޯދުމުގައި މީޑިއާ އަށާއި އާންމު ފަރާތްތަކަށް ބޮޑެތި ގޮންޖެހުންތަކެއް ވަނީ ކުރިމަތިވެފައެވެ.
މައުލޫމާތު ހޯދައި ލިބިގަތުމުގެ ގާނޫނުގެ ދަށުން ސަރުކާރުގެ އޮފީސްތަކަށް ހުށަހަޅާ ސުވާލުތަކަށް މުއްދަތު ހަމަވެގެން ދާއިރުވެސް ޖަވާބު ނުލިބޭ މައްސަލަ އަކީ އާންމު ކަމެކެވެ. އޭގެ ނަތީޖާ އެއްގެ ގޮތުން، ސަރުކާރުގެ އޮފީސް ތަކުން މައުލޫމާތޫ ނުދީގެން އިންފޮމޭޝަން ކޮމިޝަނަރުގެ އޮފީހުން މައުލޫމާތު ފޯރުކޮށްދިނުމަށް ސަރުކާރުގެ އޮފީސްތަކަށް އަމުރު ކުރަން ޖެހޭ ހާލަތް ވެސް ކަންކަން ވަނީ ގޮސްފައެވެ.
އެ ގޮތުން ކުރާ އަމުރުތަކަށް ވެސް ކިޔަމަން ނުވުމުގެ ސަބަބުން ސަރުކާރުގެ ބައެއް އޮފީސްތަކަށް އިންފޮމޭޝަން ކޮމިޝަނަރުގެ އޮފީހުން ވަނީ ފިޔަވަޅު ވެސް އަޅާފައެވެ.
