ސަރުކާރުގެ ވަޒީފާއިން އަލަށް ރިޓަޔަރވާ މުވައްޒަފުންނަށް މަހުން މަހަށް ދޭން ކަނޑައަޅާފައި އޮންނަ އެލަވަންސްތައް އަންނަ އަހަރުގެ ޖެނުއަރީން ފެށިގެން ނުދޭން ނިންމާ އެކަން އެންގީ ރައީސުލްޖުމްހޫރިއްޔާ ޑރ.މުހައްމަދު މުއިއްޒާއި، މަޝްވަރާ ކުރައްވާފައިތޯ ކުރެއްވި ސުވާލަށް ފިނޭންސް މިނިސްޓަރު މޫސާ ޒަމީރު ޖަވާބެއް ނުދެއްވިއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވަނީ މި ސުވާލު ހިމެނޭ ގޮތުން ގިނަ ސުވާލުތަކެއް މިނިސްޓަރ ޒަމީރު އާ ކުރައްވާފައެވެ.
އެގޮތުން 2025 ވަނަ އަހަރުގެ ޕީއެސްއައިޕީ ޕްރޮޖެކްޓްތަކުގެ ތަފްސީލް މިއަހަރުގެ އެއްވެސް ހިސާބެއްގައި ލިބިދާނެތޯއާއި، 2024 ވަނަ އަހަރުގެ ބަޖެޓުގެ ޕީއެސްއައިޕީ ހިންގި ހަރަދުގެ ތަފްސީލު ލިބޭނެތޯ ސުވާލު ކުރެއްވިއެވެ. އަދި އަލަށް ރިޓަރ ކުރައްވާ ފަރާތްތަކުން އެލަވަންސް ކަނޑާލުމަށް ނިންމިކަން ފާހަގަކުރައްވައި، ވަކި މުއްދަތަކުން ފެށިގެން ނުލިބޭ ގޮތަށް ހަމަޖައްސެވި ކަމަށެވެ. އެހެންނަމަވެސް 72 ގަޑިއިރު ނުވަނީސް އާދައިގެ މަތިން ރައީސުލްޖުމްހޫރިއްޔާ އެ ނިންމެވުން ބާތިލްކުރެއްވިކަން މެންބަރު ޒިޔާދު ފާހަގަކުރެއްވިއެވެ. އަދި މިފަދަ ބޮޑެތި ނިންމެވުންތައް ނިންމަވަނީ ރައީސުލްޖުމްހޫރިއްޔާއާ އެއްވެސް ވަރަކަށް މަޝްވަރާ ކޮށްފައިތޯ މެންބަރު ޒިޔާދު ސުވާލު ކުރެއްވިއެވެ.
މިސުވާލުތަކަށް މިނިސްޓަރު ޒަމީރު ވިދާޅުވީ ބަޖެޓް ހުށަހެޅިއިރު، ހުށަހެޅި އިސްލާހުތަކަކީ އެއީ އެއަށް ބަދަލު ނުގެނެވޭ ގޮތަކަށް ހުށަހަޅާފައިވާ އިސްލާހުތަކެއް ނޫން ކަމަށެވެ. އަދި ބޭނުންވާ ލަނޑުދަނޑިތައް ހާސިލް ކުރެވޭނެ ކަމަށް މިނިސްޓަރު ޒަމީރު ވިދާޅުވިއެވެ.
ޕީއެސްއައިޕީގެ ޕްރޮޖެކްޓްތަކުގެ ތަފްސީލުތައް ހާމަ ކުރާނެކަން ފާހަގަކުރައްވައި މިނިސްޓަރު ޒަމީރު ވިދާޅުވީ އެމަސައްކަތްތައް ކުރިއަށް ގެންދާނީ މީގެ ކުރިން ދިމާވި މައްސަލަތައް ދިމާނުވާނެ ގޮތަށް ކަމަށެވެ. އަދި ވިދާޅުވީ މިހާރު ހިންގަމުންދާ ޕީއެސްއައިޕީ ޕްރޮޖެކްޓްތަކުގެ ތަފްސީލުތައް ފީނޭންސް މިނިސްޓްރީން ހާމަކުރާ ރިޕޯޓުގައި ހިމަނާނެ ކަމަށެވެ.
ޕީއެސްއައިޕީ ޕްރޮގްރާމްތައް އާދެ ކުރިން ވެސް އަޅުގަނޑުމެން ބަޖެޓް ހުށަހެޅިއިރު ވެސް އަޅުގަނޑުމެން ދެންނެވިހެން އޭގެ ތަފްސީލުތައް ރޯލްއައުޓް ކުރާނަން. އަޅުގަނޑުމެން ކުރިން ދިމާވި މައްސަލަތައް ދިމާނުވާނެ ގޮތަކަށް. އެނގިވަޑައިގަންނަވާނެ އެބަހުރި އެތައް ބިލިއަން ރުފިޔާގެ ބަޖެޓް ސްޓާޓް ކޮށްފައި އެކަމަކު ޕްރޮޖެކްޓް ސްޓާޓް ކޮށްފައި އެކަމަކު ކުރިއަށް ނުގެންދެވި. އޭގައި ބަޖެޓު ނެތިގެންނާއި، ދިމާވި މައްސަލަތަކާ ގުޅިގެން. އެހެންވީމަ އެގޮތަށް ހެދީމަ ވާގޮތަކީ ބައެއް ކޮންޓްރެކްޓްތައް އެވޯޑްކޮށްފައި ބަޖެޓް ފޮތުގައި އެބަ އޮތޭ މި އެވޯޑް ކުރަންޖެހޭ އެވޯޑް ކޮށްފައި މިނުހިނގާ ހުރެގެން ނޫން ކަމަށްވެއްޖެއްޔާ ދެން ދިމާވާ މައްސަލައެއްގައި ދަައުލަތަށް ލިބޭ ގެއްލުން މާބޮޑުވޭ. އެހެންވީމަ މިހާރު ޕްރޮޖެކްޓްތައް ރޯލްއައުޓް ކުރާއިރު، އެންމެނަށް އެނގޭ ގޮތަށް އެކަންތައް ކުރާނަން.ފިނޭންސް މިނިސްޓަރު މޫސާ ޒަމީރު
މިނިސްޓަރު ޒަމީރު މިމޭރުމުން ސުވާލުތަކަށް ޖަވާބު ދެއްވި ނަމަވެސް ސަރުކާރުގެ ވަޒީފާއިން އަލަށް ރިޓަޔަރވާ މުވައްޒަފުންނަށް މަހުން މަހަށް ދޭން ކަނޑައަޅާފައި އޮންނަ އެލަވަންސްތައް އަންނަ އަހަރުގެ ޖެނުއަރީން ފެށިގެން ނުދޭން ނިންމާ އެކަން އެންގީ ރައީސުލްޖުމްހޫރިއްޔާ ޑރ.މުހައްމަދު މުއިއްޒާއި، މަޝްވަރާ ކުރައްވާފައިތޯ ކުރެއްވި ސުވާލަށް ޖަވާބު ދެއްވާފައިނުވެއެވެ.
އެކި އެކި މުއައްސަސާތަކުން އެ ދާއިރާ އަކުން ރިޓަޔާ ވާ މުވައްޒަފުންނަށް އެކިއެކި އުސޫލުގެ ދަށުން އިނާޔަތް ދެމުން އަންނަނިކޮށް ރައީސް މުއިއްޒުގެ ސަރުކާރުން ވަނީ ކުއްލި ގޮތައް އެ އިނާޔަތައް ކަނޑާލަން ނިންމާ އެކަން އޮފީސްތަކަށް އަންގާފައެވެ.
އަލަށް ވަޒީފާ އިން ރިޓަޔާ ކުރާ މުވައްޒަފުންނަށް އެ މުއައްސަސާ އަކުން މަހުން މަހަށް ދޭ އެލަވަންސެއް ނުދޭން ސަރުކާރުން ނިންމާ އެކަމާ ބެހޭ ގޮތުން މިނިސްޓަރު މޫސާ ޒަމީރު ސޮއިކުރައްވާ އެކި އެކި މުއައްސަސާ ތަކަށް ފޮނުވާފައިވާ ސިޓީގައިވާ ވަނީ އެ ބަދަލު ގެންނަނީ ސަރުކާރުގެ ޚަރަދު ކުޑަކުރަން އަޅާ ފިޔަވަޅެއްގެ ގޮތުގައި ކަމަށެވެ.
އިދާރާތަކަށް އެންގި އެންގުން ބާޠިލުކުރައްވަން ރައީސް މުއިއްޒު ނިންމެވީ، ޑިސެމްބަރ 1، 2024 ވަނަ ދުވަހު ރައީސް އޮފީހުގައި ކުރިއަށް ގެންދެވި ވަޒީރުންގެ މަޖިލީހުގެ ޖަލްސާއަށް "ޚުދު އެމަނިކުފާނު ހުށަހެޅުއްވި މައްސަލައަށް" ކުރިއަށް ގެންދެވި މަޝްވަރާތަކަށް ފަހުގައި ކަމަށް ވެސް ރައީސް އޮފީހުން ބުނެފައިވެއެވެ.
