އަޅުގަނޑުވެސް އަޑުއެހީމެވެ. "ގަވައިދު ބަދަލެއް ނުކުރާނަމޭ" ރައީސް އަޑަށް ވަރަށް ބާރު ލައްވާފައި ވިދާޅުވި އެވެ. އެއީ ސަރުކާރަށް އެއް އަހަރު ފުރިގެން މާލޭ ސޯޝަލް ސެންޓަރުގައި ދެއްކެވި ވާހަކަފުޅެއްގައެވެ.

"މިކަމުގައި އަޅުގަނޑުމެން ނެތިން މި ގަވައިދު ބަދަލު ކުރާކަށެއް. ނުކުރާނަން ބަދަލެއް. ވަރަށް ސާފުކޮށް މި ދެންނެވީ ގަވައިދު ބަދަލެއް ނުކުރާނަމޭ."

ވަރަށް ޖަޒުބާތުގައި ރައީސް މިހެން ވިދާޅުވުމުން މުޅި ހޯލު ގުގުމައިގެން ދިޔައެވެ. ތަރުހީބު އޮއްސާލީއެވެ. އެއާއެކު އިތުރަށް ފޯރީގައި "ގަވައިދު ބަދަލެއް ނުކުރާނަމޭ" ތަކުރާރުކޮށް ރައީސް މުއިއްޒަށް ވިދާޅުވެވުނީ ކަމެއް ވިދާޅުވީ ކަމެއް ނޭނގެއެވެ. ގައިމުވެސް އެ ލަފްޒު ތަކުރާރުކޮށް އަޑު އިވުނެވެ.

އަންގާރަ ދުވަހުގެ ރޭ އިވުނީ ބޭރު ފައިސާ ގެ ގަވައިދުގެ ބަދަލުގައި "ބޭރު ފައިސާގެ ބިލު" ގެ ނަމުގައި ގާނޫނެއްގެ ސިފަ ގެންނަން ޑްރާފްޓް ކޮށްފައިވާ ބިލެއްގެ ވާހަކައެވެ.

ބިލުގައި އޮތް އެއްޗެއް ބަލާލިއިރު، އެއްކަލަ ރޭ ރައީސް ޖޯޝުގައި އެ ވިދާޅުވި ވާހަކަފުޅު މަތިން ހަދާން ވެއްޖެއެވެ. ގަވައިދު ބަދަލެއް ނުކުރާނަމޭ ތަކުރާރުކޮށް ވިދާޅުވި ވާހަކަފުޅެވެ. ތެދެކެވެ. ގަވައިދު އޮތީ އޮތް ތާނގައެވެ. އެއަށް ބަދަލެއް ނާދެއެވެ. އެހެން ނަމަވެސް ގަވައިދުގެ މައްޗަށް އުފަންވާން އުޅޭ ގާނޫނު ގައި ގަވައިދުގައި ނެތް ކިތަންމެ ކަމެއް އޮތްކަން އެއީ ފެންނަން އޮތް ހަގީގަތެކެވެ. އެ ހަގީގަތް ބަދަލެއް ނުކުރެވޭނެއެވެ.

ރައީސް ހުންނެވީ ގޮތުގައިކަން ދައްކަން ކިތަންމެ މަސައްކަތް ކުރިޔަސް ހަގީގަތް ވާނީ ހަގީގަތަށެވެ. ރައީސް ބަދަލު ނުކުރައްވާނަމޭ ވިދާޅުވި ގަވައިދަށް ގާނޫނެއްގެ ސިފަ ޖެހިގެން އަންނަ އިރު މިހާރު އޮތް ގޮތުން ވެސް ބޮޑެތި ބަދަލުތަކެއް ދިމާލަށް އެހެރީ ފެންނާށެވެ.

އެމްއެމްއޭ އިން އާންމު ކުރި ބޭރު ފައިސާގެ ގަވައިދުގައި ޓޫރިސްޓު ރިސޯޓަކަށް އަންނަ ކޮންމެ ފަތުރުވެރިއެއްގެ ބޮލަށް 500 ޑޮލަރު މާރުކުރަން ޖެހޭނެ ކަމަށް ލިޔެފައި އޮތް އިރު، އޭރު އޭގައި އެއްވެސް އިސްތިސްނާ އެއް ނެތް  ކަން އެއީ ފެންނާން އޮތް ހަގީގަތެކެވެ. ފަތުރުވެރިކަމުގެ ދާއިރާގެ ވިޔަފާރިތަކުން ކަންބޮޑުވުން އެންމެ ބޮޑަށް ފާޅު ކުރި އެއް ކަމަކީވެސް އެއީއެވެ. ހިލޭ ރިސޯޓަށް އާއިލާ އާއެކުގައި އަންނަ އަލަށް އުފަންވާ ކުއްޖާ އަށް ވެސް 500 ޑޮލަރު މާރުކުރަން ޖެހުމަކީ ހަމަ ޖެހޭ ކަމެއް ނޫން ކަމަށް އެ ފަރާތްތަކުން ބުނަމުން ދިޔައެވެ.

އެމްއެމްއޭ އިން ޑްރާފްޓް ކުރި ބިލުގައި މިހާރު 2 އަހަރުން ދަށުގެ ކުޑަ ކުއްޖާ އަކީ "ޓޫރިސްޓެއް ނޫނެވެ." ރާއްޖެއަށް ދެ އަހަރުން ދަށުގެ ކުޑަކުދިން އަންނަނީ ކިހާ މިންވަރަކަށް ކަން ނޭނގުނަސް އެއީވެސް ކުޑަ އަދަދަކަށް ނުވާނެއެވެ. އެހެން ކަމުން މާރުކުރަން ނުޖެހި އެ ސަލާމަތްވީ ކިތަންމެ 500 ޑޮލަރެކެވެ.

ރިސޯޓު އޮޕަރޭޓަރުންގެ އަނެއް ކަން ބޮޑުވުމަކީ، ޓްރާންސިޓް ކުރަން އެއް ރޭ މަޑުކޮށްލާ މީހާ އަށް ވެސް 500 ޑޮލަރު މާރު ކުރަން ޖެހުމެވެ. އެމްއެމްއޭ އިން ޑްރާފްޓް ކުރި ބިލުގައި މިހާރު އެއް ރޭ މަޑު ކޮށްލާ މީހާ އަކީ ވެސް "ޓޫރިސްޓެއް ނޫނެވެ،" އެ ސަލާމަތްވީ ވީ ވެސް މާރު ނުކޮށް ކިތަންމެ 500 ޑޮލަރެކެވެ.

މިހާރު އޮތް ގަވައިދުގައި ކޮމްޕްލިމެންޓަރީ ކޮށް ނުވަތަ ހިލޭ ރިސޯޓުގައި އައިސް ތިބޭ މެހުމާނުންނަށް ވެސް 500 ޑޮލަރު މާރު ކުރަން ޖެހެއެވެ. ރިސޯޓު އޮޕަރޭޓަރުން ބުނެފައިވަނީ މާކެޓިންގ މަސައްކަތްތަކުގަޔާއި، ޓުއަރ އޮޕަރޭޓަރުންނާއި އަދިވެސް ވިޔަފާރި އާ ގުޅޭ ކިތަންމެ ބަޔަކު އައިސް ތިބެނީ ހިލޭ ކަމަށާއި އެމީހުންނަށް 500 ޑޮލަރުގެ ރޭޓުން މާރު ކުރުމަކީ ހަމަޖެހޭ ކަމެއް ނޫން ކަމުގައެވެ. އެކަން ވެސް އޮތީ ފަހުން މި ޑްރާފްޓް ކުރި ބިލުގައި ބަދަލުކޮށް އެއީވެސް "ޓޫރިސްޓުން ނޫން" ކަމަށް ކަނޑައަޅާފައެވެ.

މިއީ ބަދަލުތައް ކަމަށް ނުވާ ނަމަ ދެން ބަދަލަކީ ކޮބާތޯއެވެ. ރައީސް ވިދާޅުވީ، އަދަދެއްގެ ގޮތުން ކަނޑައަޅާފައި އޮތް 500 ޑޮލަރުގައި ހިފަހައްޓަވާނެ ވާހަކަ އެކަންޏެއް ނޫނެވެ. ވިދާޅުވީ، ގަވައިދު ބަދަލު ނުކުރައްވާނެ ވާހަކައެވެ.

ހަގީގަތަކީ ޓޫރިޒަމް އިންޑަސްޓްރީން ފާހަގަ ކުރި ފަދައިން ކަން އޮތް ގޮތް ރަނގަޅަށް ބެލުމެއް ނެތި އަވަސް އަވަހަށް ބާރު ގަދަ ކަން ދެއްކުމަށް ގަވައިދު ހަދާ އަމަލު ކުރަން ލާޒިމު ކުރި އިރު އޭގައި ހަމަ ނުޖެހޭ ކިތަންމެ ކަމެއް ހުރުމެވެ. އެކަންކަން ފެންމަތިވެ، ދެއުޅި އެއްނުވާ ކަންކަން އިސްލާހު ކުރުން ލާޒިމު ވުމުން އެކަން އެގޮތައް ކޮށްފައިވެސް ދައްކަން މިއުޅެނީ "ގޮތުގައި ހުންނެވި" ކަމެވެ.

ސިޔާސީ ގޮތުން ނުފޫޒުން އެއްކިބާވެ މަސައްކަތް ކުރަން އެމްއެމްއޭ ވެސް އެކްޓިވިސްޓް ލެވެލް އަށް ވެއްޓުނީމާ ކަމަކު ނުދެއެވެ. ކުއްލި އަކަށް ނޫސް ކޮންފަރެންސް އެއް ބާއްވާ، ރައީސުލްޖުމްހޫރިއްޔާގެ ދިފާއުގައި ކަންވީ ގޮތް ރަނގަޅަށް ސާފުކޮށް ދިނުމުގެ ބަދަލުގައި ތަނުގެ އެންމެ މަތީވެރިޔާ ވެސް ފެނުނީ ކޯފާވެފައި ނޫސްތަކުން ހަގީގަތް އޮޅުވާލަނީ ކަމަށް ވިދާޅުވެ ވާހަކަފުޅު ދެއްކެވި މަންޒަރެވެ.

އެމްއެމްއޭގެ ބިލުގައި އިސްތިސްނާ ތައް ސާފުކޮށް ހިމެނިފައި އޮތް އިރު، ގަވައިދުގައި އެކަންކަން ނެތް ކަން މަތި ޖަހަން ދެން ދެއްކެވީ އެވައިޒަރީ ނޯޓުގެ ވާހަކަ އެވެ. ގަވައިދުގައި ނެތް އިސްތިސްނާ ތައް ކަމާ ބެހޭ ފަރާތްތަކަށް އެޑްވައިޒަރީ ނޯޓުން އަންގާފައިވާނެ ކަމަށް ވިދާޅުވުމުން، ގާނޫނެއް ވެސް ގަވައިދެއްގެވެސް ބޭނުމެއް ނެތެވެ. އެޑްވައިޒަރީ ނޯޓަކީ އެއަށް ވުރެ މާ ބާރުގަދަ އެއްޗަކަށް ވެ ނިމުނީއެވެ. ގަވައިދަށް ބަދަލެއް ނާންނަކަން ދައްކަން ސިއްރުން އެޑްވައިޒަރީ ނޯޓެއް ފޮނުވީތާއެވެ. އެކަމަކު އެ އެޑްވައިޒަރީ ނޯޓުން ވެސް ހަގީގަތުގައި ސިއްރުން ތިޔަ ކުރެއްވި ކަމަކީ ގަވައިދު ބަދަލު ކުރެއްވުން ނޫން ދެން ކޮން ކަމެއްތޯއެވެ.

ގަވައިދު ބަދަލު ނުކުރައްވާ ކަމަށް ބުދަ ދުވަހު އެމްއެމްއޭ ގެ ގަވަނަރު އަހްމަދު މުނައްވަރު ވަރަށް ސާފުކޮށް ވިދާޅުވިއެވެ. ހަމަ އެ ދުވަހު ރައީސް މުއިއްޒު ކުރެއްވި ޕޯސްޓެއްގައިވެސް "ރިސޯޓު ތަކަށް އަންނަ ކޮންމެ ޓޫރިސްޓަކަށް 500 ޑޮލަރު މާރު ކުރެވިގެންދާނެ" ކަމަށް ވިދާޅުވިޔަސް މިހާރު ހުށަހަޅުއްވާފައި އޮތީ އެހެނެއް ނޫނެވެ. ކޮންމެ ޓޫރިސްޓަކަށް 500 ޑޮލަރު މާރުކުރާކަށް ނުޖެހެއެވެ. އަލަށް އެކުލާވާލި ބިލުން ކިތަންމެ ކިތަންމެ ބަޔަކު އިސްތިސްނާވެ، އަންނަ ކޮންމެ މީހަކަށް 500 ޑޮލަރު މާރުކުރާކަށް ލާޒިމެއް ނުވާނެއެވެ. 

ވަކި ކަމެއްގައި ޢަމަލުކުރަންވީ ގޮތް ބަޔާންކުރުމަށް، އެކަމަށް ހާއްސަ ޤާނޫނެއް ފާސްކޮށްފިނަމަ، ކުރިން ޢަމަލުކުރަމުންދިޔަ ގަވާއިދު އުވޭނެކަން އެއީ، ޤާނޫނީ މާހިރަކަށް ނުވިއަސް އަޅުގަނޑުމެން ކޮންމެ މީހަކަށް ވެސް އިނގޭ ކަމެކެވެ.

މިހާރު ހުށަހަޅަން އެ އުޅޭ ބިލު އެ އޮތްގޮތަށް ފާސްވުމަށްފަހު، ޑޮލަރު މާރުކުރުން މަޖުބޫރުކުރުމަށް އެމްއެމްއޭ އިން ހެދި ބޭރު ފައިސާގެ ގަވާއިދު އުވިގެންދާނެ އެވެ. ދެން ހިނގާނީ މި ދެންނެވި އައު ޤާނޫނުގައި ބުނާ އުސޫލުތަކެވެ.

އެހެންކަމުން، އަޑުފުޅަށް ބާރުލައްވައި، ބަދަލުނުކުރައްވާނެ ކަމަށް ތަކުރާރުކޮށް ވިދާޅުވި ގަވާއިދު ހަމަ ބަދަލު ކުރެއްވީއެވެ!