ސައުދީ ޕްރޯ ލީގުގައި އަލް ޤަދިސިއްޔާއާ ދެކޮޅަށް ކުޅުނު މެޗުން، އަލް ނަޞްރު ބަލިވެއްޖެ އެވެ.

ހުކުރު ދުވަހުގެ ރޭ ޤަދިސިއްޔާއާ ދެކޮޅަށް ކުޅުނު މެޗުން އަލް ނަޞްރު ބަލިވީ 2-1 އިންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ ވެސް އަލް ނަޞްރުންނެވެ. ނަމަވެސް ޤަދިސިއްޔާ އިން ވަނީ ފަހަތުން އަރައި ދެ ލަނޑު ޖަހައިގެން އަލް ނަޞްރުގެ މައްޗަށް ކުރި ހޯދައިފަ އެވެ.

މެޗުގެ ފުރަތަމަ ހާފުގެ 32 ވަނަ މިނެޓުގައި އަލް ނަޞްރުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލީޑު ނަގައިދިނީ ކެޕްޓަން ކްރިސްޓިއާނޯ ރޮނާލްޑޯ އެވެ. މިއީ މި ސީޒަންގައި ރޮނާލްޑޯ އަލް ނަޞްރަށް ޖަހައިދިން 11 ވަނަ ލަނޑެކެވެ. އޭގެ ތެރެއިން ސައުދީ ލީގުގައި އޭނާ ވަނީ ހަތް ލަނޑު ޖަހައިފަ އެވެ.

އަލް ނަޞްރުން ލީޑު ނެގިތާ ފަސް މިނެޓު ފަހުން ޤަދިސިއްޔާ އިން ވަނީ ލަނޑު ޖަހައި މެޗުގެ ނަތީޖާ ހަމަހަމަ ކޮށްފަ އެވެ. އެ ލަނޑު އެ ޓީމަށް ޖަހައިދިނީ ހޫލިއަން ކުއިނޯންސް އެވެ. މެޗުގެ ދެ ވަނަ ހާފު ފަށައިގެން ފަސް ވަނަ މިނެޓުގައި ޤަދިސިއްޔާ އިން ވަނީ ދެ ވަނަ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޕިއޭ އެމެރިކް އޮބާމަޔަން އެވެ.

މިއީ މި ސީޒަންގެ ސައުދީ ލީގުގައި އަލް ނަޞްރުގެ ފުރަތަމަ ބައްޔެވެ. މި ނަތީޖާ އާއެެކު އަލް ނަޞްރު އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅުނު 11 މެޗުން 22 ޕޮއިންޓާ އެކު އެވެ. ހަ މެޗުން އަލް ނަޞްރު މޮޅުވެފައިވާއިރު، ހަތަރު މެޗުން ވަނީ އެއްވަރުވެފަ އެވެ. އަލް ނަޞްރު އަތުން ހޯދި މޮޅާއެކު ޤަދިސިއްޔާ އޮތީ މިހާތަނަށް ކުޅުނު 11 މެޗުން 22 ޕޮއިންޓާ އެކު ފަސް ވަނައިގަ އެވެ.