ނިއު ރޭޑިއަންޓު ސްޕޯޓްސް ކުލަބުގެ ޗެއާމަންކަމާ ހަވާލުވީއިރު އެ ކުލަބު އޮތީ ދަރަނީގައިކަން އިނގޭ ކަމަށާއި، އެ ދަރަނިން ކުލަބު ސަލާމަތްކޮށްދޭނެ ކަމަށް އަޙުމަދު މުބީން ވިދާޅުވެއްޖެ އެވެ.
އަލުން ފުރަތަމަ ޑިވިޝަނަށް އައުމަށް މަސައްކަތް ކުރަމުން އަންނަ ނިއު ރޭޑިއަންޓުން މި ފަހުން ބޭއްވި ކޮންގްރެސްގައި އެ ކުލަބުގެ ޗެއާމަންކަމަށް ވަނީ މުބީން އިންތިޚާބު ކޮށްފަ އެވެ. އެ މަގާމަށް ކުރިމަތިލާން ހުޅުވާލި ފުރުސަތުގައި ޗެއާމަންކަމަށް ކުރިމަތިލެއްވީ ވެސް މުބީން އެކަންޏެވެ. ކޮންގްރެސްގައި ބައިވެރިވި މެމްބަރުންގެ އިއްތިފާގުން ވަނީ ނިއުގެ ޗެއާމަންކަމަށް މުބީން އިންތިޚާބު ކޮށްފަ އެވެ.
އެ ކޮންގްރެސްގައި ވާހަކަ ދައްކަވަމުން މުބީން ވިދާޅުވީ އޭނާ އާއި އޭނާގެ ޓީމުން ނިއު ރޭޑިއަންޓާ ހަވާލުވީ އެ ކުލަބު އޮތް ޙާލަތު އެނގިގެން ކަމަށެވެ. އެގޮތުން ވަރަށް ބޮޑު ހިސާބުތަކެއް ޖަހާފައިވާނެ ކަމަށާއި، ނިއު ރޭޑިއަންޓު އޮތީ ވަރަށް ބޮޑު ދަރަންޏެއްގައިކަން ވެސް އިނގޭ ކަމަށް މުބީން ވިދާޅުވި އެވެ. އެހެންކަމުން އެ ޓީމުގެ އެންމެ ފުރަތަމަ މަސައްކަތަކަށް ވާނީ، ނިއު ރޭޑިއަންޓުގެ ދަރަނިން އެ ކުލަބު ސަލާމަތް ކުރުން ކަމަށް ވެސް މުބީން ވިދާޅުވި އެވެ. ޚާއްސަކޮށް ބޮޑު ޓީމެއް އެކުލަވާލައި، ޓީމަށް ވަރުގަދަ ކުޅުންތެެރިން ހޯދުމުގެ ބަދަލުގައި، އެންމެ ފުރަތަމަ ވެސް ކުރާނެ ކަމަކީ މިހާރު އޮތް ދަރަނިން ސަލާމަތްކޮށް ކުރިއަށް ދާނީ ކުލަބުގެ ޚިދުމަތްތެރިންގެ ޚިޔާލާއި މަޝްވަރާ ހޯދައިގެން ކަމަށް ވެސް މުބީން ވަނީ ވިދާޅުވެފަ އެވެ.
އަޅުގަނޑުމެންގެ އެންމެ ފުރަތަމަ މަސައްކަތަކަށް ވެގެން އަންނާނީ ނިއު ރޭޑިއަންޓުގެ ދަރަނިން ނިއު ރޭޑިއަންޓު ސަލާމަތް ކުރުން. އަޅުގަނޑުމެން ފުރަތަމަ އަމާޒަކަށް ވެގެން އަންނާނީ ނިއު ރޭޑިއަންޓަށް ބޮޑު ޓީމެއް އެކުލަވާލައި ކުޅުންތެރިން ގަނެ، އެ މަސައްކަތް ކުރުމަށްވުރެ ބޮޑަށް، މިހާރު އަޅުގަނޑުމެންގެ އޮތް ދަރަނިތަކުން ސަލާމަތްކޮށް، އެއަށްފަހު އަޅުގަނޑުމެންގެ މި ކުލަބު މިހިސާބަށް ގެނައި ހުރިހާ ބޭފުޅުންގެ ޚިޔާލާއި މަޝްވަރާ ހޯދައިގެން އަޅުގަނޑުމެން ކުރިއަށް ދާނީ.އަޙުމަދު މުބީން / ނިއު ރޭޑިއަންޓުގެ ޗެއާމަން
މީގެ އިތުރުން މުބީން ވިދާޅުވީ މި ފާއިތުވި ދުވަސްތަކުގައި ވެސް މަސައްކަތް ކޮށްފައި ވާނީ ނިއު ރޭޑިއަންޓުގެ ޚިދުމަތްތެރިންނާ މަޝްވަރާކޮށް، އެ ބޭފުޅުން ޚިޔާލު ހޯދައިގެން ކަމަށެވެ. އަދި އެންމެ ބޮޑު އަމާޒަކީ ނިއު ރޭޑިއަންޓުގެ ޙައްޤު މަޤާމަށް އެ ކުލަބު އަލުން ގެންދިޔުން ކަމަށާއި، ކުޅިވަރުގެ ރޫޙު ކެނޑިގެން ދިޔަ ދިޔުން އަލުން އަނބުރާ ހޯދުން ކަމަށް ވެސް މުބީން ވަނީ ވިދާޅުވެފަ އެވެ.
ނިއު ރޭޑިއަންޓުގެ އައު ބޯޑަށް ބަލާއިރު، އޭގެ ތެރޭގައި ސަރުކާރު ކުންފުނިތަކުގެ މެނޭޖިން ޑައިރެކްޓަރުން އަދި ރައްޔިތުންގެ މަޖިލީހުގެ މެމްބަރުން ވެސް ހިމެނެ އެވެ. އެގޮތުން ނިއުގެ ސީނިއާ ވައިސް ޗެއާމަންކަމަށް އިންތިޚާބު ކުރި ދެ މެމްބަރުންނަކީ، ވެމްކޯގެ މެނޭޖިން ޑައިރެކްޓަރު މުޖުތަބާ އަލީ (މުޖޭ) އަދި ހެންވޭރު ހުޅަނގު ދާއިރާގެ މެންބަރު އަލީ އިބްރާހިމް (ކައްޕި) އެވެ. ވައިސް ޗެއާމަންގެ މަގާމަށް އިންތިޚާބު ކޮށްފައި ވަނީ އަލްއުސްތާޛް އަލީ ރަޝީދު އަޙުމަދު އެވެ. މީގެ އިތުރުން ނިއު ރޭޑިއަންޓުގެ ބޯޑު މެމްބަރުންގެ ތެރޭގައި ހަންޖު ކޯޕަރޭޝަންގެ މެނޭޖިން ޑައިރެކްޓަރު މުޙައްމަދު ޝަކީލް ވެސް ހިމެނެ އެވެ.
