ބާރުތައް އަންނަނީ ރައްޔިތުންގެ ފަރާތުން ކަމަށާއި، ހުދުމުހުތާރު ވެރިކަމެއް ހިންގުމަށް ރައްޔިތުން ނިކަމެތިކުރާނަމަ އެކަމާ ދެކޮޅަށް ރައްޔިތުން ނުކުންނާނެ ކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި މެންބަރު އަދި އެމްޑީޕީ ޕާލިމެންޓަރީ ގްރޫޕްގެ ލީޑަރު ނާޒިލް ވިދާޅުވީ މިސަރުކާރުން ރައްޔިތުންގެ މަޖިލިސް މެދުވެރިކޮށް މިހާރު ހިންގާ ކަންކަމަކީ ހުދުމުހުތާރުކޮށް ހިންގާ ކަންތައްތަކެއް ކަމަށާއި، މިކަންކަމުގެ ހަގީގަތް އޮޅުވާލުމަށް ސަރުކާރުން މަސައްކަތް ކުރާ ކަމަށެވެ. މިގޮތަށް މަސައްކަތްތައް ކުރިއަށް ގެންދިއުމަށް ފުރުސަތުދޭ ކަމަށްވާނަމަ ފަހަރަކު ކަމެއް މިގޮތަށް ނިންމާ ގައުމު ހަލާކުގެ ތެރެއަށް ވައްޓާލާނެ ކަމަށް މެންބަރު ނާޒިލް ވިދާޅުވިއެވެ.
މެންބަރު ނާޒިލް ވިދާޅުވީ ހުދުމުހުތާރުކޮށް ވެރިކަން ހިންގި ގައުމުތަކުގައި ނިމުން އަންނަ ގޮތް ފެނިގެންދާ ކަމަށާއި، ރައްޔިތުންނަށް އުދަނގޫވެ، ނިކަމެތިވާނަމަ ރައްޔިތުން ސަރުކާރާ ދެކޮޅަށް ނުކުންނާނެ ކަމަށެވެ.
މީގެ އިތުރުން މެންބަރު ނާޒިލް ވިދާޅުވީ ގާނޫނު އަސާސީއަށް އިސްލާހު ގެނައީ އެމްޑީޕީގެ އަޑު މަޖިލީހުގައި އިއްވުމަށް އެއްވެސް ފުުރުސަތެއް ނުދީކަމަށެވެ. ގޮނޑި ގެއްލޭ ގޮތަށް ގާނޫނު އަސާސީއަށް ގެނެސްފައިވާ ބަދަލަށް އިޝާރާތް ކުރައްވައި މެންބަރު ނާޒިލް ވިދާޅުވީ މަޖިލީހުގައި ބައެއް ޕާޓީތައް ތަމްސީލު ކުރުމަށް އެންމެ މެންބަރަކުވެސް އެބަހުރި ކަމަށާއި، އެ ޕާޓީތަކަށް 10،000 މެންބަރުން ހަމަނުވެގެން ޕާޓީ އުވާލާ ހާލަތެއް އަތުވެއްޖެނަމަ ދެން އެ މެންބަރުގެ ގޮނޑިއަށް ވެގެންދާނެ ގޮޮތެއް ގާނޫނުގައި ނެތްކަމަށެވެ. އަދި މިކަހަލަ ގިނަ ކަންތައްތަކެއްގެ ޖަވާބު ނުލިބުނުކަމަށާއި، އެއީ މަޝްވަރާކޮށްފައިނުވާތީ ކަމަށް މެންބަރު ނާޒިލް ވިދާޅުވިއެވެ.
ހީފުޅުވެދާނެ ތިމަންމަނިކުފާނުގެ ބާރު މިވަގުތު އޮތީތީވެ ތިމަންމަނިކުފާނަށް އެކަން ކުރެވިދާނޭ. އަޅުގަނޑުމެންގެ އަވައްޓެރި ގައުމުތަކުގައި މިކަހަލަ ގޮތަކަށް އައި ބާރުތަކެއް ނިމިދިޔަ ގޮތް ވެސް އަޅުގަނޑުމެންނަށް ފެނިގެންދިޔަ. ވަރަށް ފަހުން ވެސް ޔުނިވާސިޓީ ކުދިންތަކެއް ކޮލެޖް ކުދިންތަކެއް ނުކުމެ ކަންތައްތަކެއް ނުކުމެ ކަންތައްތަކެއް ނިމިގެންދިޔަ ގޮތް ފެނިގެންދިޔަ. ރައްޔިތުންގެ ޖީބު ހުސްވެ ރައްޔިތުން ނިކަމެތިވެގެންދިޔާމަ ރައްޔިތުން ނުކުމެ ކަންތައްތައް ކުރި ގޮތް ވެސް އަޅުގަނޑުމެންނަށް ފެނިގެންދިޔަ.ރައްޔިތުންގެ މަޖިލީހުގެ ހިތަދޫ އުތުރު ދާއިރާގެ މެމްބަރު އިބްރާހިމް ނާޒިލް
މެންބަރު ނާޒިލް ވިދާޅުވީ ސަރުކާރުން ހުދުމުހުތާރު ގޮތްގޮތަށް ނިންމާ ނިންމުންތަކުގެ ސަބަބުން މުސްތަގުބަލުގައި ވެސް ނިކަމެތިވެގެންދާނީ ރައްޔިތުން ކަމަށާއި، އެކަމަށް ރައްޔިތުން ވިސްނަންޖެހޭ ކަމަށެވެ. އަދި ބާރުތައް އަންނަނީ ރައްޔިތުންގެ ކިބައިން ކަމަށްވާއިރު، ނުހައްގުން ކަންކަން ކުރާނަމަ ރައްޔިތުންގެ ބާރު ރައްޔިތުން ހިފާނެ ކަމަށެވެ. އަދި އެ ދުވަހަކުން ސަރުކާރުގައި ކިތަންމެ ބާރެއް އޮތް ނަމަވެސް ރައްޔިތުން ދެކޮޅަށް ނުކުތުމުން އެބާރު ނެތިދާނެ ކަމަށް މެންބަރު ނާޒިލް ވިދާޅުވިއެވެ.
