މިހާތަނަށް އުފެދުނު އެންމެ މޮޅު ފުޓުބޯޅަ ކުޅުންތެރިޔަކީ އާޖެންޓީނާގެ ކެޕްޓަން ލިއޮނަލް މެސީ ކަމަށް، މެންޗެސްޓަރ ސިޓީ އަށް ކުޅެމުން އަންނަ ސްޕެއިންގެ ޑިފެންސިވް މިޑްފީލްޑަރު ރޮޑްރީ ބުނެފި އެވެ.
ފްރާންސް ފުޓުބޯޅަ އިން ދުނިޔޭގެ އެންމެ މޮޅު ފުޓުބޯޅަ ކުޅުންތެރިޔާ އަށް ދެމުން އަންނަ ބެލެންޑިއޯ އެވޯޑު އެންމެ ފަހުން ކާމިޔާބު ކޮށްފައިވާ ރޮޑްރީ މިހެން ބުނީ، ޓީވީ އަކަށް އޭނާ ދިން އިންޓަވިޔުއެއްގަ އެވެ. ރޮޑްރީ ބުނީ އޭނާ ދެކޭ ގޮތުގައި މިހާތަނަށް އުފެދުނު އެންމެ މޮޅު ފުޓުބޯޅަ ކުޅުންތެރިޔަކީ މެސީ ކަމަށާއި، އެކަމާ ޝައްކު ކުރާނެ ޖާގައެއް ނެތް ކަމަށެވެ.
ރޮޑްރީ ބުނީ މެސީ އަށް ބޯޅަ ލިބޭ ކޮންމެ ވަގުތެއްގައި ވެސް، ނުރައްކާތެރި ކަމެއް އަންނާނެ ކަމާމެދު ވިސްނަން ޖެހޭނެ ކަމަށެވެ. މެސީއާ ދެކޮޅަށް އޭނާ ކުޅޭއިރު، މެސީ އަތުން ބޯޅަ އަތުލަން ވަރަށް މަސައްކަތް ކުރަން ޖެހޭ ކަމަށާއި، އެހެން ނަމަވެސް މެސީގެ ހުނަރުވެރިކަމާ އެކު ބޯޅަ އާއެކު އޭނާ ކުރިއަށް ދާނެ ކަމަށް ވެސް ރޮޑްރީ ބުންޏެވެ.
މީގެ އިތުރުން އޭނާ ބުނީ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަދި މެސީއާ ދެކޮޅަށް ކުޅެފައިވާ ކުޅުންތެރިންނަށް، އެ ދެ ކުޅުންތެރިންގެ ތަފާތު އިނގޭނެ ކަމަށެވެ. އެގޮތުން ރޮނާލްޑޯ އިދިކޮޅު ޓީމުގެ ގޯލު އޭރިޔާ ތެރެއަށް ވަންނަންް އެއްވެސް ކުޅުންތެރިޔަކު ބޭނުން ނުވާނެ ކަމަށާއި، އެއީ ރޮނާލްޑޯގެ ނުރައްކާތެރިކަަން ފެންނާނެ ހިސާބު ކަމަށް ރޮޑްރީ ބުންޏެވެ. އެއާ ޚިލާފަށް މެސީ އަކީ އާދަޔާ ޚިލާފު ކުޅުންތެރިޔެއް ކަމަށާއި، ދަނޑު މަތީގެ ކޮންމެ ދިމާލެއްގައި ވެސް މެސީގެ ނުރައްކާތެރިކަން ކުރިމަތިވާނެ ކަމަށް ރޮޑްރީ ބުންޏެވެ.
މިއަހަރުގެ ބެލެންޑިއޯ އެވޯޑު ރޮޑްރީ ކާމިޔާބު ކުރީ ސްޕެއިންގެ ރެއާލް މެޑްރިޑަށް ކުޅެމުން އަންނަ ބްރެޒިލްގެ ވިނީޝިއުސް ޖޫނިއާ އަދި އިންގްލެންޑުގެ ޖޫޑް ބެލިންހަމްއާ ވާދަކޮށެވެ. ރޮޑްރީ ވަނީ ކުލަބުގެ އިތުރުން ޤައުމީ ޓީމާ އެކު ކާމިޔާބީތަކެއް ހޯދައިފަ އެވެ. އެގޮތުން އޭނާ ވަނީ މެންޗެސްޓަރ ސިޓީ އާއެކު އިނގިރޭސި ޕްރިމިއާ ލީގު ކާމިޔާބު ކޮށްފަ އެވެ. މިއަހަރު ޖަރުމަނުގައި ކުރިއަށް ދިޔަ ޔޫރޯ ފުޓުބޯޅަ މުބާރާތް ވެސް ރޮޑްރީ ވަނީ ސްޕެއިން އާއެކު ކާމިޔާބު ކޮށްފަ އެވެ. އެ މުބާރާތުގައި ރޮޑްރީ މޮޅު ކުޅުމެއް ދެއްކިއިރު، މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ.
