ރައްޔިތުންގެ މަޖިލީހުގެ މެމްބަރަކު ސިޔާސީ ޕާޓީ ބަދަލުކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފިނަމަ ނުވަތަ އަމިއްލަ މެންބަރަކު ޕާޓީއަކާއި ގުޅިއްޖެނަމަ މަޖިލީހުގެ މެންބަރުކަން ގެއްލޭގޮތަށް ޤާނޫނުއަސާސީ އަށް ގެނައި އިސްލާހު ރައީސުލްޖުމްހޫރިއްޔާ މުޙައްމަދު މުޢިއްޒު ބުދަ ދުވަހު ތަސްދީޤުކުރައްވައިފިއެވެ.

ގާނޫނު އަސާސީ އަށް މި ގެނައި ބަދަލު ތަސްދީގު ކުރުމާއެކު، ރައްޔިތުންގެ މަޖިލީހުގެ މެމްބަރަކު ސިޔާސީ ޕާޓީ ބަދަލު ކޮށްފިނަމަ ނުވަތަ އެ މެންބަރަކު ޕާޓީން ވަކިކޮށްފި ނަމަ ނުވަތަ އަމިއްލަ މެމްބަރަކު މަޖިލީހުގެ އުމުރުގެ ތެރޭގައި ޕާޓީއަކާ ގުޅިއްޖެނަމަ މަޖިލީހުގެ މެންބަރުކަން ގެއްލޭނެއެވެ.

ވެރިކަންކުރާ ޕީއެންސީގެ މެމްބަރު، ހުޅުދޫ ދާއިރާގެ މެންބަރު މުޙައްމަދު ޝާހިދު ހުށަހެޅުއްވި ޤާނޫނުއަސާސީ އަށް ބަދަލު ގެނައުމުގެ ބިލުގެ ފުރަތަމަ ކިޔުން އިއްވީ ބުދަ ދުވަހުގެ ހެނދުނެވެ.

ޤާނޫނު އަސާސީ އަށް ބަދަލު ގެންނަން ހުށަހެޅި ބިލު 69 މެންބަރުންގެ ވޯޓުން މަޖިލީހަށް ބަލައިގަންނަން ފާސް ކުރީ ބުދަ ދުވަހުގެ މެންދުރު ކުރިންނެވެ.

ބިލުގެ މަސައްކަތް އަވަސް ކުރުމަށް ކަމަށް ބުނެ ރައީސް މުއިއްޒުގެ ފުލް ކޮންޓްރޯލުގައި ހިނގަމުންދާ މަޖިލީހުން ނިންމީ ބިލު މުޅި މަޖިލީހުގެ ކޮމިޓީއަށް ފޮނުވުމަށެވެ.

އެއާއެކު މުޅި މަޖިލީހުގެ ކޮމިޓީގެ މަސައްކަތް ފަށާ، މުޅި މަޖިލީހުގެ ކޮމިޓީގައި ނެގި ވޯޓުގައި ބިލު ފާސް ކުރަން ހާޒިރުވެ ތިބި 89 މެންބަރުންގެ ތެރެއިން 75 މެންބަރުން ވޯޓުދިނެވެ. ބިލު ފާސް ކުރަން ނުފެންނަ ކަމަށް ވޯޓު ދިނީ 13 މެންބަރުންނެވެ.

ކޮމިޓީގެ މަސައްކަތް ހަލުއި ސްޕީޑުގައި ނިންމާ މަޖިލީހުގެ ޖަލްސާ އިރު އޮއްސުމާ ގާތްވެފައި ވަނިކޮށް އަލުން ފަށާ، ގާނޫނު އަސާސީ އަށް ބަދަލު ގެނައުމަށް ސަރުކާރުން ހުށަހެޅި ބިލަށް ފެންނަ ކަމަށް 78 މެންބަރުން ވޯޓު ދިން އިރު، ނުފެންނަ ކަމަށް ވޯޓު ދީފައިވަނީ 13 މެމްބަރުންނެވެ.

ތަޅުމުގައި ބިލު ފާސް ކުރަން ނެގި ވޯޓުގައި ބިލާ ދެކޮޅަށް ވޯޓު ދިނީ އެމްޑީޕީ ގެ މެންބަރުންގެ އިތުރުން އަމިއްލަ ގޮތުން މަޖިލީހަށް ހޮވިވަޑައިގެންނެވި އައްޑޫ މީދޫ ދާއިރާގެ މެންބަރު އަބްދުއްރަހުމާން އެވެ.

ސަރުކާރުން ގާނޫނު އަސާސީ އަށް ގެނައި ބަދަލުތަކުގެ ތެރޭގައި، މެންބަރުން ޕާޓީ ބަދަލުކުރުމުން ނުވަތަ ޕާޓީން ވަކިކުރުމުން ނުވަތަ އެހެން ޕާޓީއަކަށް ގުޅުމުން މެމްބަރުކަން ގެއްލޭ ގޮތް ހެދުމާއި، ރާއްޖޭގެ ސަރަހައްދުން ބައެއް ދޫކޮށްލެވޭނީ ރައްޔިތުންގެ މަޖިލީހުން ފާސްކޮށްގެން ކަމަށް ކަނޑައެޅުމާއި، ރާއްޖޭގައި ބޭރު ގައުމެއްގެ އެއްވެސް އަސްކަރީ ބަޔަކަށް ތިބެވޭނީ މަޖިލީހުން ފާސްކޮށްގެން ކަމަށް ގާނޫނު އަސާސީގައި ކަނޑައެޅުން ހިމެނެއެވެ.

ގާނޫނު އަސާސީ އަށް ބަދަލު ގެނައުމަށް ހުށަހެޅި ބިލުގެ މަސައްކަތައް މަޖިލީހުގައި ހޭދަވެފައިވަނީ ގާތްގަނޑަކަށް ނުވަ ވަރަކަށް ގަޑީއިރުއެވެ.

ރައްޔިތުންގެ އެއްވެސް މަޝްވަރާ އެއް ނެތި، އަދި ކަމާބެހޭ ފަރާތްތަކުގެ ޚިޔާލު ހޯދުމަށް އެއްވެސް ފުރުސަތެއް ނުދީ، ގާނޫނު އަސާސީ އަށް ކުއްލި ގޮތަކަށް ބޮޑެތި ބަދަލުތަކެއް ގެންނަން މުއިއްޒުގެ ސަރުކާރުން އުޅުމުން އެކަމާ ދެކޮޅަށް "ގާނޫނު އަސާސީގެ ދިފާއުގައި" ރައްޔިތުންގެ މަޖިލިސް ހުންނަ ސަރަހައްދަށް އެމްޑީޕީގެ މެމްބަރުން ވަނީ ބުދަ ދުވަހުގެ މެންދުރު ފަހު އެއްވެ އިހްތިޖާޖު ކޮށްފައެވެ. މި އިހްތިޖާޖަށް ހުރަސް އެޅުމަށް ސަރުކާރަށް ތާއީދު ކުރާ ބަޔަކު ވަނީ އެތަނަށް ގޮސް ހަމަ ނުޖެހުން އުފެއްދުމަށް މަސައްކަތް ކޮށްފައެވެ.

މި ބިލު، ރައީސުލްޖުމްހޫރިއްޔާ ތަޞްދީޤުކުރެއްވުމާ ގުޅިގެން، މިހާރު ވަނީ ދިވެހިސަރުކާރުގެ ގެޒެޓުގައި ޝާއިޢު ކޮށްފައެވެ. މި ޤާނޫނަށް ޢަމަލުކުރަން ފަށާނީ، ދިވެހިސަރުކާރުގެ ގެޒެޓުގައި ޝާއިޢުކުރާ ދުވަހުން ފެށިގެންނެވެ.