އަނިޔާ އަށް ފަހު، އަލުން ޤައުމީ ޓީމަށް ކުޅުމުގެ ފުރުސަތު ލިބުމުން ހިތްހަމަ ޖެހިފައި ހުރި ކަމަށް، ނެދަލެންޑްސްގެ މިޑްފީލްޑަރު ފެރެންކީ ޑި ޔޯން ބުނެފި އެވެ.

އޭނާ މިހެން ބުނީ ޔުއެފާ ނޭޝަންސް ލީގުގެ ގުރޫޕް ސްޓޭޖުގައި ނެދަލެންޑްސް އިން ހަންގޭރީއާ ދެކޮޅަށް ކުޅުނު މެޗަށްފަހު އެވެ. ހަތަރު ލަނޑުން ނެދަލެންޑްސް މޮޅުވި އެ މެޗުގެ ފުރަތަމަ 11 ގައި ހިމެނިގެން ޑި ޔޯން ވަނީ ކުޅެފަ އެވެ. ނަމަވެސް މެޗުގެ ވަކި ހިސާބަކުން އޭނާ ވަނީ ބަދަލުކޮށްފަ އެވެ. މިއަހަރުގެ ކުރީ ކޮޅު ޑި ޔޯންގެ ކަކުލަށް ލިބުނު އަނިޔާއެއްގެ ސަބަބުން އޭނާ އަށް ވަނީ ކުޅުމާ ދުރުގައި ހުންނަން ޖެހިފަ އެވެ. ނަމަވެސް މިދިޔަ އޮކްޓޫބަރު މަހުގެ ތެރޭގައި އޭނާ ވަނީ އަލުން އެނބުރި ކުޅުމުގެ ތެރެއަށް އައިސްފަ އެވެ.

އޭގެ ފަހުން ޤައުމީ ޓީމުގައި ޑި ޔޯން ކުޅުނު ފުރަތަމަ މެޗަކީ އެއީ އެވެ. ޑި ޔޯން ބުނީ، އަލުން އެނބުރި ޤައުމީ ޓީމަށް ކުޅުމުގެ ފުރުސަތު ލިބުމުން އުފާވާ ކަމަށެވެ. އޭނާ ބުނީ އަލުން އެނބުރި ފޯމަށް އައުމަށްޓަކައި ގިނަ މެޗުތަކެއް ކުޅެން ބޭނުންވާ ކަމަށާއި، ގިނަ މެޗުތަކެއް ކުޅުމުގެ ފުރުސަތު ލިބޭ ވަރަކުން އޭނާގެ އަސްލު ކުޅުން ވެސް ފެންނާނެ ކަމަށެވެ. އޭނާ ބުނީ ދެން ކުޅޭ މެޗުގެ ފުރަތަމަ 11 ގައި ހިމެނިގެން ނުކުޅޭނެ ކަމަށާއި، އެހެން ނަމަވެސް ޤައުމީ ޓީމާ އެކު ހުންނާނެ ކަމަށެވެ.

މީގެ އިތުރުން ޑި ޔޯން ބުނީ އަދިވެސް އޭނާ ކުޅެން ޖެހެނީ އަނިޔާ އަށް ވަރަށް ބޮޑު ސަމާލުކަމެއް ދީގެން ކަމަށެވެ. ޚާއްސަކޮށް ކުޅުމުގެ ތެރޭގައި ވެސް ވަރަށް ބޮޑަށް ސަމާލުވާން ޖެހޭނެ ކަމަށާއި، ކަކުލަށް ލިބުނު އަނިޔާގެ "ތަދު" ކޮންމެ ވެސް ވަރަަކަށް އަދިވެސް އިޙުސާސް ކުރެވޭ ކަމުގައި އޭނާ ބުންޏެވެ. އޭނާ ބުނީ މިހާރު އޭނާ ހުރި ޙާލަތުގައި ސަޕޯޓަރުން ވެސް ކަންބޮޑުވާނެ ކަމަށާއި، އެމީހުން ބޭނުންވާ ފެންވަރުގެ ކުޅުމެއް ދައްކަން ދުވަސް ކޮޅެއް ނަގާނެ ކަމަށެވެ.

ސްޕެއިންގެ ބާސެލޯނާ އަށް ވެސް ކުޅެމުން އަންނަ ޑި ޔޯން އަކީ އެ ކުލަބުގެ އިތުރުން، ޤައުމީ ޓީމުގެ މެދު ތެރޭގައި ވެސް އެންމެ އިސް ދައުރެއް އަދާ ކުރާ އެއް ކުޅުންތެރިޔާ އެވެ. ޑި ޔޯން ވަނީ މިހާތަނަށް ޤައުމީ ޓީމަށް ކުޅެދިން 54 މެޗުގައި ދެ ލަނޑު ޖަހައިފަ އެވެ. ނެދަލެންޑްސްގެ ޤައުމީ ޓީމުގެ މިހާރުގެ ކޯޗު ރޮނާލްޑް ކޫމަންގެ ޕްލޭންގައި ހިމެނޭ މުހިންމު ކުޅުންތެރިންގެ ތެރޭގައި ވެސް ޑި ޔޯން އަކީ ހިމެނޭ ކުޅުންތެރިޔެކެވެ.