ނިމިދިޔަ ސަރުކާރުން ދިވެހި އަސްކަރިއްޔާ އަށް އަޅާނުލާ ކަމަށް ފާހަގަކުރައްވާ ޝަހީދުންގެ ދުވަހު ރައީސް ޑރ.މުހައްމަދު މުއިއްޒު ހެއްދެވީ އިތުރުފުޅުކަމަށް ކުރީގެ ރައީސް އިބްރާޙިމް މުހައްމަދު ޞާލިހު ވިދާޅުވެއްޖެއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަދައްކަވަމުން ރައީސް ޞާލިހު ވަނީ އިންޑިއާ އަށް ރާއްޖެ އަޅުވެތިވާ ކަމަށް ބުނެ އެ މަނިކުފާނުގެ ސަރުކާރާއި މެދު އިދިކޮޅު ފަރާތްތަކުން ދެއްކި ވާހަކަ އާއި އަސްކަރިއްޔާ އަށް ނިމިދިޔަ ސަރުކާރުން އިހުމާލުވެފައިވާ ކަމަށް ބުނެ ދެއްކި ވާހަކަތަކަށް ރައްދު ދެއްވާފައެވެ. އެގޮތުން އިންޑިއާ އަކީ ރާއްޖޭގެ އެންމެ ގާތް އެއް ޤައުމު ކަމަށާއި އެ ޤައުމަކީ ރާއްޖެ އަށް ދިމާވި އެކި ހާލަތްތަކުގައި އެންމެ ފުރަތަމަ އެންމެ ގާތުން ރާއްޖެ އަށް އެހީތެރިވާ ޤައުމުކަމަށް އެ މަނިކުފާނު ވަނީ ފާހަގަކުރައްވާފައެވެ.
ރާއްޖެ އަށް ބޮޑުކަމެއް ދިމާވާ ކޮންމެ ދަނޑިވަޅެއްގައި އެންމެ ރަނގަޅަށް އެހީތެރިވަނީ އެ ޤައުމުން ކަމަށް އެ މަނިކުފާނު ވިދާޅުވިއެވެ. ރާއްޖޭގައި އިންޑިއާ މިލިޓަރީ މީހުން ތިބިކަމަށާއި އެއީ ހަތިޔާރު އެޅި ބައެއް ކަމަށް ބުނެ ދެއްކި ވާހަކަ އަކީ އަސާސެއް ނެތް ވާހަކަތަކެއްކަން މިހާރު ހާމަަވަމުންދާ ކަމަށް އެ މަނިކުފާނު ވިދާޅުވިއެވެ. އެހެންނަމަވެސް އިންޑިއާގެ ޓެކްނިކަލް މީހުން ރާއްޖޭގައި ޚިދުމަތްކުރަމުން އައިސްފައިވާ ކަމަށާއި އޭގެ ތެރޭގައި މިލިޓަރީ ޑޮކްޓަރުންނާއި ނަރުހުން ހިމެނޭ ކަމަށް އެ މަނިކުފާނު ވިދާޅުވިއެވެ. ހެލިކޮޕްޓަރާއި ޑޯނިއާ ވެސް ފުރަތަމަ ގެނައީ އެ މަނިކުފާނުގެ ވެރިކަމުގައި ނޫންކަން ރައީސް ޞާލިހު ވަނީ ފާހަގަކުރައްވާފައެވެ. އުތުރުތިލަފަޅުގައި މިލިޓަރީ ބޭސް އެއް އަޅާކަމަށް ބުނެ ދެއްކި ވާހަކަތަކުގެ ވެސް އަސްލެއް ނެތް ވާހަކަތަކެއްކަން މިއަދު އެނގޭ ކަމަށް އެ މަނިކުފާނު ވިދާޅުވިއެވެ. ސަބަބަކީ އުތުރު ތިލަފަޅު އެގްރީމެންޓްގެ މަސައްކަތް އެއްވެސް އަކުރަކަށް ފިއްޔަކަށް ބަދަލުގެނައުމަކާއި ނުލާ މިއަދު ކުރިއަށް ގެންދިއުން ކަަމަށް ރައީސް ޞާލިހު ވަނީ ވިދާޅުވެފައެވެ.
މީގެ އިތުރުން ނިމިދިޔަ ސަރުކާރުން ދިވެހި އަސްކަރިއްޔާ އަށް އަޅާ ނުލާ ކަަމަށް ބުނެ ދެއްކި ވާހަކަ އަކީ ދޮގެއްކަން އަސްކަރިއްޔާގެ އިސް ބޭފުޅުންނަށް ވެސް އެނގިލައްވާނެ ކަމަށް ރައީސް ޞާލިހު ވަނީ ވިދާޅުވެފައެވެ.
ރައީސް މުއިއްޒުގެ ނޮވެމްބަރ 11އިގެ ސްޕީޗްގައި އަޅުގަނޑު އަޑުއެހިން ވިދާޅުވާތާ، މިދިޔަ އަޅުގަނޑުމެންގެ ސަރުކާރަކީ އެއްވެސް އަޅާލުމެއް ނެތޭ ސިފައިންގެއަކަށް. ތަންތަން ވީރާނާވެގެންނޭ ދަނީ. އަޅުގަނޑު ޔަޤީންކަމާއި އެކީ މި ދަންނަވަނީ، މިހާރު އެ ތިއްބެވި ޖެނެރަލުން ވެސް، އޮފިސަރުން ވެސް ހަގީގަތަށް ތެދަށް ވާހަކަ ދައްކަވަންޏާ ވިދާޅުވާނެ މިދިޔަ 5 އަހަރަކީ ސިފައިންނަށް އެންމެ އަޅާލި، ވަސީލަތްތައް އެންމެ ރަނގަޅަށް ހޯދާދިން ސަރުކާރޭ. އެހެންނަމަވެސް އެ ދޮގު ވެސް އެ އޮތީ ހައްދަވާފަ ޕޯޑިއަމްގައި ހުރެގެން. އަޅުގަނޑަށް ހަމަ ޔަގީން އެ ބޭފުޅުން ވިދާޅުވާނެ ރަނގަޅަށް ވަކި އަތަކަށް ނުޖެހި ސިޔާސީ ވިސްނުމެއް ނެތި އެ ބޭފުޅުން ވާހަކަދައްކަވާ ކަމަށް ވަންޏާ ވިދާޅުވާނެ.ކުރީގެ ރައީސް އިބްރާހިމް މުޙައްމަދު ޞާލިހު
ރައީސް ޞާލިހު އެފަދައިން ވިދާޅުވީ މި ސަރުކާރުން ސިފައިންނަށް ވަރަށް ގިނަގުނަ ކަންތައްތަކެއް ކޮށްދޭ ކަމަށާއި ކުރިން ސިފައިންނަށް އަޅާ ނުލާކަމަށް ސިފަކުރައްވާ ނޮވެމްބަރ 3ގެ މުނާސަބަތުގައި ބޭއްވި ޖަލްސާގައި ރައީސް މުއިއްޒު ދެއްކެވި ވާހަކައަށް އިޝާރާތްކުރައްވައެވެ. ރައީސް މުއިއްޒު ވަނީ މުޅި ރާއްޖޭގެ އެކި ކަންކޮޅުތަކުގައި ހުރި ސިފައިންގެ މަރުކަޒުތައް ފަހަކަށްއައިސް ނުބެލެހެއްޓުމުގެ ސަބަބުން، މި ވޭތުވެދިޔަ ހަތަރު ފަސް އަހަރެއްގެ ތެރޭގައި ވަރަށް ބޮޑަށް ވީރާނާވާން ފަށާފައިވާ ކަމަށް ވިދާޅުވެފައެވެ. އެކަމާ ގުޅިގެން މިހާރު އެކުވެރި ދައުލަތްތަކުގެ އެހީތެރިކަމަށް މިހާރުވާނީ އެދިފައި ކަމަަށާއި އެކަންކަން މި އަންނަ އަހަރުގެ ތެރޭގައި އެ މަރުކަޒުތަކާއި ގުޅޭ މަސައްކަތްތައް ހިނގައިގަންނާނެ ކަަމަށް ވިދާޅުވިއެވެ.
