އިޓަލީވިލާތުގައި ރާއްޖޭގެ އެމްބަސީއެއް ހުޅުވުމުގެ މަސައްކަތް ކުރަމުންދާކަން ސަރުކާރުން ހާމަކޮށްފިއެވެ.

އެކަން ހާމަކުރައްވާފައި ވަނީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއެވެ. ރައީސުލްޖުމްހޫރިއްޔާ އެފަދައިން ވިދާޅުވީ، ޖުމްހޫރީ ދުވަހުގެ ޚާއްސަ ޖަލްސާގައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވި ގޮތުގައި، އެމަނިކުފާނުގެ އަމާޒަކީ ހުރިހާ ގައުމުތަކާއި އެކު ގާތް ގުޅުމެއް ބޭއްވުމެވެ. އަދި ޤައުމުތަކާއި އެކުޚާރިޖީ ގުޅުން ވަރުގަދަކުރެއްވުމަކީ މި ސަރުކާރުގެ އަމާޒެއް ކަމަށް ވިދާޅުވިއެވެ. އެހެންކަމުން ބޭރުގެ ޤައުމުތަކުގައި އެމްބަސީތައް ހުޅުވުމުގެ މަސައްކަތް ކުރައްވާ ކަމަށް އެ މަނިކުފާނު ފާހަގަކުރެއްވިއެވެ. ރައީސް ވަނީ އިޓަލީވިލާތުގައި ރާއްޖޭގެ އެމްބަސީއެއް ހުޅުވުމަށް މިހާރު ހުއްދަ ލިބިފައިވާކަން ފާހަގަކުރައްވާފައެވެ. އެއާއި އެކު އިޓަލީގައި ރާއްޖޭގެ އެމްބަސީއެއް ހުޅުވުމަށްޓަކާ ފުރިހަމަކުރަން ޖެހޭ މަސައްކަތް ކުރައްވަމުން ގެންދަވާކަމަށް ވިދާޅުވިއެވެ.

އެމަނިކުފާނު ވިދާޅުވީ އެއީ ރާއްޖޭގެ ޓޫރިޒަމަށް ވަރަށް މުހިންމު ކަމެއް ކަަމަށާއި އެކަން ކުރަން ނިންމީ އެ ސަބަބާއި ހުރެ ކަމަށެވެ. ރައީސް ވަނީ ރާއްޖޭގެ ވިޔަފާރިއަށް މުހިންމު ގައުމުތަކާ އެކީގައި ދިވެހިންނަށް ބޭނުންތެރި ތަންތަނުގައި ޤައުމަށް ފައިދާހުރި ތަންތަނުގައި އެމްބަސީތަކާއި ހައި ކޮމިޝަންތައް ހުޅުވާނެ ކަމަށް ވިދާޅުވެފައެވެ.

އިޓަލީވިލާތަކީ ރާއްޖެއަށް އެންމެ ގިނައިން ފަތުރުވެރިން އަންނަ އެއް ޤައުމެވެ. 2024 ވަނަ އަހަރަށް ބަލާ ނަމަ އަހަރުގެ މިހާތަނަށް އިޓަލީވިލާތަކީ ރާއްޖެއަށް 5 ވަނައަށް އެންމެ ގިނަ ފަތުރުވެރިން އައި ޤައުމެވެ. އެގޮތުން އިޓަލީ އިން މިހާތަނަށް ރާއްޖެއަށް 116،195 ފަތުރުވެރިން ވަނީ އައިސްފައެވެ. ރާއްޖޭން ބޭރުގެ ޤައުމުތަކުގައި ރާއްޖޭގެ 16 އެމްބަސީ އެއް މިހާރު އެބަ ހުއްޓެވެ.