ސައުދީ ޕްރޯ ލީގުގައި އަލް ރިޔާދާ ދެކޮޅަށް ކުޅުނު މެޗުން މޮޅުވެ، އަލް ނަޞްރުން ލީގު ތާވަލްގެ ތިން ވަނަ މަގާމުގައި ދެމި އޮވެއްޖެ އެވެ.
ހުކުރު ދުވަހުގެ ރޭ އަލް ރިޔާދާ ދެކޮޅަށް ކުޅުނު މެޗު އަލް ނަޞްރުން ކާމިޔާބު ކުރީ 1-0 އިންނެވެ. އެއީ މެޗުގެ ފުރަތަމަ ހާފުގައި އަލް ނަޞްރު ޖެހި ލަނޑުންނެވެ.
އަލް ނަޞްރުގެ ފަރާތުން ރަނގަޅު ކުޅުމެއް ފެނުނު މެޗުގައި އެ ޓީމުން ވަނީ ލަނޑު ޖަހާނެ ފުރުސަތުތަކެއް ތަނަވަސްކޮށްފަ އެވެ. އަލް ރިޔާދުގެ ގޯލަށް އަމާޒުކޮށް އަލް ނަޞްރުން ވަނީ ދިހަ ހަމަލާއެއް ފޮނުވާލައިފަ އެވެ. މެޗުގެ ފުރަތަމަ ހާފުގައި އަލް ނަޞްރަށް ކުޅެމުން އަންނަ ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ އަށް ވަނީ ލަނޑު ޖަހަން ފުރުސަތު ލިބިފަ އެވެ. މެޗުގެ ފުރަތަމަ ހާފުގެ ފުރިހަމަ ވަގުތު ހަމަވާން ހަތަރު މިނެޓަށް ވެފައި ވަނިކޮށް، އަލް ނަޞްރުގެ ލަނޑު ޖެހީ ސެނެގާލްގެ ސަޑިއޯ މާނޭ އެވެ. އޭނާ އެ ލަނޑު ޖަހަން ފުރުސަތު ތަނަވަސްކޮށްދިނީ ޢަބްދުއް ރަހުމާން ޣަރީބު އެވެ.
މޮޅާއެކު އަލް ނަޞްރު އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ލީގުގައި ކުޅުނު 10 މެޗުން 22 ޕޮއިންޓު ހޯދައިގެންނެވެ. މި ސީޒަންގެ ސައުދީ ލީގުގައި އަލް ނަޞްރު ވަނީ ހަ މެޗުން މޮޅުވެފަ އެވެ. ހަތަރު މެޗު އެއްވަރުވެފައިވާއިރު، އެއްވެސް މެޗަކުން އެ ޓީމު ބަލިވެފައެއް ނުވެ އެވެ.
