އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި އިޒްރޭލާ ދެކޮޅަށް ދެކުނު އެފްރިކާއިން އުފުލާފައިވާ ދައުވާ ގައި މިއަހަރު ނިމުމުގެ ކުރިން ބައިވެރިވުމަށް އަޔަލެންޑުން ގަސްދުކުރާ ކަމަށް އެ ޤައުމުގެ ފޮރިން މިނިސްޓަރު ވިދާޅުވެއްޖެއެވެ.
މައިކަލް މާޓިންގެ މިކަން ހާމަކުރެއްވީ، "އިޒްރޭލުން ޣައްޒާގައި ލޯތަކުގެ ކުރިމަތީގައި ގަތުލުއާންމު ހިންގަމުންދާ ގެންދާ ކަމަށް ބުނެ" އެ ގައުމުގެ ގާނޫނު ހަދާ މަޖިލީހުން ގަރާރެއް ފާސްކުރުމާ އެކުގައެވެ.
ޑިސެމްބަރު މަހު، ދަކުނު އެފްރިކާ އިން އައިސީޖޭ ގައި އުފުލި ދައުވާގައި ބުނެފައިވަނީ ޣައްޒާގައި ހިނގަމުންދާ ހަނގުރާމައިގައި އިޒްރޭލުން ވަނީ 1948 ވަނަ އަހަރުގެ އދ. ގެ ޖެނޮސައިޑް ކޮންވެންޝަނާ ޚިލާފުވެފައިވާ ކަމަށެވެ. އިޒްރޭލުން ގެންދަނީ މި ތުހުމަތު ދޮގު ކުރަމުންނެވެ.
ސްޕެއިން، ބޮލީވިއާ، ކޮލަމްބިއާ، މެކްސިކޯ، ތުރުކީ، ޗިލީ އަދި ލިބިޔާ ފަދަ އެތައް ޤައުމެއް މިހާރު ވަނީ އިޒްރޭލާ ދެކޮޅަށް މި ދައުވާގައި ބައިވެރިވެފައެވެ.
އިޒްރޭލާ ދެކޮޅަށް މައްސަލަ ސާބިތު ކުރުމަށް ބޭނުންވާ ލިޔުންތައް ދެކުނު އެފްރިކާ އިން ހުށަހެޅުމާއެކު އަޔަލެންޑުން ވެސް ކޯޓަށް ލިޔުންތައް ހުށަހަޅާނެ ކަމަށް އެ ގައުމުން ވަނީ ބުނެފައެވެ.
ދެކުނު އެފްރިކާ އިން ހުށަހަޅާފައިވާ މައްސަލައިގައި އަޔަލެންޑުން ބައިވެރިވުމަށް ނިންމީ "ވަރަށް ތަފްސީލީ އަދި ފުރިހަމަ ޤާނޫނީ ދިރާސާއެއްގެ މައްޗަށް ބިނާކޮށް" ކަމަށް މާޓިން އައިލެންޑްގެ ޕާލިމަންޓުގެ ދަށުގޭގައި ވާހަކަފުޅު ދައްކަވަމުން ވިދާޅުވިއެވެ.
އަޔަލެންޑަކީ ކޯޓުގެ މަސައްކަތަށް ވަރަށް ބޮޑަށް ތާއީދުކުރާ ޤައުމެއް ކަމަށާއި އަދި ބައިނަލްއަޤްވާމީ ޤާނޫނުތަކަށް އިހްތިރާމް ކުރުމާއި ޖަވާބުދާރީ ކުރުވުމަށް ވަރަށް ބޮޑަށް އަހަންމިއްޔަތުކަން ދޭ ޤައުމެއް ކަމަށްވެސް މާޓިން ވިދާޅުވިއެވެ.
ދެކުނު އެފްރިކާއިން ހޯމަ ދުވަހު އިޢުލާނުކޮށްފައިވަނީ، އިޒްރޭލުން ޣައްޒާގައި "ގަތުލުއާންމު" ހިންގާފައިވާ ކަމުގެ "ހެކި" ހިމެނޭ ލިޔުން އައިސީޖޭ އަށް ހުށަހަޅާފައިވާ ކަމަށެވެ.
