2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓެއްގެ ގޮތުގައި މިސަރުކާރުން ސިފަކުރި ނަމަވެސް ބަޖެޓުގައި ގެދޮރުވެރިކަމުގެ މަޝްރޫއުތައް ހިމަނާފައި އޮތީ މިދިޔަ ތިން އަހަރަށް ވުރެ ވެސް ދަށް އަދަދެއްގެ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އަމީރު ވަނީ ވަރަށް ތަފްސީލުކޮށް 2025 ވަނަ އަހަރަށް ސަރުކާރުން ހުށަހަޅާފައިވާ ބަޖެޓް ހިއްސާކޮށްދެއްވާފައެވެ.
އަމީރު ވިދާޅުވީ 2025 ވަނަ އަހަރުގެ ބަޖެޓަކީ ގެދޮރުވެރިކަމުގެ ބަޖެޓުގެ ގޮތުގައި ސިފަ ކުރި ނަމަވެސް ގެދޮރުވެރިކަމުގެ ބަޖެޓު ވޭތުވެދިޔަ 3 އަހަރަށް ވުރެ ދަށް ކަމަށެވެ. އަދި ވިދާޅުވީ ބަޖެޓުގައި ގެދޮރުވެރިކަމާއި ބޯހިޔާވަހިކަމުގެ މަޝްރޫއުތަކަށް ހިމަނާފައި ވަނީ 2.7 ބިލިއަން ރުފިޔާ ކަމަށެވެ.
ސަރުކާރުން ފާހަގަކުރަމުން މިއައީ ވަރަށް ބޮޑަށް މިއީ ގެދޮރުވެރިކަމުގެ ބަޖެޓެކޭ ބުނާއިރު، ބަޖެޓުގެ ތާވަލުގެ 4.2 އެއީ (އެކިއެކި ބައިބަޔަށް ހަރަދު ކުރާ ގޮތުގެ ޖުމްލަ ހިސާބު ) އަޅުގަނޑުމެން ބަލާއިރު، މިފެންނަނީ ގެދޮރުވެރިކަމާި ބޯހިޔާވަހިކަމަށް ބަޖެޓުގެ ހަރަދުގައި މުޅި ޖުމްލަ ކަނޑައަޅާފައިވަނީ 2.7 ބިލިއަން ރުފިޔާ. މިއީ ވޭތުވެދިޔަ 3 އަހަރަށް ވުރެ ކުޑަ އަދަދެއްގެ. މިސާލަކަށް ތިބޭފުޅުން ބައްލަވާ 2022 ވަނަ އަހަރު އަޅުގަނޑުމެން ހަރަދުކޮށްފައި 3 ބިލިއަން ރުފިޔާ. 2023 ވަނަ އަހަރު 3.4 ބިލިއަން ރުފިޔާ، 2024 ވަނަ އަހަރު 3.4 ބިލިއަން ރުފިޔާ. އެކަމަކު 2025 ވަނަ އަހަރަށް ހުށަހަޅާފައި މިއޮތް ބަޖެޓުގައި ގެދޮރުވެރިކަމަށް ޖުމްލަ ބަޖެޓަށް މިއިންނަނީ 2.7 ބިލިއަން ރުފިޔާ. އެހެންވީމަ ކިހިނަކުންތޯ ގެދޮވެރިކަމުގެ ބަޖެޓެއްގެ ގޮތުގައި މި ބަޖެޓް ސިފަކޮށްގެން ސަރުކާރުން އެގޮތަށް މިފާހަގަކުރަމުން މިދަނީ. އަޅުގަނޑުމެން މިދިޔަ 2024، 2023 2022 އަށް ބަލާލި ކަމަށް ވިޔަސް އަޅުގަނޑުމެންނަށް މިފެންނަނީ ގެދޮރުވެރިކަމަށް އެއަހަރުތަކުގައި މާބޮޑަށް ހަރަދުކޮށްފައިވާތަން. އެހެންވީމަ އެވެސް ވަރަށް ބޮޑު އޮޅުވާލުމެއް.ކުރީގެ ފިނޭންސް މިނިސްޓަރު އިބްރާހިމް އަމީރު
ޕީއެސްއައިޕީ މަޝްރޫއުތަކުގެ ދެބައިކުޅަ އެއްބައި މަދުވެގެން 50 އިންސައްތަ ކޮންމެ އަހަރަކު ކަނޑައަޅާނީ ގެދޮރު ބިނާ ކުރުމަށް ކަމަށް ރައީސް ޑރ. މުހައްމަދު މުއިއްޒު ވިދާޅުވެފައިވާތީ އެކަމަށް ރައްދުދެއްވައި އަމީރު ވިދާޅުވީ މިސަރުކާރުން މަސައްކަތް ކުރަނީ ހުށަހަޅާފައިވާ ބަޖެޓުން އަނެއްކާ ވެސް ބޮޑު އޮޅުވާލުމެއް އޮޅުވާލުމަށް ކަމަށާއި، އެއަދަދަށް ބަޖެޓްކޮށްފައިނުވާ ކަމަށެވެ.
2025 ވަނަ އަހަރަށް ހުށަހަޅާފައިވާ ބަޖެޓުގައި ޕީއެސްއައިޕީގެ ޖުމްލަ އަކީ 12.4 ބިލިއަން ރުފިޔާ. ރައީސް މުއިއްޒުގެ ވައުދަކީ 50 ޕަސެންޓް ޕީއެސްއައިޕީ ގެދޮރުވެރިކަމަށްށޭ. އެކަމަކު ޕީއެސްއައިޕީގެ ގޮތުގައި ގެދޮރު ބިނާ ކުރުމަށް ކަނޑައަޅާފައިވަނީ 1.8 ބިލިއަން ރުފިޔާ. އެއީ ހުށަހަޅާފައިވާ ބަޖެޓްގެ 15 ޕަސެންޓްކުރީގެ ފިނޭންސް މިނިސްޓަރު އިބްރާހިމް އަމީރު
މީގެ އިތުރުން އަމީރު ވިދާޅުވީ މިސަރުކާރުން ހަރަދު ބޮޑުކޮށްފައިވަނީ އިދާރީ ކަންކަމަށް ކަމަށެވެ.
އެގޮތުން އިގްތިސާދީ ތަރައްގީއަށް ހޭދަކުރާ މިންވަރު 2024 އަށްވުރެ 18 ޕަސެންޓް ދަށް ކަމަށާއި، ގެދޮރުވެރިކަމަށް ހޭދަކުރާ މިންވަރު 2024 އަށް ވުރެ 20 ޕަސެންޓް ދަށް ކަމަށެވެ. އަދި އިދާރީ ކަންކަމަށް ކުރާ ހަރަދު 23 ޕަސެންޓް އިތުރުވެފައިވާއިރު، ހަރަދު އިތުރު ކުރަނީ ރައްޔިތުންނާ ގުޅުން ނެތް ދައުލަތުގެ އޮފީސްތަކުގެ ހަރަދުތަކަށް ކަމަށާއި، ސަރުކާރުގެ ވެރިންގެ ބޭނުންތަކަށް ކަމަށް އޭނާ ވިދާޅުވިއެވެ.
