ޔުއެފާ ޗެމްޕިއަންސް ލީގުގައި އިންޓަ މިލާނާ ދެކޮޅަށް ކުޅުނު މެޗުން އާސެނަލް ބަލިވެއްޖެ އެވެ.

އިންޓަ މިލާާންގެ އަމިއްލަ ދަނޑުގައި ބުދަ ދުވަހުގެ ރޭ ކުޅުނު މެޗުގައި އެ ޓީމުން އާސެނަލްގެ މައްޗަށް ކުރި ހޯދީ 1-0 އިންނެވެ. އެއީ މެޗުގެ ފުރަތަމަ ހާފުގައި އިންޓަ އިން ޖެހި ލަނޑާ އެކު އެވެ.

މެޗު ފަށައިގެން ދެ ޓީމުން ވެސް ރަނގަޅަށް ކުޅެމުން ދިޔައިރު، މެޗުގެ ފުރަތަމަ ހާފުގެ އިތުރު ވަގުތުގައި އިންޓަ އަށް ވަނީ ޕެނަލްޓީއެއް ލިބިފަ އެވެ. އެއީ އާސެނަލްގެ އޭރިޔާ ތެރެއިން އެ ޓީމުގެ މިކޭލް މެރީނޯ އަތުގައި ބޯޅަ ޖެހުމުން ރެފްރީ ދިން ޕެނަލްޓީ އެކެވެ. އެ ޕެނަލްޓީ ކާމިޔާބުކޮށް، އިންޓަ އަށް ކުރި ހޯދައިދިނީ ހަކަން ޗަނޮނޮގްލޫ އެވެ.

އޭގެ ފަހުން ވެސް މެޗުގައި އާސެނަލް އިން ވަނީ ލަނޑު ޖެހުމަށް ފުރުސަތުތަކެއް ތަނަވަސްކޮށްފަ އެވެ. މެޗުގައި އާސެނަލް އިން ވަނީ ވަރަށް ބޮޑަށް ޕެނަލްޓީ އަކަށް ޑިމާންޑު ކޮށްފަ އެވެ. އެއީ އިންޓަގެ އޭރިޔާ ތެރެއިން އެ ޓީމުގެ ގޯލު ކީޕަރު އާސެނަލްގެ ކުޅުންތެރިޔަކަށް ފައުލް ކުރި ކަމަށް ބުނެ އެވެ. ޕެނަލްޓީ އަކަށް އާސެނަލް އިން ޑިމާންޑު ކުރި ނަމަވެސް، ރެފްރީ ނިންމީ ޕެނަލްޓީ ނުދިނުމަށެވެ. އެއީ ފައުލެއްތޯ ޔަޤީން ކުރުމަށް ވީޑިއޯ އެސިސްޓެންޓް ރެފްރީ (ވީއޭއާރު) ވެސް ބެލުމަށްފަހު އެވެ.

އިންޓަ އަތުން ވީ ބައްޔާ އެކު އާސެނަލް އޮތީ ލީގު ތާވަލްގެ 12 ވަނަ މަގާމުގަ އެވެ. އެއީ މިހާތަނަށް ކުޅުނު ހަތަރު މެޗުން ހަތް ޕޮއިންޓާ އެކު އެވެ. ހަތަރު މެޗުގެ ތެރެއިން އާސެނަލް ވަނީ ދެ މެޗުން މޮޅުވެފަ އެވެ. އެއް މެޗުން އެއްވަރުވެފައިވާއިރު، އަނެއް މެޗުން ވަނީ ބަލިވެފަ އެވެ. އާސެނަލް އަތުން ހޯދި މޮޅާ އެކު އިންޓަ އޮތީ ފަސް ވަނައިގަ އެވެ. އެއީ މިހާތަނަށް ކުޅުނު ހަތަރު މެޗުން 10 ޕޮއިންޓު ހޯދައިގެންނެވެ.