ޔުއެފާ ޗެމްޕިއަންސް ލީގުގައި ޖަރުމަނުގެ ބަޔާން މިއުނިކާ ދެކޮޅަށް ނިކުންނައިރު، ބާސެލޯނާ އާއެކު ކާމިޔާބު ހޯދަން ބޭނުންވެފައި ހުރި ކަމަށް ހަންސީ ފްލިކް ބުނެފި އެވެ.
ފްލިކް ވަނީ މީގެ ކުރިން ބަޔާނަށް ވެސް އިރުޝާދު ދީފަ އެވެ. އެ ކުލަބާ އެކު އޭނާ ވަނީ ޔުއެފާ ޗެމްޕިއަންސް ލީގު ވެސް ކާމިޔާބު ކޮށްފަ އެވެ. ފްލިކްގެ އިރުޝާދުގެ ދަށުން ބަޔާނުން ވަނީ ބާސެލޯނާއާ ދެކޮޅަށް ކުޅެ، ކާމިޔާބު ވެސް ހޯދައިފަ އެވެ. ބަޔާން ދޫކޮށްލުމަށްފަހު ޖަރުމަނު ޤައުމީ ޓީމުގައި ވެސް ފްލިކް މަސައްކަތް ކުރި އެވެ. ޖަރުމަނު ޤައުމީ ޓީމުން ވަކިވުމަށްފަހު، ބާސެލޯނާގެ ކޯޗުކަމާ ފްލިކް ހަވާލުވީ މި ސީޒަނާ ދިމާކޮށެވެ.
ބުދަ ދުވަހުގެ ރޭ ބަޔާނާ ދެކޮޅަށް ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ފްލިކް ބުނީ، އޭނާގެ ޙަޔާތުގައި އަދި ކޯޗިން ކެރިއަރުގައި ބަޔާން އަކީ ތަފާތު ޚާއްސަ ކަންތަކެއް އޮތް ޓީމެއް ކަމަށެވެ. ޚާއްސަކޮށް ބަޔާންގެ ކުޅުންތެރިން އަދި ވެރިންނާ ވެސް ވަރަށް ގާތް އަދި ރަނގަޅު ގުޅުމެއް އޮންނާނެކަން ފްލިކް ފާހަގަ ކުރި އެވެ. ބަޔާން އާއެކު ގިނަ ކާމިޔާބީތަކެއް ވެސް ހޯދުނުކަން ފާހަގަކޮށް ފްލިކް ބުނީ، އެއީ މާޒީ ކަމަށާއި، މިހާރު އޭނާ ހުރީ ބާސެލޯނާގައި ކަމަށެވެ.
މާޒީ އަކީ މާޒީކަން ފާހަގަ ކުރަމުން ފްލިކް އިތުރަށް ބުނީ، މިހާރު މަސައްކަތް ކުރަން ޖެހޭނީ ބާސެލޯނާ އަށް ކާމިޔާބު ހޯދަން ކަމަށެވެ. މާޒީގައި ކަންތައް ވެފައިވާ ގޮތް އެއްވެސް މީހަކަށް ބަދަލު ނުކުރެވުނު ނަމަވެސް، މާދަމާ ކަންތައް ވާނެ ގޮތް ބަދަލު ކުރުމަކީ ކުރެވިދާނެ ކަމެއް ކަމަށް ވެސް ފްލިކް ބުންޏެވެ. އޭނާ ބޭނުން ވަނީ ބާސެލޯނާގެ އެންމެހާ ކުޅުންތެރިން އެންމެ ފުރިހަމަ އަށް މެޗަށް ތައްޔާރުވެ، ބަޔާންގެ މައްޗަށް ކުރި ހޯދަން ކަމަށް ވެސް ފްލިކް ވަނީ ބުނެފަ އެވެ.
ބަޔާނާ ދެކޮޅަށް ނިކުންނައިރު، ޗެމްޕިއަންސް ލީގުގައި ބާސެލޯނާ އިން ކުޅުނު ފުރަތަމަ މެޗުގައި ވަނީ މޮނާކޯ އަތުން ބަލިވެފަ އެވެ. ނަމަވެސް ދެ ވަނަ މެޗުގައި އެ ޓީމުން ވަނީ ޔަންގް ބޯއީސްގެ މައްޗަށް ކުރި ހޯދައިފަ އެވެ. ބާސެލޯނާ އިން އަންނަނީ ފްލިކްގެ އިރުޝާދުގެ ދަށުން މި ސީޒަންގައި ރަނގަޅު ނަތީޖާތަކެއް ނެރެމުންނެވެ. ސްޕެނިޝް ލީގަށް ބަލާއިރު، މިވަގުތު އެއް ވަނައިގައި އޮތީ ވެސް ބާސެލޯނާ އެވެ.
