ބިދޭސީން ގެންނަ ފަރާތްތަކުން ދައްކަންޖެހި ނުދައްކާ ހުރި ފައިސާގެ ތެރެއިން، 1 ބިލިއަނަށް ވުރެ ގިނަ ރުފިޔާ އަނބުރާ ހޯދާފައިވާ ކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
ވިސާ ފީ އާއި، ކޯޓާ ފީ ފަދަ ފީތައް ނުދައްކައިގެން ދައުލަތަށް ލިބެންވާ 1.7 ބިލިއަނެއްހާ ރުފިޔާ ނުލިބިވާ ކަމަށާއި އެ ފައިސާ ހޯދުމަށް ކުރެވެން ހުރި މަސައްކަތްތައް ކުރަމުންދާ ކަމަށް އިހުސާން ވަނީ ވިދާޅުވެފައެވެ. މިހާރު ދައުލަތަށް ނުލިބި ވަނީ 703 މިލިއަނެއްހާ ރުފިޔާ ކަމަށް އިހުސާން ވިދާޅުވިއެވެ. މީގެ ތެރެއިން ފައިސާ ނުދައްކާ މީހުން އެކްސްޕެކްޓް ސިސްޓަމުން ބްލޮކްކޮށް ޚިދުމަތް ދިނުން ހުއްތާލާ ކަމަށާއި، ފައިސާ ދެއްކުމުން އެ މީހުންނަށް އަލުން ޚިދުމަތް ދެމުންދާ ކަމަށް އިހުސާން ވިދާޅުވިއެވެ. ރާއްޖޭގައި ވަޒީފާ އަދާ ކުރާ ބިދޭސީންނަށް ވަޒީފާ ދޭ ފަރާތުން ދައުލަތަށް ދައްކަންޖެހޭ ފީތަކާއި ޖޫރިމަނާގެ އަދަދު 100،000 ރުފިޔާއަށްވުރެ މަދުނަމަ އެފަރާތްތަކަށް ފައިސާ ދައްކާ ހަލާސް ކުރުމަށް ސަރުކާރުން ފުރުސަތު ދީފައިވާކަން ފާހަގަކޮށްލެވެއެވެ.
ވިސާ ފީ ކޯޓާ ފީ، ޖޫރިމަނާގެ ގޮތުގައި ދައުލަތަށް ނުލިބި ހުރި 1.7 ބިލިއަން ރުފިޔާގެ ތެރެއިން މިވަގުތަށް ދައުލަތަށް ނުލިބެނީ 703 މިލިއަން 7 ލައްކަ 99 ހާސް 250 ރ. 3 ޖޫން އިން ފެށިގެން މިހާތަނަށް ގާތްގަނޑަކަށް 1 ބިލިއަން ރުފިޔާ މިވަނީ ރިކަވަރ ކުރެވިފަ.ހޯމް މިނިސްޓަރ އަލީ އިހުސާން
"އޮޕަރޭޝަން ކުރަނގި" އަށް ބޭނުންވާ ސޮފްޓްވެއަރ ވެސް ތައްޔާރުކޮށް ނިމިފައިވާ ކަމަށް އޭނާ ވިދާޅުވިއެވެ. "އޮޕަރޭޝަން ކުރަނގި" މުޅި ރާއްޖެއަށް ފުޅާކުރީ ޖުލައި މަހުގެ ތެރޭގައެވެ. މިއީ، ރާއްޖޭގައި އުޅެމުން އަންނަ ހުރިހާ ބިދޭސީންގެ މައުލޫމާތު އެއް ކުރުމަށް ފަށާފައިވާ ޕްރޮގްރާމެކެވެ. މިނިސްޓަރ އިހުސާން ވަނީ އެ ޕްރޮގްރާމްގެ އެންމެ ފަހުގެ ތަފްސީލްތައް ނޫސްވެރިންނާއި ހިއްސާކުރައްވާފައެވެ. ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ހައްލުކުރުމުގެ މަސައްކަތް 3 އަހަރު ތެރޭގައި ކާމިޔާބުކުރުމަށް އަމާޒު ހިފާފައިވާކަން އެ މަނިކުފާނު ފާހަގަކުރެއްވިއެވެ. އެންމެ ފުރަތަމަ އެ މަސައްކަތް ފެށީ މުވައްޒަފުން ތަމްރީންކުރުމާއި ވެސް އެކުގައި ކަމަށް އިހުސާން ވަނީ ފާހަގަކުރައްވާފައެވެ. މިހާރު 82 ރަށެއްގައި އޮޕަރޭޝަން ކުރަނގި ހިނގަމުންދާ ކަމަށާއި 6801 ފަރާތުގެ މައުލޫމާތު މިހާތަނަށް ނަގާފައިވާ ކަމަށް އިހުސާން ވިދާޅުވިއެވެ. އަމާޒަކީ އެޕްރީލްގެ ކުރިން އެ އޮޕަރޭޝަންގެ ފުރަތަމަ ފޭސްގެ ހުރިހާ މަސައްކަތެއް ނިންމާލުން ކަމަށް ވެސް އިހުސާން ވަނީ ވިދާޅުވެފައެވެ. ނަމަވެސް އެ މަސައްކަތް ކުރިން އަމާޒުކުރި ވަރަށް ވުރެ އަވަހަށް ނިމޭނެ ކަމަށާއި ޖެނުއަރީގެ ނިޔަލަށް އެ މަސައްކަތް ނިންމާލެވޭނެ ކަމަށް ޤަބޫލުކުރެވޭ ކަމަށް އިހުސާން ވިދާޅުވިއެވެ.
މިދިޔަ މެއި މަހުގެ ދެވަނަ ދުވަހު ފެށި އެ ޕްރޮގްރާމަކީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ފުލުހުންނާއި މޯލްޑިވްސް އިމިގްރޭޝަނާއި ގުޅިގެން ކުރިއަށްގެންދާ ޕްރޮގްރާމެކެވެ. އެންމެ ފުރަތަމަ ކ. ހިންމަފުށީގަ ފެށި މި ޕްރޮގްރާމް މިހާރު ކ. މާފުށީގައިވެސް ވަނީ ކުރިއަށް ގެންގޮސްފައެވެ. މި އޮޕަރޭޝަން ފުޅާ ކޮށްފައި ވަނީ ކައުންސިލްތަކުގެ އެހީ އާއި އެކު ބިދޭސީންގެ މައުލޫމާތުތައް އެއް ކުރާ ގޮތަށެވެ. މީގެ އިތުރުން މި އޮޕަރޭޝަންގެ ދަށުން ބިދޭސީންގެ މައި ދަފްތަރެއް އެކުލަވާލެވޭނެއެވެ. މިހާރު ކައުންސިލްތަކަށް ވަނީ ފިންގާ ޕްރިންޓް މެޝިންތަކެއް ހަދިޔާ ކޮށްފައެވެ. މި އޮޕަރޭޝަން އަކީ ގަވާއިދާ ހިލާފަށް އުޅެމުންދާ ބިދޭސީން މަސައްކަތްތެރިންގެ މައްސަލައަށް ދާއިމީ ހައްލެއް ހޯދުމުގެ މަޤްސަދުގައި ކުރިއަށް ގެންދާ އޮޕަރޭޝަނެކެވެ. މި އޮޕަރޭޝަންގެ ދަށުން ރާއްޖޭގައި ވަޒީފާ އަދާ ކުރާ ބިދޭސީންގެ އިނގިލީގެ ނިޝާން އެއްކޮށް، އެ ބިދޭސީ މީހާާ ވަޒީފާ އަދާ ކުރަނީ ރާއްޖޭގައި ހެދިފައި ހުރި ގާނޫނާއި ގަވާއިދުގެ ދަށުންތޯ ނުވަތަ ނޫންތޯ ޔަޤީން ކުރެވޭނެއެވެ. މި އޮޕަރޭޝަންގެ ދަށުން ކައުންސިލް އިދާރާތަކުގެ އެހީތެރިކަމާއި އެކު ބިދޭސީންގެ ބަޔޯމެޓްރިކްސް ނެގުމުގެ މަސައްކަތްްތަކާއި އެ މީހުންގެ ސައްހަކަން ކަށަވަރު ކުރުމުގެ މަސައްކަތް ކުރިއަށް ގެންދާނެއެވެ.
