އޭއެފްސީ އޭޝިއަން ކަޕް ކޮލިފިކޭޝަންގައި ރާއްޖެ އިން ކުޅުނު ފުރަތަމަ މެޗުގައި ބޫޓާނާ އެއްވަރު ކޮށްފި އެވެ.
ކޮލިފިކޭޝަންގައި ރާއްޖެ ހިމެނިފައި އޮތީ ގުރޫޕު ސީގަ އެވެ. ރާއްޖޭގެ އިތުރުން ދެން މި ގުރޫޕުގައި އޮތީ ބޫޓާން، ދެކުނު ކޮރެއާ، ޗައިނާ އަދި ބަހުރެއިން އެވެ.
ފުރަތަމަ މެޗުގައި ރާއްޖެ އިން ބޫޓާނާ ދެކޮޅަށް ހޮނިހިރު ދުވަހު ކުޅުނުއިރު، އެ މެޗު ނިމުނީ ދެ ޓީމު 2-2 އިން އެއްވަރުވެގެންނެވެ. މެޗުގައި ބޫޓާން އިން ދެ ލަނޑު ޖަހައި ލީޑު ހޯދާފައި ވަނިކޮށް، ރާއްޖެ އިން ވަނީ ފަހަތުން އަރައި ދެ ލަނޑު ޖަހައިގެން ނަތީޖާ ހަމަހަމަ ކޮށްފަ އެވެ.
ދެ ވަނަ ހާފު ފަށައިގެން ހަތް ވަނަ މިނެޓުގައި ބޫޓާނަށް ލީޑު ނަގައިދިނީ ސަޔޯން ލާމާ އެވެ. އޭގެ ފަހުން އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ތިންލޭ ޔަޒޭރު އެވެ. ރާއްޖެ އިން މެޗުގައި ލަނޑު ޖެހުމަށް ކުރި މަސައްކަތް ކާމިޔާބުވީ 70 ވަނަ މިނެޓުގަ އެވެ. އެ ލަނޑު ރާއްޖެ އަށް ޖަހައިދިނީ މުޙައްމަދު އިލާން އިމްރާން އެވެ. ފުރަތަމަ ލަނޑު ޖެހިތާ 11 މިނެޓު ފަހުން އިލާން ވަނީ ދެ ވަނަ ލަނޑެއް ޖަހައި ރާއްޖެ އަށް ނަތީޖާ ހަމަހަމަ ކޮށްދީފަ އެވެ.
ކޮލިފިކޭޝަންގެ ދެ ވަނަ މެޗުގައި ބަހުރެއިންއާ ދެކޮޅަށް ނިކުންނާނީ ހޯމަ ދުވަހު އެވެ. ތިން ވަނަ މެޗުގައި ބުދަދުވަހު ދެކުނު ކޮރެއާއާ ދެކޮޅަށް ކުޅުމަށްފަހު، ހަތަރު ވަނަ މެޗުގައި ޗައިނާއާ ދެކޮޅަށް ނިކުންނާނީ ހުކުރު ދުވަހު އެވެ.
