ގައުމިއްޔަތަކީ ތަރައްގީގެ މަސައްކަތް ނުހިނގާތީ އެ ވާހަކަ 'އޮއްބާލަން' މި ސަރުކާރުން އަޑުގަދަކޮށް ދައްކާ ވާހަކައެއް ކަމަށް ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު ވިދާވެއްޖެއެވެ.
ހަވަރުބެރު ޕެނަލް ޑިސްކަޝަންގައި ވާހަކަ ދައްކަވަމުން ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު ވިދާޅުވީ ގައުމިއްޔަތު އިޔާދަކުރުމަކީ ވަރަށް ބޮޑު މަޝްރޫއެއްގެ ގޮތުގައި އަޑުއިވެމުންދާ ކަމަށެވެ. މިހާތަނަށް މިކަން ކުރަން ކުރެވުނު މަސައްކަތަކީ ކޮބައިތޯ ސުވާލު އުފައްދަވާ ތޯރިގު ވިދާޅުވީ ގައުމިއްޔަތު ދިރުވާ އާލާކުރުމަކީ މުހިންމުކަމެއް ނަމަވެސް، މާއްދީ ތަރިކައެއް ނެތި ހަގީގި ގައުމިއްޔަތެއް ނުދިރުވޭނެ ކަމަށެވެ.
ތޯރިގު ވިދާޅުވީ ގައުމިއްޔަތުގެ އެންމެ މުހިންމު ބަޔަކީ މާއްދީ ތަރިކަ ކަމަށާއި، ދެން އަންނާނި މައުނަވީ ތަރިކަ ކަމަށެވެ. ނަމަވެސް މި ސަރުކާރުން މި ދާއިރާއިން ކުރި އެއްވެސް މަސައްކަތެއް ނުފެންނަ ކަމަށާއި، އެކަމާއި ގުޅުންހުރި އެއްވެސް ޕްރޮޖެކްޓެއްވެސް ނުފެންނަ ކަމަށެވެ.
ފުރަތަމަ ތިމާމެން އެކަންކުރަން ހުރި މީހުންގެ ވިސްނުން ހުރި ގޮތް. ގައުމިއްޔަތު ދިރުވާ ބޭފުޅުންގެ ވިސްނުން ހުރީ އެ ބޭފުޅުން ސްކޫލެއްގެ އެސްމްބްލީގައި ވާހަކަ ދައްކާލުން އެއީ ބޮޑު ޕްރޮޖެކްޓެއްގެ ގޮތުގައި. ނޫނީ ޖަލްސާއެއްގައި ވާހަކަ ދައްކާލުން އެއީ ބޮޑު ޕްރޮޖެކްޓެއްގެ ގޮތުގައި. ނޫނީ މީހަކު ލިޔޭ ފޮތެއް ނެރުމުގެ ރަސްމިއްޔާތުގެ ޝަރަފްވެރި މެހެމާނުކަން ކޮށްލުމަކީ ވެސް ބޮޑު ޕްރޮޖެކްޓެއްގެ ގޮތުގައި. އެއީ ކުރާ މަސައްކަތެއްގެ ގޮތުގައި، މިނިސްޓްރީއަކުން ކުރާ މަސައްކަތަކީ ޖަލްސާއެއްގައި ޝަރަފްވެރި މެހެމާނަކަށް ވުމަކީ ބޮޑު ޕްރޮޖެކްޓެއްގެ ގޮތުގައި މީހުންނަށް ވިސްނައި ދިނީމަ ވިސްނާލަންވީ ގައުމިއްޔަތު ދިރުވަން މި ބޭފުޅުންނަށް ކުރެވޭނީ ކޮން މަަސައްކަތެއްކަން.ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު
ތޯރިގު ވިދާޅުވީ ގައުމިއްޔަތު ދިރުވާ އާލާކުރުމުގެ މަސައްކަތަކީ މިއަދު ކުރާ ކަމެއް ނޫން ކަމަށާއި، އެކަންކަމަކީ ޒަމާނުއްސުރެ ކުރަމުން އަންނަ މަސައްކަތެއް ކަމަށެވެ. ސްކޫލްތެރޭގައި ވެސް އެކަންކަން ކުރަމުން އަންނަ ކަމަށާއި، ގައުމިއްޔަތަށް ދަރިވަރުން އަހުލުވެރިކުރުމަކީ ވެސް ކުރަމުން އަންނަ ކަންކަން ކަމަށެވެ.
ގައުމިއްޔަތަށް ލޯބި ޖައްސައިގެން ކަންކަން ހިންގާފައި އެބަހުރި. އެއީ މާލޭގެ އެ ފަރާތުގައި ވެލިފުނި ޖެހުންކަމުގައި ވިޔަސް، ހުޅުލޭ އެއަރޕޯޓް ހެދުންކަމުގައިވިޔަސް. ރާއްޖޭގެ ރައްޔިތުން، ރާއްޖެއަށްޓަކައި އުފެއްދީ މިއަދަކު ނޫން. މާކުރިންސުރެވެސް އެ ލޯބި ގައުމަށްޓަކައި އޮންނަކަން އެނގޭނެ. މިއަދު ގައުމިއްޔަތު އިއާދަކުރާ ވާހަކަ ދައްކާއިރު ސްކޫލްތަކުގައި ކުރެވޭ ކަމެއް ނުފެނޭ. އެޑިއުކޭޝަން މިނިސްޓްރީން އެވާހަކައެއް ނުދައްކާ. އަންނަން އޮތް ޖީލުތަކަށް ގައުމިއްޔަތު ގެންގޮސްދޭން މަސައްކަތެއް ކުރެވޭތަން ނުފެނޭ.ހެރިޓޭޖް މިނިސްޓްރީގެ ކުރީގެ ސްޓޭޓް މިނިސްޓަރު މުހައްމަދު ތޯރިގު
ތޯރިގު ވިދާޅުވީ ގައުމިއްޔަތުގެ ވާހަކަ ގަދައަށް ދައްކަން ފަށަނީ ރާއްޖޭގެ ތަރައްގީއަށް ކުރަމުން އައި ކަންކަން ކުރިއަށް ނުދިއުމުން ކަމަށެވެ. ނަމަވެސް ހަގީގަތަކީ ރާއްޖޭގެ ތަރައްގީއަށް ފެށި މަސައްކަތް ނުހިނގާ ކަމަށާއި، އެކަންކަން އޮއްބާލަން ވެސް ދައްކާ ވާހަކައެއްގެ ގޮތުގައި ގައުމިއްޔަތު ދިރުވާ އާލާކުރާ ވާހަކަ ސަރުކާރުން ދައްކާ ކަމަށެވެ.
